Expedientados dous edís coruñeses do PSdeG por defender a "transparencia urbanística"

Pleno municipal no Concello da Coruña © Concello da Coruña

Estoupou no pleno municipal de xaneiro, pero a división na agrupación do PSdeG na capital coruñesa vén de atrás. A perda da condición de forza máis votada e do goberno municipal, tras a maioría absoluta acadada polo PP nas eleccións municipais de 2011, obrigou o partido a promover unha renovación do seu grupo municipal que significou a entrada na cámara de Jesús Fernández e Gloria del Valle, os concelleiros agora expedientados. Foi precisamente Jesús Fernández quen encabezou, hai só uns meses, a candidatura alternativa –na cal tamén participaba Del Valle– que lle disputou a secretaría xeral a Mar Barcón, actual voceira municipal quen finalmente saiu electa por unha ducia de votos de diferenza.

Os dous concelleiros expedientados defenderon o voto favorable do PSdeG á moción presentada polo BNG na que se pedía a investigación de posibles irregularidades na urbanización de Someso

Os dous concelleiros expedientados defenderon o voto favorable do PSdeG á moción presentada polo BNG na que se pedía a investigación de posibles irregularidades na urbanización de Someso, un caso que ten a súa orixe hai case un cuarto de século, cando o Concello da Coruña expropiou uns solares para a futura construción dun campo de fútbol para o equipo da popular zona de Elviña, o Relámpago. Finalmente, onde debería haber unha instalación deportiva acabouse por levantar un centro comercial ademais de vivendas, no que moitos viron como un claro pelotazo urbanístico.

Os edís rebeldes apostaban pola posta á disposición da Xustiza de todos os datos que constan no Concello e –chegado o caso– a depuración de responsabilidades políticas, ademais das xudiciais. Finalmente, o grupo municipal socialista decidiu absterse, de xeito que a moción foi rexeitada cos votos en contra do PP. Mais os dous concelleiros agora expedientados decidiron ausentarse da votación, para mostrar o seu rexeitamento á decisión do partido, sen porén quebrar a disciplina de voto do grupo.

Contactados por Praza, nin Jesús Fernández nin Gloria del Valle confirman ou desmenten a apertura do expediente disciplinario e remítense á agrupación local coruñesa, que tampouco quixo entrar en detalles, se ben transcendeu á prensa local coruñesa que o proceso interno está en marcha. No entorno dos edís sublíñase que ambos están dispostos a insistir na súa postura en defensa da rendición de contas dos cargos públicos e da renovación dun partido que consideran copado por "profesionais da política" e lastrado pola herdanza dos tempos de Francisco Vázquez como alcalde. Precisamente a figura de Vázquez e a posición de revisión crítica ou de defensa a ultranza da súa xestión é un dos elementos de división no PSdeG coruñés.

O desenlace do expediente dependerá da súa tramitación interna nos organismos do PSOE a nivel provincial, nacional e finalmente federal, e podería concluír coa expulsión dos dous concelleiros e a petición de entrega das actas que hoxe ocupan no pleno coruñés.

Pleno municipal no Concello da Coruña © Concello da Coruña

Despece

  • "O goberno local, se quere, pode formular unha querela identificando os responsábeis e tipificando os delitos"

    O coñecido como caso Relámpago foi obxecto dun informe elaborado por dúas técnicas municipais que chegou ao pleno do consistorio o pasado xaneiro. Nese informe sitúase Francisco Vázquez como un dos responsables directos do caso dos terreos, nos que o actual goberno local modificou a planificación urbanística para permitir un maior aproveitamento aos promotores. Foi neste contexto no que o BNG reclamou que o propio Concello iniciase accións pola vía penal por un caso que, segundo as fontes, puido ter un prexuízo de até uns 50 millóns de euros para as arcas municipais polos supostos erros do gabinete de Francisco Vázquez.

    Esta mesma semana, e apenas vinte días despois de recibir o informe das técnicas municipais, a Fiscalía da Coruña decidiu arquivar o caso por non apreciar posibles delitos, se ben o percorrido non remata aquí. O BNG local xa remitiu a documentación ao Tribunal de Cuentas nun contexto no que ademais o seu voceiro no Concello, Xosé Manuel Carril, advirte o alcalde, Carlos Negreira, de que "non se trata dunha decisión discrecional, senón de obrigado cumprimento, a revisión dos actos e acordos ilegais" de Someso, "até o punto de que, de non o facer, podería estar incorrendo nunha prevaricación omisiva".

    Do mesmo xeito, os nacionalistas coidan que, "no canto de laiarse e criticar a Fiscalía polo arquivo" do caso, o goberno local "pode formular, se quere, querela criminal, identificando os responsábeis e tipificando os delitos. Se a fiscalía resolveu arquivar a denuncia do goberno municipal foi polo simple feito de que no escrito remitido desde o goberno nin se precisaba a identidade dos responsábeis nin se concretaban cales eran os delitos, tal e como advertira o BNG", afirman.

    Tamén Esquerda Unida censura a actuación de PP e PSOE neste caso. O seu voceiro no concello, César Santiso, considera "inaudito" que "se pretendan achacar a erros administrativos os 19,2 millóns de euros de perda patrimonial do concello que desencadearon as sucesivas eivas das que saíron favorecidos promotores como Antonio Fontenla, así como diversas familias coruñesas". "A actuación da Fiscalía –di Santiso– vén confirmar o que xa denunciamos, o PP mandou redactar un informe coa intención de que o caso fose arquivado" e agora mantén unha actitude "hipócrita" que, ao seu xuízo, "vén demostrar o pacto táctito entre PP e PSOE para que non se depuren responsabilidades".

    Carril amosa unha iniciativa sobre Someso CC-BY-NC-SA BNG

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza