A xestora do PSdeG sae en defensa de Sánchez e Feijóo congratúlase da quebra do PSOE

Sánchez, nun acto da campaña do 25S CC-BY-NC-SA PSdeG

O PSOE vive unha situación crítica, practicamente sen precedentes alén do afastamento de Josep Borrell como aspirante á Presidencia do Goberno de España a finais dos anos 90 do século pasado, aínda que co matiz nada menor que o daquela candidato, tamén elixido en primarias, non era o líder orgánico do partido -o secretario xeral seguía a ser Joaquín Almunia-. Mesmo antes das dezasete dimisións na Executiva Federal dos socialistas para propiciar a caída de Pedro Sánchez, o presidente da Xunta en funcións e candidato á reelección congratulábase abertamente da quebra do partido socialista e líaa en clave de vaga expansiva dos resultados do 25S mentres, na dirección interina do PSdeG, se tenta enviar folgos ao líder que tenta resistir.

Alberto Núñez Feijóo reuniu este mércores a cúpula do partido para facer balance duns resultados "tan bos como excepcionais" e tamén dos seus "efectos", a comezar polos "movementos intensos" no seo do PSOE. Segundo quen continuará á fronte da Xunta o que sucede no ata agora principal partido da oposición española é unha inxección de "sentidiño galaico" que "está a mover os alicerces do PSOE, e para ben, para ben de España e da política". Porque o debilitamento ou caída de Sánchez pode permitir, vén concluír, que Mariano Rajoy poida ovlver se investido. "Non podemos seguir esperando".

Feijóo: "Estanse a mover os alicerces do PSOE para ben de España e da política"

Mentres os populares galegos observan con pracidez a profunda crise socialista, dende a xestora do PSdeG, o órgano interino que ten encomendada a dirección do partido dende a dimisión de José Ramón Gómez Besteiro, a súa presidenta, Pilar Cancela, saía abertamente en defensa de Pedro Sánchez. O movemento dos dimisionarios non é máis, para Cancela, ca unha "tolemia" que avanza cara ao "suicidio" político do PSOE. Os cargos que tentan propiciar a caída de Sánchez, sinalou a deputada en declaracións á TVG, están inmersos nunha "fuxida cara a adiante" para evitar que "se fale nos órganos internos do partido" pero, sobre todo, cre, para "roubarlle á militancia a capacidade de decisión".

Cancela ve o sucedido "un suicidio" e rexeita que o PSOE torne "nun partido de centro moderado"

"Non é o momento máis oportuno nin a ocorrencia máis oportuna", di a socialista, que se pregunta "dende cando lle temos medo ao exercicio democrático". "Algúns e algunhas -afirma- esquecen que neste partido se deu un salto fundamental, que a dirección e os candidatos os decide a militancia e que foi a militancia a que elixiu este secretario xeral". Ao cabo, advirte, do que se está "a falar" é "de se o PSOE se converte nun partido de centro moderado ou volvemos ser un partido de esquerda, que é o que nos pide a militancia". "Se co noso voto debemos facilitar un goberno do señor Rajoy, eu seguirei dicindo que non", conclúe.

Caballero, cos críticos

A dirección provisional do PSdeG non está co golpe a Sánchez, pero os seus impulsores si atopan apoio nun dos cargos enfrontados co órgano que encabeza Cancela, o alcalde de Vigo, Abel Caballero. Tras afastarse abertamente da campaña electoral de Xoaquín Fernández Leiceaga, Caballero sinalou a primeira hora deste xoves en declacións á Cadena SER que, na súa opinión, as dimisións do mércores provocan que a Executiva de Sánchez fique "disolta" e que, polo tanto, "entre tres e catro meses" haxa que celebrar un Congreso extraordinario que aborde as solucións "a eleccións continuadas con perdas dramáticas de votos".

O alcalde de Vigo alíñase coa operación para desbancar a Sánchez e nega "que uns lle queiran dar voz aos militantes e outros, non"

O rexedor vigués alíñase cos críticos, entre outras cuestións, porque "as bases do partido na provincia" votaron o 25S "unha lista que foi cambiada nos despachos de Ferraz", e rebate a Cancela afirmando que "non vale dicir que uns lle queren dar voz aos militantes e outros, non". Mentres ese congreso non chega, Caballero abre a porta a que neste período transitorio os socialistas permitan un novo Goberno do PP no Estado. "Eu levo dicindo toda a vida que [Rajoy] é o meu adversario directo", sinala, pero "a cuestión é se o non a Rajoy agora leva a máis Rajoy en decembro", en referencia ás posibles terceiras eleccions xerais.

 

Feijóo, este mércores en Santiago CC-BY-SA PPdeG

Despece

  • Paco Vázquez pide que o PSOE "non sexa escravo dos seus militantes"

    Francisco Vázquez uniuse ao balbordo no PSOE. En declaracións a Radio Voz, o ex alcalde da Coruña pediu ao partido "que escoite os seus votantes e non sexa escravo dos seus militantes" porque, segundo dixo, estes últimos "son poucos, endogámicos e están lonxe da realidade". "Os afiliados non so os propietarios do proxecto do PSOE, sono quen lles confían o seu voto, insistiu. Ademais, o ex rexedor coruñés culpou da crise da formación á "deriva ideolóxica de moitos anos" e de "intentar disputar votos con "grupos comunistas e independentistas". "Iso non ten que ver nada con nós, nós temos que disputalos no centro dereita; o partido esqueceu que debe competir co PP e despreocuparse de grupos de esquerda e populistas", asegura.  

    "Os afiliados non son os propietarios do proxecto do PSOE", di Vázquez, que cre que non se pode "disputar o voto con comunistas e independentistas"

    Ademais, Vázquez enumerou as que, ao seu parecer, foron decisións que provocaron a crise no PSOE nos últimos anos: "a ruptura co espíritu da transición; a posición co Estatuto de Catalunya; o mal uso desa lei de memoria histórica que foi a lei de desquite histórico e que se limitou ao triste espectáculo do cambio de nome das rúas; volver ao discurso anticlerical; ou ter representantes sen ningunha raizame social, cuxa única bagaxe é ter sido de Juventudes Socialistas, sen oficio nin beneficio". "Todas esas cousas acábanse pagando", dixo. 

    Vázquez culpa da crise socialista ao seu discurso "anticlerical", a posición en Catalunya ou "o mal uso da lei de memoria histórica"

    Alén disto, o ex embaixador no Vaticano sinala que o que máis lle "preocupa" non é a crise do partido, senón "a desafectación" da cidadanía. "Págase nas urnas e cando perdes un voto é moi difícil recuperalo; marcharon afiliados pero millóns de votos", asegurou quen cre que o PSOE perdeu o apoio da "mocidade" por "non ter un discurso consecuente de centro esquerda". Para Vázquez, a formación está "a piques de pasar a unha posición marxinal ou dependendo de pactos ou coalicións que non lle son nada afíns". 

    Con todo, o ex alcalde da Coruña cre que "a traca final, a guinda do pastel" foi "non aceptar unha derrota electoral". "Acéptase dimitindo, asumindo responsabilidades políticas e permitindo que goberno o que máis votos tivo; e permitir non é participar do goberno", engadiu tras só conceder un detalle a Pedro Sánchez. "Nunha das poucas cousas que ten razón é en que os baróns non pode formar un poder paralelo", manifestou quen tamén lanzou duras críticas ao PSdeG e á formación local na Coruña. 

    "Non é que teñan que repensar a relación coas mareas, tiñan que telo pensado cando pactaron xa co BNG"

    "Non é que teñan que repensar a relación coas mareas, hai tempo que tiñan que ter pensado esas relacións como cando pactaron co BNG; daquela foi cando me distanciei do PSOE coruñés porque foi unha traizó ás súas ideas e ao seu discurso político", rematou Vázquez, que lembrou que o PSdeG "está en caída libre desde entón". "Na Coruña non gañaron nin unha soa mesa... Un partido que chegou a gañar en todas. Humedecíansem os ollos cando lía isto", finalizou. 

    Francisco Vázquez, nun mitin xunto a Moreda © PSOE

  • A xestora reitera a súa oposición a "dar o goberno ao PP" e pide aos críticos que sexan "claros"

    A comisión xestora do PSdeG emitiu un comunicado na tarde deste xoves no que insistiu na súa "lealdade e apoio" a Pedro Sánchez, "lexitimado polo voto directo da militancia". Ademais, reiteraron a súa "posición contraria a unha abstención que supoña dar o goberno ao PP e consentir a continuidade das súas políticas". "Ningún votante socialista meteu o seu voto na urna coa intención de permitir un goberno da dereita", lembran. 

    "Ningún votante socialista meteu o seu voto na urna coa intención de permitir un goberno da dereita"

    Malia as voces que, tamén no PSdeG, amosaron o seu apoio aos críticos e a súa posición contraria ao secretario xeral, a xestora galega considera "imprescindible o respecto ás normas do partido socialista" e pide "que sexan os órganos internos, mediante un Comité Federal, unhas primarias e un Congreso Extraordinario, os que acollan o necesario debate orgánico e político", tal e como propón o propio Sánchez.

    A xestora insta os críticos a que "dean un paso adiante e trasladen a súa posición con claridade e transparencia"

    "Deben ser as bases socialistas as que decidan co seu voto a continuidade ou o cambio de proxecto, tal e como recollen os nosos Estatutos. Pedimos que os compañeiros ou compañeiras que desexen un cambio na dirección federal dean un paso adiante e trasladen cal é a súa posición con claridade e transparencia", pide a xestora do PSdeG, que advirte ante a "militancia" do seu compromiso de "actuar con lealdade e tranquilidade" para que o partido "saia reforzado cunha voz única e común". 

    Pedro Sánchez e Pilar Cancela, nun mitin previo ás xerais CC-BY-NC-SA PSdeG

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza