A área metropolitana de Vigo bota a andar con Caballero de presidente e o abandono do PP

Caballero fala ante as cadeiras baleiras dos populares na constitución da Área Metropolitana de Vigo Dominio Público @MareaVigo

A primeira área metropolitana de Galicia -e a segunda en todo o Estado- quedou constituída este xoves en medio dun enorme balbordo. A asemblea de constitución da entidade supramunicipal que agrupa os concellos da zona de Vigo acabou por se converter nunha algarada e cruzamento de acusacións entre alcaldes tras debater sen acordo sobre o Plan de Transporte e logo de que os representantes do PP decidisen abandonar a sesión. Xa cos edís populares fóra, o rexedor vigués, Abel Caballero, foi elixido primeiro presidente do ente. 

Caballero foi elixido presidente da Área cos votos a favor de PSOE, BNG e as mareas tras o abandono da sesión do PP

Ao final, Caballero contou co único voto en contra da Agrupación de Electores de Redondela tras a marcha dos alcaldes do PP e co voto favorable de PSOE, BNG e Marea para que asumise a presidencia. Todo logo dun primeiro acto oficial da área metropolitana que durou unhas tres horas, estivo cargado de reproches e diferenzas e no que o rexedor de Vigo acusou os populares de boicot. Non só do acto en si, senón que foi máis aló e sinalou a Núñez Feijóo e Alfonso Rueda de querer atrancar o propio ente xa desde o inicio.

Os problemas comezaron cando os socialistas se decataron de que non sería Caballero -como agardaban- quen presidiría a Mesa de Idade e, xa que logo, quen dirixiría a asemblea. Arturo Grandal (PP), alcalde de Salvaterra do Miño, era o maior da sesión polo que foi o encargado. Daquela, comezou un debate sobre a polémica do Plan de Transporte polo que tanto o secretario da Área como o PSOE protestaron ao entender que non se estaba a seguir a orde do día. 

O PP aproveitou o seu control da Mesa para permitir o debate sobre o transporte que os socialistas lembraron que non estaba na orde do día

Varios alcaldes do PP lembráronlle aos socialistas que o ditame do Consello Consultivo de Galicia condiciona a creación da Área á integración do Plan de Transporte, polo que non se debería seguir adiante ata que Vigo se unise a el. Pola contra, Caballero insiste no seu desacordo coa repartición de custos e apunta aos tribunais para que decidan quen leva razón. Así, urxiu a constituír o ente supramunicipal ao ser este 1 de decembro o último día no prazo para facelo. 

Os populares entenden que non se pode constituír a Área sen a integración de Vigo no Plan de Transporte

O presidente da Mesa de Idade, Arturo Grandal, solicitou un receso para consultar as medidas a tomar e tras o descanso intentou suspender o pleno ante as diferenzas sobre a posta en marcha da Área sen un acordo sobre o transporte metropolitano. Entendía que non se podía seguir adiante se non se confirmaba a integración de Vigo no Plan, pero o secretario -que tamén o é de Vigo e que o foi da Consellería de Economía con Javier Guerra- advertiu que non había "causa legal" para esa suspensión. 

Foi daquela cando Grandal e todos os representantes do PP decidiron levantarse e marchar do pleno. Daquela, e coa ausencia dos populares, Caballero pasou a presidir a Mesa. Presentouse a candidatura -a del era a única- e saíu elixido presidente da área metropolitana cos votos a favor de PSOE, BNG e Marea.

O presidente da Mesa intentou suspender o pleno pero o secretario advertiu que non se podía e os populares abandonaron a sesión

"A área metropolitana segue; imos seguir porque hai cidadáns que queren que se constitúa e outros non, por iso marchan, pero a Área non queda rebentada, segue aí e ninguén vai ser capaz de derrubala, nin tan sequera Feijóo nin o PP", dixo Caballero antes de que fora proclamado presidente. 

"Foi un espectáculo bochornoso dun grupo que quixo empañar un día histórico", dixo Pazos, alcalde de Cangas

Pola súa banda, Xosé Manuel Pazos (ACE), alcalde de Cangas e portavoz das confluencias, dixo que asistira a un "espectáculo bochornoso dun grupo que quixo empañar un día histórico". "Pero imos seguir loitando pola Áarea e a seguir insistindo en que Vigo se integre no transporte metropolitano nas condicións pactadas", insistiu. Desde o BNG, pola súa banda, cren que "se demostrou quen leva tantos anos boicoteando a Área". 

Caballero fala ante as cadeiras baleiras dos populares na constitución da Área Metropolitana de Vigo Dominio Público @MareaVigo

Despece

  • Máis de 17 anos de traballos e frustracións

    David Reinero

    A Declaración de Soutomaior, asinada o 18 de novembro de 1999, foi a primeira pedra desta Área Metropolitana de Vigo. Desde aquel momento ata a constitución formal da nova institución viguesa do vindeiro 22 de novembro deste 2016 pasarán 17 anos.

    A área de Vigo impulsouse coa 'Declaración de Soutomaior' de 1999; a constitución formal do novo ente tardará 17 anos

    Xa en 1999 existía un traballo previo de unión de vontades políticas para avanzar máis lonxe do que permitía a preexistente Mancomunidade de Vigo, formada, ademais de pola cidade, polos municipios de Redondela, O Porriño, Nigrán, Mos, Gondomar, Baiona, Salvaterra, Salceda, Soutomaior, Pazos de Borbén e Fornelos de Montes. A eles, que xestionaban de xeito conxunto fundamentalmente o ciclo da auga e proxectos de desenvolvemento local, sumáronse Cangas e Moaña para impulsar unha Área Metropolitana con maiores ambicións políticas. Durante os anos seguintes, cun parón en 2003 polas eleccións municipais, desenvolvéronse diversos traballos técnicos e negociacións coa Xunta, encabezada polo daquela director xeral de Administración Local, Alfonso Rueda. Pero en 2005, cando o Goberno galego viña de remitir ao Parlamento o proxecto de lei para a súa tramitación, Manuel Fraga adiantou as eleccións autonómicas e o texto decaeu.

    Méndez Romeu, desde o bipartito, propuxo un consorcio que rebaixaba notablemente as aspiracións dos concellos

    Durante o bipartito, o daquela conselleiro de Presidencia e Administración Pública, José Luis Méndez Romeu, deixou a un lado o texto articulado consensuado previamente para propor un consorcio de servizos que rebaixaba notablemente as aspiracións políticas dos concellos implicados. Mesmo os socialistas da área viguesa compañeiros de partido de Méndez Romeu tomaron o seu movemento como un boicot procedente da Coruña e nada máis se volveu saber da área en catro anos.

    Caballero boicoteou a constitución do ente negándose a designar os representantes de Vigo por crer que a norma trataba mal a cidade

    Con Feijóo na Xunta retómase a elaboración dun novo texto legal que se chega a aprobar no Parlamento e entrar en vigor en 2012. Porén, o alcalde de Vigo, Abel Caballero, boicoteou a constitución do ente negándose a designar os representantes de Vigo por considerar que a norma trataba mal a cidade. A Xunta aceptou modificala e finalmente, o pasado mes de xullo, novamente a piques de que rematara outra lexislatura autonómica e houbese risco de que o texto volvese decaer, o Parlamento aprobaba unha segunda lei de área metropolitana para Vigo, agora si co acordo de todas as partes. Unha nova entidade que aínda agora, logo da súa constitución formal deste 1 de decembro, comezará a funcionar de xeito efectivo, 17 anos despois daquela Declaración de Soutomaior. E faino, como se puido comprobar, ferida desde o primeiro día. 

    Feijóo, con Caballero e outros alcaldes da área metropolitana de Vigo © Xunta

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza