Despece

• Pachi Vázquez: "Feijóo traizoa a Galicia, defende o PP e non a cidadanía galega"

  Feijóo "traizoa" a Galicia. É a conclusión que o candidato do PSdeG á Presidencia da Xunta, Pachi Vázquez, tira da actitude do presidente e aspirante á reelección nos últimos días en relación ao Goberno central. Tanto en relación aos Orzamentos Xerais do Estado como especialmente este martes na Conferencia de Presidentes, Vázquez coida que o líder conservador "engana e traizoa a este país" e, ademais, "renuncia a unha Galicia distinta e competitiva", xa que apoiar as segundas contas públicas de Mariano Rajoy é sinónimo de facer o propio cun "recorte das pensións, un alongamento do período de cotizacións e unha política que renega da creación de emprego", augura.

  No marco dunha visita ás Pontes, onde visitou a lagoa creada sobre o antigo xacemento mineiro antes de manter unha xuntanza con empresarios, o candidato socialista amosouse convencido de que a "decisión" a tomar nas eleccións do 21 de outubro está intimamente ligada co apoio do actual presidente ao Goberno central. "Cando decidamos quen goberna este país, cada apoio a Feijóo e Rajoy é un apoio contra as pensións, contra a sanidade e a educación dos galegos". Pola contra, afirma, "cada apoio ao PSdeG é un apoio para o futuro, o crecemento e o emprendemento".

  Neste sentido Pachi Vázquez lamenta tamén que Feijóo non sexa quen de traer de Madrid máis fondos dedicados ao emprendemento, materia que, afirma, perdeu "un 58%" en Galicia dende o retorno do PP á Xunta. Nesta situación tampouco axuda o Instituto Galego de Promoción Económica (Igape), dependente da Consellería de Industria, di. Ao seu xuízo, este organismo "de pouco vale cando financia un crédito que nunca chega". No seu lugar, propón, os socialistas apostan por crear un instituto de crédito e finanzas que apoie as pequenas empresas.

  

• Guillerme Vázquez: "Feijóo foi lucir 'palmito', non defender a Galiza"

  O portavoz nacional do BNG, Guillerme Vázquez, botou este martes man da retranca para valorar a participación de Alberto Núñez Feijóo na Conferencia de Presidentes, unha xuntanza "precedida de actitudes molestas e críticas por parte de presidentes pepeiros de Valencia, Balears e Aragón" mentres "Feijóo se amosou compracente e conforme co orzamento para Galiza". Esta, di o líder nacionalista, é unha actitude que amosa ás claras que Feijóo acode a citas como a conferencia "a pasear e lucir palmito" pero "non a defender os intereses de Galiza". "Temos un presidente olímpico, porque pasa olimpicamente de todo", ilustra.

  No marco dun coloquio coa veciñanza do Burgo, nas proximidades da Coruña, Guillerme Vázquez amosouse convencido de que ao líder conservador "lle dá igual" que "se reduzan en case 400 millóns de euros as partidas para o territorio galego", "como lle deben dar igual as cifras do paro", xa que, pregúntase, "que fixo por reducir as altas taxas de paro de Galiza? Ás vistas dos resultados está claro, non fixo nada", di. Neste contexto enmarca o nacionalista que Feijóo "nos intentase colar unha co dos contratos de Pemex, que parecía que remataba con todo o paro o do sector naval" pero "resulta que era todo fume", conclúe.