As distintas mareas cidadás xurdidas en cidades e vilas galegas están convocadas o vindeiro sábado 4 de outubro a unha gran Marea municipalista para "atoparse, falar e poñer en común metodoloxías" de cara ás eleccións municipais de 2015, onde a aparición destas iniciativas cidadás promete cambiar o panorama electoral en numerosas localidades.
A Marea Atlántica propón un encontro entre os procesos que "perseguen unha confluencia liderada pola cidadanía e capaz de producir un cambio en maio de 2015"
É a Marea Atlántica da Coruña, primeiro dos procesos cidadáns en crearse e en validar mediante sinaturas a súa intención de se presentar aos comicios locais, quen propón "un encontro para dialogar e intercambiar ideas e experiencias con aqueles procesos" que, como o seu, "perseguen a construción dun proceso de confluencia liderado pola cidadanía capaz de producir un cambio nas institucións en maio de 2015".
Así o vén de anunciar nun comunicado o proceso cidadán da Coruña, que xa a principios deste mes de setembro chamara a crear un espazo de encontro e un ámbito de cooperación entre as diferentes mareas ante o desafío das municipais. O chamado vai dirixido a Ourense en Común, Marea Ártabra de Ferrol, Marea de Vigo, Marea de Pontevedra ou a Asemblea Cidadá de Compostela, ademais doutros movementos onde, como lembra a Marea Atlántica, "o esencial, ademais de deseñar un marco democrático de confluencia entre actores sociais e políticos, ten que ser a composición dun espazo amplo liderado polo protagonismo cidadán".
"O horizonte está cheo de esperanza pero introduce tamén desafíos e preocupacións que debemos abordar colectivamente"
"O horizonte que se abre está cheo de elementos para a esperanza e evidencia que o desexo de recuperar o poder municipal para a xente está en marcha. Con todo, o escenario introduce tamén desafíos e preocupacións que debemos abordar colectivamente, de forma honesta e transparente", propón a Marea Atlántica, que se refire fundamental a dous elementos de preocupación.
O primeiro deles é "a necesidade de garantir e potenciar o liderado cidadán e non partidario das iniciativas que están a agromar", algo no que sempre insistiu o movemento da Coruña, que naceu á marxe dos partidos e organizacións políticas e que puxo o alicerce cidadán e apartidario como base dunha iniciativa onde aquelas formacións que coincidan nos postulados e a apoien deben diluírse como cidadáns na Marea.
Os diferentes movementos buscan "garantir e potenciar o liderado cidadán e non partidario" das súas iniciativas
A outra preocupación son "as problemáticas derivadas do deseño institucional do Réxime, que baleira de competencias, e polo tanto de ferramentas de transformación, as administracións municipais". Por iso, a Marea Atlántica cre que "para canalizar a esperanza, analizar colectivamente as preocupacións e poñer en común metodoloxías é necesario atoparse e falar".
Entre as cuestións a tratar, ben seguro, estará a necesidade de procurar unha fórmula electoral que -no caso de compartir obxectivos e bases programáticas- permita a estas mareas non desaproveitar a súa forza nas deputacións, onde a lei electoral impón uns duros requisitos para poder xuntar a representación de diferentes candidaturas.
Así, os distintos movementos cidadáns están convocados a esta Marea municipalista que, en forma de encontro e obradoiro de traballo, se celebrará o vindeiro sábado 4 de outubro, de 11.30 a 18 horas na Coruña, nun lugar que aínda está por determinar.
O chamado coincide coa decisión case unánime de Somos Maioría de impulsar as candidaturas cidadás en toda Galicia
O chamado da Marea Atlántica e a intención de conformar un ámbito de cooperación común entre os diferentes movementos cidadáns coincide coa decisión maioritaria de Somos Maioría de confluír con estas diferentes iniciativas e impulsar as candidaturas cidadás, logo de que máis do 95% dos asinantes do seu manifesto apostaran por esta unión da esquerda alternativa nos concellos do país.
Á marxe das diferentes mareas creadas nas principais cidades, arredor da iniciativa Somos Maioría tamén naceron procesos de confluencia en localidades como Vilagarcía, Noia, Fene, Redondela, Noia ou Narón, entre outras.