En 2017, a vitoria socialista nas eleccións autárquicas -municipais- portuguesas contribuíu a consolidar o Goberno da esquerda que encabezaba o primeiro ministro, António Costa, apoiado na maioría parlamentaria alcumada como geringonça, a que conformaran en 2015 Partido Socialista (PS), Partido Comunista e Bloco de Esquerda para desbancar en 2015 do poder ao conservador Pedro Passos Coelho (PSD).
O PS segue sendo, con diferenza, a primeira forza municipal en Portugal. Pero o lixeiro retroceso en votos e, sobre todo, a perda da alcaldía de Lisboa, é interpretada como un toque de atención para a formación do primeiro ministro
Catro anos despois, neste 2021 os socialistas volveron finalizar a xornada electoral deste 26 de setembro como forza máis votada. Lograron algo máis do 34% dos votos, 147 presidencias de Cámara municipal -alcaldías- e 123 maiorías absolutas. Son tamén, con diferenza, a primeira forza nas asembleas municipais e de freguesía, os outros dous órganos do poder local que se renovaban.
Pero, así e todo, o PS fica cun sabor agre e así o amosou ás claras o propio Costa. Non só por perder uns tres puntos de voto nas eleccións a cámaras municipais. Tamén porque quedan con nove alcaldías menos (de 156 a 147) e, sobre todo, porque unha delas é especialmente significativa, a de Lisboa, a que exerceu o propio primeiro ministro e que na que agora o seu sucesor en 2017, Fernando Medina, perdeu a reelección fronte ao ex-comisario europeo Carlos Moedas, líder da coalición de centro-dereita na capital do país veciño, na primeira posición por unha estreita marxe.
A sorpresa de Lisboa -as sondaxes electorais auguraban que o PS recuncaría na presidencia da Cámara- contrasta coa continuidade no Porto, onde o independente Rui Moreira gaña o seu terceiro mandato na alcaldía, mais perdendo a maioría absoluta que gañara en 2017. Este será necesariamente o seu último mandato, cando menos consecutivo, xa que a lei electoral portuguesa impide exercer cargos locais coma este por máis de tres ocasións seguidas.
No Porto, o independente Rui Moreira logra o seu terceiro e último mandato, pero perde a maioría absoluta
Ante este novo mapa municipal, o primeiro ministro e secretario xeral do PS admite que perder Lisboa "é uma derrota que penaliza qualquer partido", indicou en declaracións que recolle a RTP, se ben coida que cómpre salientar que "o país não é só Lisboa". Ao cabo, advertiu, malia perdas coma esta ou malia outras derrotas significativas como a sufrida en Coimbra, o PS logrou unha ampla vitoria no global nacional. É a primeira vez, advertiu, que os socialistas se impoñen nas autárquicas en tres convocatorias consecutivas.
Pola banda da oposición, o PSD -partido irmán do PP en Portugal-, dá por logrados todos os seus obxectivos electorais "contra as sondagens e contra alguns comentadores", sinalou o seu presidente, Rui Rio, quen fora alcalde do Porto ata 2013. As análises postelectorais do país veciño ven a Rio reforzado non tanto polo resultado global como pola inesperada vitoria lisboeta.
Mentres, o Partido Comunista admite que este 26 de setembro a súa coalición cos Verdes ficou lonxe dos obxectivos que pretendía, tanto por perder posicións en diversos municipios como por non dar logrado recuperar Almada, tras perdela en 2017. O Bloco de Esquerda segue fóra das alcaldías e tamén a extrema dereita do Chega, que así e todo avanza en diversos concellos.
![](https://praza.gal/storage/uploads/cerveira-38b8e07.jpeg)
Dominio do PS na beira portuguesa das eurocidades
Valença volve ter alcalde socialista máis dunha década despois
Nas localidades que fan parte de eurocidades con concellos galegos, o novo mandato municipal traerá consigo un maior dominio do PS. En Valença -que comparte eurocidade con Tui-, tras máis dunha década de dominio da dereita, o Partido Socialista volve á alcaldía con José Manuel Carpinteira, mentres que a coalición de centro-dereita do PSD perde máis de vinte puntos.
Tamén en Vila Nova de Cerveira -metade da eurocidade con Tomiño- hai cambio a prol do PS. O independente Fernando Nogueira, que perdeu máis de 13 puntos, terá que ceder o mando ao socialista Rui Teixeira, vencedor con case o 50% dos votos. En Chaves, parte da eurocidade con Verín, o PS xa ostentaba a alcaldía e seguirá nela con Nuno Vaz, que volve quedar preto do 50% dos votos.
Nestas catro localidades minhotas ligadas a Galicia a través das eurocidades, a única que terá de agora en diante alcalde do centro-dereita é Monção. O PSD aumenta alí a súa vantaxe e António Barbosa retén o poder, agora cunha maioría aínda máis esmagadora, próxima ao 60% dos votos.