A nacionalista pregunta ao presidente pola situación da atención primaria e obtén como resposta que o BNG non debe empregar o topónimo Galiza

Sete minutos exactos pasaron entre as dúas frases. Na súa primeira réplica na sesión de control á Xunta deste mércores no Parlamento de Galicia á portavoz do BNG, Ana Pontón, que lle preguntaba polos problemas da atención primaria, o presidente Feijóo gabouse da súa lonxevidade política: “Eu xa viña por aquí como alto cargo da Consellería de Sanidade nos anos 90”. Dez minutos despois o mesmo Feijóo reprochaba a Pontón que “no mes de febreiro vostede cumpre 18 anos de deputada na Cámara”.

A pregunta de Pontón a Feijóo deste mércores, tras enumerar diversas eivas da sanidade que están a quedar en evidencia nas últimas semanas, foi directa: “Que pensa facer ante o colapso da atención primaria?”. Porén, a nacionalista adornouna previamente dicindo que unha busca en Google sobre os problemas sanitarios en “Galiza” ofrecía máis dun millón de resultados. O recurso retórico foi empregado polo presidente para dedicar parte dos tres minutos que tiña para responder en criticar que a nacionalista debera facer as buscas en Google co termo “Galicia” xa que “Galiza non é o nome de Galicia”, malia que os dous topónimos teñen a mesma validez lingüística. 

A continuación, restando novamente tempo á resposta que debía dar sobre a atención primaria, o presidente dixo a frase de que el xa ía polo Parlamento nos 90 como alto cargo de Sanidade e no BNG “xa estaban así”, criticando a privatización da sanidade galega. Na súa segunda intervención Pontón dixo que ao presidente “sóbralle soberbia e fáltanlle propostas”, pero a resposta que obtivo de Feijóo foi a de afearlle que leve 18 anos como deputada, “18 anos sobre o mesmo, a mesma pancarta, o mesmo discurso”.

Feijóo di que os galegos son máis responsables que a maioría do resto de rexións europeas

Sobre a cuestión que se lle preguntaba, a da situación da sanidade, o foco de Feijóo foi lamentarse de que non atopa médicos, do que vén culpando ao Goberno central. Pero que a pandemia en Galicia tivo menos efecto grazas a que os galegos son máis responsables que o resto de pobos europeos: “En Galicia a pandemia se xestionou polos profesionais sanitarios e pola responsabilidade dos galegos moito mellor que na maioría das rexións europeas”.