Máis dunha ducia de organizacións e entidades chaman este mércores a unha concentración na Coruña reclamando que as 245 persoas refuxiadas rescatas no Mediterráneo polos buques Open Arms e Ocean Viking (da ONG Médicos sen Fronteiras) poidan acceder a "portos seguros", o que de momento foi denegado polos Executivos europeos.
A concentración terá lugar este mércores ás 20 horas ante a Subdelegación do Goberno
A concentración, que terá lugar ás 20 horas ante a Subdelegación do Goberno, está convocada polo Foro Galego de Inmigración e é apoiada pola A.C.Alexandre Bóveda, Aire, Anova, BNG, CC.OO., Coruña contra a Guerra, Esquerda Unida, Fotos contra a Guerra, Marcha Mundial pola Paz e a nonviolencia, Marea Atlántica, Mundo sen Guerras e sen Violencia, Podemos, Oxfam Intermón, Sos Racismo Galicia, UGT e Vangarda Obreira.
Na convocatoria lémbrase que no que vai de ano 840 persoas perderon a vida no Mediterráneo e acusa os Gobernos de España, Italia e Malta de "non respectar o dereito internacional", subliñando que o Estado Español se está a "desentender cun barco con bandeira española", e que con esta decisión se converte en "cómplice da política criminal de Salvini".
"Os Gobernos están a incumprir vergoñentamente coas obrigas que lles impón o dereito internacional ao negar un porto seguro a persoas que poderían sufrir torturas se son devoltas a Libia e que están esgotadas e necesitan protección e coidados", sinalan.
A convocatoria acusa os Gobernos de España, Italia e Malta de "non respectar o dereito internacional"
Na convocatoria pídese "vías de acceso seguras para as persoas solicitantes de asilo" e, así mesmo, "que se cumpra a lei do mar e se leve a porto seguro ás persoas que naufragan". Finalmente, esíxese que a UE "cumpra co dereito de asilo e reforme o sistema de Dublín que obriga a solicitar asilo no país polo que se entra á UE".
Este luns Open Arms solicitou asilo urxente na embaixada de España en Malta para 31 menores rescatados en alta mar, lembrando que cumpren as condicións para ser recoñecidos como refuxiados. A ONG alerta de que "cada día que pasa é máis difícil" a situación no barco e denuncia o "silencio" dos gobernos europeos.
