O Goberno galego presenta como propio o Plan Corresponsables para actividades en bibliotecas e museos mentres estes admiten que as actividades están financiadas polo Estado
Despois de que a pandemia da COVID-19 deixase aínda máis en evidencia as dificultades de moitas familias para conciliar a vida laboral co coidado de fillos e fillas o Ministerio de Igualdad puxo en marcha o denominado Plan Corresponsables para impulsar todo tipo de recursos de conciliación para menores de 16 anos. Co financiamento do ministerio a Xunta vén de poñer en marcha campamentos de verán en bibliotecas e museos da súa titularidade de toda Galicia, pero está a presentalos como propios malia que os centros implicados admiten que as actividades forman parte do programa estatal.
A pasada semana os conselleiros de Cultura e Educación, Román Rodríguez, e Emprego e Igualdade, María Jesús Lorenzana, organizaron un acto de presentación da iniciativa na biblioteca Ánxel Casal de Santiago. As verbas empregadas polo Goberno galego tentaron presentar a iniciativa como propia, con expresións como que “a Xunta pon en marcha” o programa, que é unha “iniciativa impulsada ao abeiro dun convenio de colaboración” entre as dúas consellerías, que son actuacións que “Galicia está a desenvolver” ou que supoñen “un paso máis na implantación dunha visión integral das políticas públicas en materia de igualdade e de conciliación que desenvolve a Xunta, que opta por transversalizar numerosas actuacións para que cheguen da maneira efectiva á cidadanía”.
Nada di a Xunta no seu comunicado oficial sobre a orixe e o financiamento da iniciativa, do Ministerio de Igualdade. Porén, os propios centros culturais nos que se desenvolverá así o admiten. A propia biblioteca Ánxel Casal, na que os conselleiros presentaron o programa como propio da Xunta, sinala na súa web que o campamento cultural de verán que acollerá “forma parte do Plan Corresponsables, financiado polo Ministerio de Igualdad (Gobierno de España) en colaboración coa Consellería de Cultura, Educación, Formación Profesional e Universidades e a Secretaría Xeral de Igualdade”.
