Pontón e Caballero reclaman que os cambios non se queden “nas caras”
“Continuista” fronte ao “impulso” que se precisaría para loitar contra o coronavirus e coas mulleres perdendo peso a respecto dos homes. Nesa análise coincidiron na tarde deste domingo os líderes de BNG e PSdeG, Ana Pontón e Gonzalo Caballero, ao coñecer a composición do novo Goberno co que Feijóo iniciará o seu cuarto mandato á fronte da Xunta.
“Que se nomeen dous vicepresidentes e sexan homes, demostra até que punto falta compromiso coa igualdade e cunha participación paritaria das mulleres”, di Pontón
“Que se nomeen dous vicepresidentes e sexan homes, demostra até que punto falta compromiso coa igualdade e cunha participación paritaria das mulleres”, salientou a portavoz nacionalista, para quen “de nada vale cambiar ao conselleiro de Sanidade e a de Educación se non cambian as políticas”, engadindo que “once anos de recortes dos servizos públicos necesitan máis que un cambio de caras”.
Para Pontón, o de Feijóo é “no esencial, un goberno continuísta, sen perfís de peso político e que vai na liña do esperado: continuísmo puro e duro, xusto nun momento en que a COVID acelera un fin de ciclo e se necesitan novas ideas e impulso”.
“Os relevos en Sanidade e Educación evidencian o recoñecemento do fracaso da Xunta nas súas competencias principais”, di Caballero
Similares expresións empregou tamén o socialista Caballero, quen valorou o novo executivo como “continuísta” a pesar da importancia que lle dá a contar cun equipo “con ideas, con impulso” para afrontar a crise sanitaria, económica e social provocada polo coronavirus. Caballero tamén lamentou “a falla de peso das mulleres” ao crearse unha nova vicepresidencia que tamén recae nun home e que “só cinco dos doce integrantes” da Xunta, incluíndo o propio Feijóo, sexan mulleres.
O socialista considera que “os relevos en Sanidade e Educación evidencian o recoñecemento do fracaso da Xunta nas súas competencias principais” e reclamou que os cambios “non poden limitarse ás caras” senón que teñen que implicar “novas políticas”.
