No breviario dos tópicos que se foron inventando ao longo do quinquenio de crise que nos arrasa hai un que se refire aos tempos de vacas gordas e que aseguraba que “cada vila de España quería ter o seu AVE”. Coa perspectiva do tempo pódese comprobar que moitas localidades o conseguiron. O resultado daquel empeño é que, a día de hoxe, o 23% dos traxectos dun total de 206 conexións que se explotan entre as 22 estacións en activo en 2012, foron o que podemos cualificar de traxectos unipersoais do AVE. Segundo datos facilitados por Renfe, en 48 rotas das 206 para as que a operadora ofreceu horarios e vendeu billetes, viaxaron un ou menos de un viaxeiro por día. Máis aínda, 10 delas foron utilizadas por menos de 10 pasaxeiros ao longo dos 12 meses.
En 48 rotas das 206 para as que a operadora ofreceu horarios e vendeu billetes, viaxaron un ou menos de un viaxeiro por día. Máis aínda, 10 delas foron utilizadas por menos de 10 pasaxeiros ao longo dos 12 meses
Entre as estacións nas que existiron relacións con menos de dez pasaxeiros ao día está a de Tardienta en Huesca; dos dez traxectos de ida ou retorno con parada neste apeadeiro só dous logran un pasaxeiro por día. Dos oito restantes, dous suman pouco máis de 30 pasaxeiros ao longo do ano e seis non chegan nin sequera a dez viaxeiros nos 12 meses.
Guadalajara, Huesca, Calatayud, Antequera, Puertollano, Cuenca, Utiel-Requena ou Puente Genil explotan algunha relación con menos de 10 pasaxeiros ao ano
Pero esta pequena vila aragonesa non é un caso único. Poboacións con moita máis poboación como Guadalajara (2 traxectos), Huesca (1), Calatayud (2), Antequera (2), Puertollano (2), Cuenca (1), Utiel-Requena (2) ou Puente Genil (2), explotan algunha relación con menos de 10 pasaxeiros ao ano. Cidades como Cidade Real ou Lleida tamén forman parte destes traxectos que tiveron un ou menos de un pasaxeiro por día. Por exemplo, entre Puente Genil e Córdoba viaxaron en todo o ano 295 persoas; entre Guadalajara e Calatayud, 127; entre Antequera e Puertollano, 108.
A cifra de 48 rotas infrautilizadas elévase até 88 se poñemos o listón un pouco máis alto e contabilizamos as relacións que tiveron cinco ou menos de cinco pasaxeiros ao día en 2012. Practicamente as 22 estacións da rede da AVE que durante o pasado exercicio estiveron activas teñen algún traxecto con estes cocientes.
Unicamente 16 traxectos contan con máis de 100.000 pasaxeiros ao longo do ano
Se lle damos a volta aos datos e analizamos os traxectos con maior afluencia de usuarios comprobamos que as cifras tampouco son como para botar foguetes. Unicamente 16 traxectos contan con máis de 100.000 pasaxeiros ao longo do ano e, entre eles, só dous superaron o millón de viaxeiros no exercicio. Estas rotas son Barcelona-Madrid (con 1.309.862 pasaxeiros); Tarragona-Madrid (137.246); Córdoba-Madrid (305.573); Lleida-Madrid (112.076); Madrid-Barcelona (1.304.697); Madrid-Tarragona (138.013); Madrid-Córdoba (305.971); Madrid-Lleida (112.375) Madrid-Málaga (688.172); Madrid-Sevilla (982.258); Madrid-Valencia (828.933); Madrid-Zaragoza (538.967); Málaga-Madrid (687.041); Sevilla-Madrid (966.615); Valencia-Madrid (822.592); Zaragoza-Barcelona (252.699); e Zaragoza-Madrid (539.627).
Alguén podería afirmar que é lóxico que nas pequenas estacións, e nos traxectos entre elas, se contabilicen poucos viaxeiros, xa que o tren de alta velocidade está pensado para transportar grandes masas humanas entre grandes núcleos de poboación. O razoamento é certo, pero obvia que estacións como as de Antequera, Cuenca, Guadalajara, Puente Genil, Puertollano ou Requena-Utiel, cun número ínfimo de pasaxeiros son todas de nova planta, e en cada unha delas investíronse decenas de millóns de euros.
Estacións como as de Antequera, Cuenca, Guadalajara, Puente Genil, Puertollano ou Requena-Utiel, cun número ínfimo de pasaxeiros son todas de nova planta, e en cada unha delas investíronse decenas de millóns
No mesmo senso, hai que lembrar que do parque de 195 trens de alta velocidade con que conta Renfe, (no que se investiron 5.000 millóns de euros) só 86 foron deseñados para os traxectos directos ou semi directos entre grandes capitais do país. As restantes 109 unidades foron adquiridas para os servizos Alvia e Avant. Nos primeiros aprovéitase o sistema de cambio de ancho de eixos, para unir poboacións menores enlazadas por vías da rede convencional coas infraestruturas da rede AVE. Os servizos Avant, con trens de menor rango que o AVE, utilízanse para unir as grandes capitais coas poboacións de menor tamaño que xa están conectadas con tren de alta velocidade. Non parece que o esforzo en investimentos e infraestruturas tivese a recompensa que se buscaba.
