O Sergas vén de adxudicar os últimos luminosos tras lanzar en marzo un concurso que tivo que reiniciar por intentar aceleralo de xeito ilegal e no que despois foi obrigado a readmitir a unha empresa eliminada

Tras anos de críticas de sindicatos e oposición pola “privatización” de servizos públicos, entre eles a sanidade, e do alcalde de Vigo, Abel Caballero, polo modelo público-privado de construción e xestión do novo hospital da cidade, o Goberno galego decidiu hai uns meses iniciar a compra de grandes carteis luminosos coa lenda “hospital público” para colocar en varios complexos sanitarios de toda Galicia. O Sergas vén de culminar agora ese proceso, ao que destina medio millón de euros e no que insistiu malia verse salpicado por todo tipo de atrancos.

Feijóo defendeu o custe dos letreiros dicindo que saen máis baratos que o soldo de alcaldes que menten

Foi a finais de 2017 cando a Xunta comezou a mercar carteis de “hospital público” para os seus centros sanitarios, destinando ata 150.000 euros a catro edificios da área sanitaria da Coruña. Malia as críticas recibidas, o Goberno galego decidiu o pasado marzo ampliar a iniciativa a outros dez centros de toda Galicia por outro medio millón de euros. O propio presidente Feijóo xustificou a iniciativa argumentando que máis caro que os carteis é o soldo de alcaldes que “menten”, en referencia, sen citalo, ao rexedor vigués e as súas críticas sobre a concesión do hospital da cidade.

O Sergas dera só 15 días para que as empresas interesadas lle fixesen ofertas cando por lei debían ser 35 e adiou informalas do estado do emprazamento dos rótulos ata despois de adxudicarlles o contrato

Pero ese proceso de contratación pronto comezou a rexistrar problemas. Malia establecer moi concretas condicións de visibilidade dos carteis, inicialmente a Xunta deu só 15 días ás posibles empresas interesadas para que lle formulasen ofertas, pero a lei establece un mínimo de 35 días para ese tipo de contratos, o que obrigou a rectificar e reiniciar o procedemento. Un concurso no que as empresas comunicaron que debido ao axustado dos prazos non tiñan tempo de poder visitar os dez hospitais para revisar o estado dos lugares onde se instalarían os carteis, polo que se solicitou á Xunta que informase ela mesma desa cuestión. O Goberno galego rexeitouno limitándose a sinalar, evidenciando novamente as súas présas, que “unha vez adxudicado o contrato e previo á montaxe dos rótulos poderase conseguir toda a información que sexa necesaria”.

Todos os contratos contemplan prazos de execución para a instalación dos carteis dun máximo de seis meses, polo que todos deberan estar colocados antes das eleccións autonómicas do próximo ano

Posteriormente, unha vez recibidas as ofertas, e no período de valoración das mesmas, a Xunta decidiu eliminar unha das empresas candidatas por considerar que non cumpría cos requisitos de solvencia técnica esixidos. A empresa recorreu e o tribunal administrativo de contratación deulle a razón obrigando á Xunta a volver a tela en conta no proceso. Ese parón nun dos catro lotes en que se repartiron os dez centros sanitarios non impediu que o Goberno galego seguise adiante coa adxudicación dos tres lotes restantes, que se produciu a comezos de agosto e cuxos contratos se formalizaron a finais de setembro. Agora, unha vez retomada a valoración de ofertas dese cuarto lote, o correspondente á área sanitaria de Santiago, tras a resolución do tribunal administrativo, o Sergas vén de adxudicalo tamén o pasado luns. 

Á espera da formalización dese último contrato, todos eles contemplan prazos de execución para a instalación dos carteis de “hospital público” nos dez centros sanitarios dun máximo de seis meses. Todos eles, polo tanto, deberan estar instalados antes das eleccións autonómicas do próximo ano.