En Marea compromete a recuperación do plan de saúde mental "que Feijóo abandonou en 2009"

Luís Villares, con Concha Fernández (esquerda) e Flora Miranda, no hospital compostelán de Conxo CC-BY-SA En Marea

O hospital de Conxo, en Santiago, e o hospital Álvaro Cunqueiro, en Vigo. Foron os escenarios, este luns, da presentación do programa de En Marea en materia de sanidade. O candidato da formación á presidencia, Luís Villares, trasladouse xunto a candidata pola Coruña Flora Miranda e mais a edil compostelá de Políticas Sociais, Concha Fernández, ata o histórico centro psiquiátrico para comprometer a que vén sendo unha das principais demandas da oposición galega e de boa parte dos profesionais do sector sanitario nos últimos anos: a recuperación do plan galego de saúde mental que, acusan, o PP "abandonou" tras retornar ao poder en 2009.

"O noso país será máis saudable na medida en que tomemos en consideración a xustiza social e a eliminación da desigualdade", resumen, nun contexto no que, resaltan, "os profesionais constatan" as "serias repercusións" que tiveron os recortes nas persoas que sofren algunha enfermidade mental. Neste sentido, Miranda resalta o "incremento nos casos de suicidio" -a cifra do pasado 2015 foi a maior en 20 anos, segundo datos oficiais- fronte ao cal o PP "só asumiu un plan para a súa prevención a última hora e con afán electoralista". No entanto, di, "en oito anos desmantelouse o plan de saúde mental, co consecuente debilitamento de recursos na atención ás persoas máis vulnerables".

"O PP só asumiu o plan para a prevención do suicidio a última hora e con afán electoralista", reprochan

"Cómpren psicólogas, psiquiatras, enfermeiras e traballadoras sociais que traballen un modelo de atención integral e comunitario", di Miranda, nun contexto no que tanto Villares como a concelleira de Santiago resaltan tamén o papel da atención primaria neste tipo de doenzas. "Cómpre unha atención primaria digna, que exerza o seu papel de primeiro nivel de asistencia accesible, resolutivo e achegado ás persoas, especialmente no rural". O médico 'de cabeceira', indican, é  "vital na detección e abordaxe de patoloxía mental", que non é posible atallar se as consultas "están saturadas e as profesionais atenden corenta pacientes ao día".

O reforzo da atención primaria forma parte dun paquete de medidas entre as cales En Marea destaca tamén a "coordinación" do Sergas cos servizos socais, así como o enfoque específico para mullere vítimas de violencia machista. "Reforzaremos -aseguran- a dotación de recursos nas Unidades de Saúde Mental, que deberán coordinarse cos centros de saúde" e "crearase unha de atención á saúde mental infanto-xuvenil no sur de Galicia". Se a formación chega ao Goberno, manteñen, será desenvolvido o Plan de Atención ao Suicidio que reclaman organizacións como o Movemento Galego da Saúde Mental, e "valoraremos a dotación de unidades de psicoxeriatría", conclúen.

Luís Villares, con Concha Fernández (esquerda) e Flora Miranda, no hospital compostelán de Conxo CC-BY-SA En Marea

Despece

  • David Rodríguez: "Ourense será clave; o PP ten que baixar de 8 deputados para perder a maioría absoluta"

    Miguel Pardo

    David Rodríguez, número dous de En Marea por Ourense, coñece como poucos a provincia e os problemas do rural. Alcalde de Manzaneda durante anos, dá o paso á política autonómica convencido dun goberno alternativo en Galicia pero, tamén, de que os votos dos ourensáns serán clave na derrota do PP.  

    Como leva a campaña?

    Con moi boas sensacións, moitos quilómetros enriba e moitos lugares visitados, sobre todo no rural, onde nos atopamos cunha poboación e uns gandeiros desprotexidos. 

    "Non hai políticas concretas para a supervivencia do rural; desde a Xunta houbo un ataque directo á provincia"

    Como de desprotexidos?

    Non hai políticas concretas para a supervivencia do rural. Houbo un peche de servizos básicos brutal, con recortes en comunidades escolares, cando non peches directamente de colexios, ou diminución de servizos sociais como as axudas ao fogar ou a dependencia. Desde a Xunta houbo un ataque directo á provincia, ás zonas rurais e sei ben do que falo pola miña experiencia na alcaldía. 

    E pola contra, parece a provincia máis complicada para a esquerda e o cambio...

    É a máis complicada desde que temos un presidente de Deputación que ofrece traballo a cambio de sexo e o PP non toma medidas. É unha provincia difícil, xa non só desde o punto de vista político, senón pola súa dispersión e orografía. Por iso, pensamos que ten que haber discriminación positiva cara aos concellos do rural e a provincia en xeral. Non hai plan de emprego ningún para Ourense e en Melón aínda seguen a esperar pola planta aquela que prometera Feijóo, que non fai máis que promesas baldías. Non teñen plan para a provincia. 

    Teno En Marea?

    En En Marea o compromiso de Luís Villares e do resto de candidatos co interior e co rural é latente e claro. Apostamos por un plan para revitalizar o rural, un plan comercal e local que vai desde a prestación de servizos básicos elementais ata blindar os que xa hai e mesmo ampliar os que se acaban de pechar. Temos unha política específica para a alta montala e temos que cambiar a lei de montes para que a veciñanza participe nas decisións. Temos moi detectados os problemas porque fomos moitos os que os vimos de perto. 

    "Os votantes do PP non son cómplices da corrupción, cómplices son os que fan algo mal e non dimiten ou os dirixentes que non os fan dimitir"

    Non é difícil oír que votar o PP é lexitimar a corrupción e que o feito de que aumente o seu apoio en provincias como Ourense supón ser cómplice de actitudes como as que denuncian de Baltar. 

    Non estou de acordo. En democracia as persoas votan polos programas que ven ou cren máis interesantes. Cómplices son aqueles que fan algo mal e non dimite ou aqueles dirixentes que non os fan dimitir. Respecto todos os votantes e os culpables son os que prevarican e non dimite ou os que apoian estes candidatos sen esixirlles responsabilidade ningunha. 

    Que valoración fai das últimas enquisas?

    Como ben dixo o noso candidato Villares, hai pratos quentes, pratos precociñados e logo están as enquisas. Hai partido e temos moitas posibilidades de arrebatarlle a maioría absoluta ao PP e o día 26 teremos a Luís Villares de presidente da Xunta. Vimos de procesos municipais onde todos o mundo nos daba por perdido e fomos capaces de sacar o PP do poder en moitos lugares. 

    "O PP ten que baixar a sete deputados en Ourense porque, de quedar con oito, non poderemos quitarlle a maioría absoluta"

    Cre que a provincia de Ourense pode ser clave no resultado final, como aventuran algúns inquéritos?

    A provincia de Ourense será clave. O PP ten que baixar a sete deputados porque, de quedar con oito, non poderemos quitarlle a maioría absoluta. Tamén cre que ocorre o mesmo en Lugo. Os resultados das dúas provincias serán a clave nestas eleccións. 

    Pase o que pase, Villares insiste en fortalecer En Marea para o futuro, en convertela nunha referente aínda máis ampla da esquerda e do nacionalismo en Galicia. 

    Desde a asemblea do pasado 30 de xullo quedou clara a necesidade de confluír, de que esa era a única fórmula de botar o PP das institucións. Verémolo tamén este 25-S. A fórmula comezou xa con AGE, logo viñeros numerosos procesos municipais e agora temos En Marea. A fórmula é a axeitada porque temos que aglutinar xente da esquerda, do nacionalismo e do republicanismo para facer unha fronte común e ir de fronte contra o PP, contra ese partido que esquilma os nosos recursos a favor das grandes empresas. 

    David Rodríguez © En Marea

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza