Despece

• Carril: "En moitos casos, quen vota un corrupto tamén é un corrupto"

  O BNG da Coruña ten claro que "depende de todos e todas nós non só evitar que goberne o Partido Popular senón garantir que haxa políticas municipais galegas e de esquerdas". Aludindo ao seu lema electoral, a formación nacionalista céntrase en impedir outros novos catro anos de Carlos Negreira á fronte do Concello. 

  "A alternativa ao PP ten que vir con políticas municipais de esquerda e galegas; a partir de aquí, todo é posíbel"

  A irrupción da Marea Atlántica ameaza con restarlle representación, pero a súa entrada no consistorio podería ser clave para conformar unha alternativa á dereita da man tamén do PSdeG. Preguntado o seu cabeza de lista, Xosé Manuel Carril, por eses posibles acordos, pon unha condición clara: que esa alternativa ao PP "ten que vir con políticas municipais claramente de esquerda e galegas". "E a partir de aquí todo é posíbel", insiste. 

  As enquisas seguen dándolle a maioría de apoio ao PP, malia os múltiples casos de corrupción nos que está implicado e que levaron mesmo a que Negreira deixara caer o seu número dous, Julio Flores. Para Carril, que os populares manteñan tanto apoio débese a que "a ética non figura como obxecto de preocupación política, de modo que ninguén repara en que, en moitos casos, quen vota un corrupto tamén é un corrupto, polo menos desde o punto de vista da ética e da preservación do ben común".

  En canto aos cambios urxentes que precisa a cidade, o BNG ten clara a súa "aposta seria e decidida pola Coruña como cidade pública, con políticas que nazan de consultas e orzamentos participativos, onde os recursos económicos nazan de medidas fiscais que teñan en conta a nosa capacidade económica; con auditorías das concesións administrativas e das empresas municipais para recuperar os servizos públicos; e con contratación pública estratéxica e responsábel, con cláusulas sociais, éticas e verdes".

  O BNG aposta por unha Coruña "pública, social, galega e ética"

  Ademais, aposta por unha cidade "social" con "políticas de emancipación social desde o emprego, os servizos sociais, a vivenda, a educación, o transporte público, o respecto ao medio ambiente e aos recursos naturais"; e unha cidade "galega" pero á vez "comarcal e metropolitana". Ao tempo, o BNG pula por unha Coruña "mariñeira" que teña o mar "como fonte de riqueza", de barrios, para que estes sexan "o epicentro das políticas municipais", e ética, cun código municipal "ético e de boa conduta" con mecanismos de supervisión e control externos cuxo incumprimento "daría lugar á dimisión ou cesamento dos cargos públicos ou de confianza".

  "Non hai nada que compense nin a corrupción; nin os millóns de cartos públicos, vía empréstitos bancarios, soterrados no capricho das Mariña e do Parrote"

  Preguntado polo mellor e o peor dos catro anos de Carlos Negreira na alcaldía, Carril teno claro: "Non hai nada que compense nin a corrupción; nin os millóns de cartos públicos, vía empréstitos bancarios, soterrados no capricho das Mariña e do Parrote, que é unha actuación sectaria, excluínte e elitista que condenou os barrios ao esquecemento e á agravación dos seus problemas; nin as privatizacións dos servizos públicos; nin o retroceso da lingua e cultura galegas; nin o empobrecemento por causa das súas políticas".

  

• Barcón: "Estamos á espera de quen é o seguinte imputado do PP; os coruñeses non merecen isto"

  Mar Barcón, candidata do PSdeG á alcaldía da Coruña, está convencida de que "haberá cambio político" na cidade. "Por suposto; os coruñeses están decepcionados polo PP, que incumpriu as súas promesas e que trouxo más paro, más impostos e menos dereitos", di a cabeza de lista dunha formación que as enquisas sitúan nunha dura loita coa Marea Atlántica por liderar a alternativa progresista ao PP. 

  "Por suposto que haberá cambio político na cidade; os coruñeses están decepcionados polo PP"

  "Hoxe os coruñeses viven peor que hai catro anos e piden un cambio seguro, un cambio que representa o PSOE, porque somos unha garantía para que os coruñeses recuperen os dereitos perdidos. Somos o partido que puxo en marcha os servizos públicos e somos quen de garantizalos", di Barcón, que respecto a posibles acordos post-electorais aclara que se presenta "para gobernar e liderar o cambio progresista e liderar unha maioría social". 

  Respecto aos pactos, Barcón cre que "hai que esperar a ver o que din as urnas; despois falaremos"

  "Levamos catro anos a pé de rúa, perto da xente, dialogando e pactando un proxecto coa xente. Hai que esperar a ver o que din as urnas e despois falaremos", insiste respecto a un hipotético acordo coa Marea e o BNG para gobernar un Concello do que non destaca "nada bo" nos últimos catro anos "máis aló do propio funcoinamento da administración municipal propia de calquera goberno". "O peor de Negreira é que, en canto cruzou a porta da alcaldía, esqueceu as súas promesas aos coruñeses. Non escoitou os veciños, abandonou os barrios e deixou a xente á sua sorte cando máis necesitaba dun goberno achegado que a protexese", insiste. 

  Mar Barcón amósase "preocupada" por ver un goberno local e unha candidatura do PP que "ten o número dous do goberno imputado e agora a número dous da lista de Negreira tamén imputada". "Boa parte da lista do PP aparece no sumario da Pokémon e estamos á espera de ver quen é o seguinte imputado do PP... Os coruñeses non merecen esta situación", explica. 

  En canto aos cambios urxentes que precisaría a cidade, a candidata do PSdeG aposta por "outra maneira de facer política, con diálogo e participación". "Quero un goberno aberto, transparente e participativo. E con esta forma de gobernar, sempre perto das personas e nos barrios, perto da realidade para dar resposta realista e realizable aos problemas da xente real", remata quen tamen pon como prioridades nos primeiros días de goberno "rescatar as persoas do drama que pasan, sen servizos públicos e sen posibilidades de atopar emprego". "Hai que resolver os principais problemas da cidadanía", finaliza.