A Valedora do Pobo dimite polo nomeamento outorgado con "desviación de poder"

Milagros Otero, o día da súa toma de posesión como Valedora, en 2015 Dominio Público Praza Pública

Hemeroteca

O Tribunal Supremo deu este mércores o golpe definitivo á permanencia de Milagros Otero como Valedora do Pobo. O alto tribunal rexeitou o recurso presentado contra a decisión do TSXG de anular o nomeamento da irmá do voceiro parlamentario PP,  Pedro Puy, unha designación na que a Valedora actuara con "arbitrariedade" e "desviación de poder", segundo a sentenza. Ese recurso era a argumentación á que a Xunta e o PP se agarraban para defender a continuidade de Otero ("non imos tomar decisións firmes cando non hai unha sentenza firme", afirmara a deputada Paula Prado), que defendeu no Parlamento ante as peticións de cese da oposición.

Milagros Otero decidiu dimitir nun momento no que, trala decisión do Supremo, xa non contaría tampouco co apoio do PP e do Goberno galego

Milagros Otero decidiu dimitir nun momento no que, tras esta decisión do Supremo, xa non contaría tampouco co apoio do PP e do Goberno galego. A Vicevaledora enviou unha carta ao Parlamento poñendo o seu cargo a disposición da Cámara, pero condiciona a súa renuncia a que os grupos parlamentarios se poñan de acordo sobre as persoas que a substituirán a ela e ao vicevaledor, Pablo Cameselle (proposto polo PSdeG-PSOE).

"Poño o meu cargo a disposición da Cámara. En consecuencia, prégolle que dea traslado deste escrito aos grupos parlamentarios, de xeito que no momento en que estes acorden a súa proposta para cubrir os cargos de valedor/a e adxunto/a proceda de inmediato a formalizar a miña renuncia", di o breve escrito remitido ao presidente do Parlamento.

"A institución do Valedor do Pobo quere garantir á cidadanía que as súas queixas seguirán a ser tramitadas con normalidade como ata este momento. A valedora seguirá exercendo ata o último día co mesmo rigor, profesionalidade e independencia a súa importante tarefa na defensa dos dereitos das persoas", pódese ler na web da institución

Feijóo e Milagros Otero na toma de posesión desta como Valedora do Pobo Dominio Público Xunta de Galicia

Un nomeamento con "arbitrariedade" e "desviación de poder

O TSXG sinalou que Milagros Otero actuara con "arbitrariedade" e "desviación de poder" no nomeamento da irmá do voceiro parlamentario do PP

A sentenza do TSXG, coñecida en xuño do pasado ano atribuía interferencias co obxectivo de dar o cargo a quen é tamén filla do seu antigo superior na Facultade de Dereito da USC, irmá do voceiro parlamentario do PP e sobriña de Manuel Fraga. En decembro de 2015 aprobouse a convocatoria pública para a provisión, polo sistema de libre designación, de tres postos de traballo, un proceso que finalizou en marzo de 2016 a través dunha resolución asinada polo adxunto á Valedora. Só despois dun recurso dun dos candidatos puido saberse que Milagros Otero decidira apartarse do proceso dado que "é de dominio público que a titular da institución é discípula do catedrático de Dereito don F. de P.P.M., pai dunha candidata", como pode lerse na sentenza.

O TSXG sinalou no seu ditame que "non resulta admisible" que non se consignara na resolución de abstención "e inicialmente tratase de ocultarse o verdadeiro motivo que deu lugar á abstención". E o tribunal concluíu que "a pesar de que a Valedora se abstivo de intervir no procedemento, existen datos que permiten deducir que continuou intervindo no procedemento e non se apartou do mesmo, evidenciando interese en que fose seleccionada a señora P.F.". "Existen indicios claros de que boa parte dos criterios de selección e méritos computables foron determinados á medida da candidata que resultou beneficiada coa adxudicación do posto", engadía a sentenza.

A belixerancia de Otero co Concello de Santiago contrastou coa súa indulxencia a respecto da xestión da Xunta

Peticións de dimisión

Este mércores a oposición volvera esixir a dimisión de Otero. "Advertiamos de que iamos facer un ridículo espantoso ante o Tribunal Supremo e iso é o que acaba de pasar", dicía a deputada do PSdeG Patricia Vilán. "non pode ser que a persoa encargada de facer valer os dereitos dos cidadáns ante as Administracións sexa a primeira en vulneralos" , dicía Luís Villares, voceiro de En Marea. "É escandaloso e obsceno" que Otero siga no cargo e "o principal responsable" de que isto suceda "é Núñez Feijóo", sinalaba Noa Presas, polo BNG.

 

Catro anos de críticas

Milagros Otero abandona o cargo tras unha xestión marcada polas críticas das forzas da oposición e a controversia xerada por algunha das súas decisión. Por exemplo, Otero revelou no Parlamento datos privados de persoas sen fogar e dixo ter "moitas" queixas contra o Concello de Santiago neste ámbito, pero realmente eran dúas entre máis de 65.000. Esta belixerancia contrastou coa súa indulxencia a respecto do Executivo galego. A institución do Valedor do Pobo suma xa unha década de polémicas e deterioro.

Despece

  • Para a oposición, a renuncia "chega tarde"

    Milagros Otero, na súa chegada á comisión do Parlamento na que deu explicacións pola sentenza do TSXG CC-BY-SA Praza Pública

    Momentos despois de coñecer a renuncia de Milagros Otero, as forzas da oposición no Parlamento galego celebraron a resolución do proceso aberto o verán pasado coa sentenza do TSXG que anulou o nomeamento da xefa do Servizo de Administración e Persoal da Valedora. Porén, coincidiron en sinalar que a dimisión "chega tarde", criticando a vicevoceira do PSdeG-PSOE, Patricia Vilán, que Otero tardara case un ano en poñer o seu posto a disposición da Cámara.

    Por En Marea, Luís Villares afirmou que a súa formación foi a primeira que levou ao Parlamento a "situación de nepotismo vinculada cunha Valedora que abusou da súa situación de poder para favorecer unha persoa coa que tiña unha relación de amizade, e claramente vinculada coa cúpula do PP". E, de igual xeito, o BNG pedira xa este mércores a súa dimisión "por decencia", ao tempo que facía unha valoración moi negativa da súa xestión á fronte da institución: "Quedou demostrado que a Valedora do Pobo foi a Valedora do Partido Popular, actuando como “conseguidora” do PP", dixo Noa Presas.

    Mentres, no PP tanto o presidente da Xunta, Alberto Núñez Feijóo como a vicevoceira parlamentaria, Paula Prado, sinalaron que a decisión de renunciar ao seu cargo "honra" a Milagros Otero. Con todo, Feijóo volveu excusar a actuación da Valedora, afirmando que ela "non asinou" o nomeamento, senón que delegou este trámite no seu adxunto. Porén, o TSXG na súa sentenza deixa claro que Otero "continuou intervindo no procedemento e non se apartou do mesmo, evidenciando interese en que fose seleccionada" a candidata.

    No que si coincidiron PP e oposición foi en desexar que o proceso de substitución de Milagros Otero á fronte da institución sexa rápido. Prado apelou á "responsabilidade" da oposición para designar "canto antes" un novo Valedor ou Valedora. E Vilán dixo que espera que en "dous ou tres meses" este nomeamento se poida producir, lembrando que "todos os grupos ou a maioría" deben chegar a un acordo, pois son necesarios 45 votos dos 75 deputados que ten a cámara.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza