Así recolleu Feijóo sinaturas contra o Estatut catalán

Feijóo, nun acto electoral na Coruña cando estaba na oposición CC-BY-SA PPdeG

En febreiro de 2006 Francisco Vázquez vivía os seus derradeiros días como alcalde da Coruña antes de ser enviado por José Luis Rodríguez Zapatero a Roma como embaixador ante a Santa Sede. Os socialistas afastaban así da política galega e española unha das súas voces máis discordantes, que durante os meses anteriores cargara con dureza contra a súa propia formación pola súa postura ante a reforma do Estatuto de Autonomía de Catalunya. "España no tiene quien la defienda", clamaba Vázquez ante un texto que lle producía "urticaria". A súa posición aliñábao por enésima vez co PP, que naqueles días comezaba en Galicia a súa recolleita de sinaturas contra o Estatut designar dúas semanas antes como líder a Alberto Núñez Feijóo.

Este luns, máis de nove anos despois daqueles acontecementos, o exalcalde coruñés colmou de eloxios o presidente da Xunta nun almorzo informativo no que ambos reeditaron algúns dos argumentos daquela recollida de sinaturas, a mesma que agora o propio candidato do PP catalán, Xavier Garcia Albiol, recoñece como un erro. Durante aquela campaña contra o Estatut o actual presidente non aforrou alertas sobre a suposta chegada dun Estado asimétrico, unha España "das nacións, máis insolidaria" que substituiría a "das autonomías".

Feijóo alertaba da chegada dun Estado "das nacións" nas que "un galego terá menos servizos públicos ca un catalán"

Ao pé dunha daquelas mesas, concretamente na de Santiago, Feijóo explicáralles aos xornalistas que agardaban recoller unhas 100.000 rúbricas só en Galicia. Moitas delas, afirmaba, procedían de "xente do Partido Socialista, deputados incluso, e os seus familiares". Tamén dalgún "nacionalista", abondaba. Porque a intención da recolleita era que non existisen "comunidades de primeira e de segunda" e que "un galego deba ter os mesmos dereitos que calquera cidadán español", e non "menos dereitos e menos servizos públicos ca un catalán".

O PPdeG enmarcou a campaña no proceso de reforma do Estatuto galego, da que se desmarcaría menos dun ano despois

"Hai un erro que se está a piques de cometer", avanzaba o daquela líder da oposición, o de "iniciar unha senda de asimetrías e desigualdades". El, "como galego", participaba na campaña porque "sempre que haxa un ataque aos intereses xerais de Galicia, estarei aí para dicir, tranquilamente e sen tremendismo, que non é adecuad que unha comunidade teña preponderación sobre outras".

Naquel momento o líder do PPdeG enmarcaba esta acción do seu partido, que culminaría cunha entrega das sinaturas -catro millóns, segundo Rajoy- no Congreso, no debate que na altura estaba aberto a respecto da redacción dun novo Estatuto para Galicia. O PP, sinalaba Feijóo, "podería parar a reforma do Estatuto" ao ser imprescindible o seu voto para aprobalo, pero a súa "seriedade" imedíalle facelo. "O PP vai facer un exercicio de responsabilidade, porque vemos que PSOE e BNG son incapaces de porse de acordo", afirmaba. Menos dun ano despois, en xaneiro de 2007, o desmarque de Feijóo facía descarrilar definitivamente unha reforma que o PP prometeu retomar ao volver á Xunta, algo que nunca chegou a acontecer.

Feijóo, con Rajoy nun acto electoral en Santiago en 2008 CC-BY-SA PPdeG

Despece

  • Paco Vázquez apela á coalición PP-PSOE e anima a Feijóo a "pasar Pedrafita" polo "ben de España"

    © Xoán Crespo

    Alberto Núñez Feijóo inaugurou este luns a semana das eleccións cataláns cun almorzo informativo en calidade de presidente da Xunta pero centrado, precisamente, en Catalunya. O xefe do Executivo galego presentouse como defensor da "moderación" ante o "radicalismo" que, di, representan gobernos municipais como os das mareas e, sobre todo, o "desafío que o independentismo catalán lle fai á democracia española". Ese papel de líder moderado ante o soberanismo outorgoullo tamén, se cabe con máis intensidade que el mesmo, o exalcalde da Coruña polo PSOE, Francisco Vázquez, que como eloxioso presentador do acto apelou a unha gran coalición entre socialistas e populares para facerlle fronte ao "separatismo".

    Vázquez "non ocultra" a súa "simpatía especial" por Feijóo porque "reúne de sobra as condicións que sempre considerei esenciais á hora de recoñecerlle a un político a súa capacidade de liderado", a saber, que é "un político de urnas" por gañar dúas eleccións autonómicas e por atesourar o que cualifica como "brillante traxectorai de xestor público". Ambas condicións, proclama o que fora embaixador de España ante a Santa Sede, fan que "a personalidade de Alberto Núñez Feijóo exceda e supere a súa condición de presidente da Xunta". O líder da dereita en Galicia é xa "un referente para moitos" e por iso o anima a saltar definitivamente á política estatal.

    Feijóo eríxese en líder "moderado" ante o "desafío do independentismo catalán á democracia española"

    "Nestes tempos procelosos que nos toca vivir" o exalcalde da Coruña recupera a figura de Alejandro Lerroux para explicar que, igual que o político dos anos 30 animou os republicanos coruñeses a "decidirse a pasar o río Monelos" para ser realmente "útiles á causa", Feijóo debe ter claro que "algún día haberá que pasar o porto de Pedrafita, sobre todo cando o esixa o ben de España". Feijóo, di Vázquez, deu abondosos exemplos de ser "leal" e no actual contexto político, ao seu xuízo, é xa "un dos mellores intérpretes do espírito da Transición que tanto nos urxe recuperar".

    Vázquez alerta dunha "emerxencia nacional" e sitúa a Feijóo como "un dos mellores intérpretes do espírito da Transición"

    Para Francisco Vázquez a súa eloxiosa presentación de Feijóo debe ter "valor simbólico". É toda unha "toma de posición política, unha mensaxe a uns e outros, sobre todo a outros". "Non dubido en cualificar de auténtica emerxencia nacional a situación que atravesa España", cun ataque "sedicioso" contra "a súa soberanía" ante o que non caben máis "inacción" nin "silencio", pero tampouco propostas para o "novo encaixe en España de identidades nacionais" ou "novas concesiósn. "Somos moitos cidadáns os que esiximos o pacto nacido do diálogo entre os dous grandes partidos" para "blindar así o único que debe estar blindado, o respecto á lei, a defensa da Constitución e a garantía de igualdade de todos os españois", proclama. A "unidade nacional" está "ao bordo do último toque de campá, no último asalto", alerta.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza