O TSXG rexeita de vez o certificado COVID da Xunta para entrar na hostalería

Local de hostalaría, coa terraza recollida durante a pandemia CC-BY-SA Xunta

O  Tribunal Superior de Xustiza de Galicia (TSXG) denega definitivamente a esixencia de presentar certificado COVID para entrar na hostalería e no lecer nocturno. O TSXG rexeita así autorizar xudicialmente que estes locais teñan a obriga solicitar esta acreditación á clientela para entrar nos interiores, unha medida que levaba vixente xa varias semanas. 

Así o fixo público o Superior na mañá deste sábado, no que anunciou a parte dispositiva dun auto cuxo contido íntegro se dará a coñecer nos vindeiros días. Queda agora por ver cal será a decisión da Xunta, logo de que no DOG publicado na noite do venres decidise priorizar manter hostalería aberta, coas mesmas restricións que ata agora e sen necesidade de certificado COVID, á espera de que o Tribunal Superior de Xustiza de Galicia (TSXG) o avalase. Pero non o fixo. 

O Goberno galego ratifica no DOG que bares, restaurantes e lecer nocturno estaban exentos de pedir esta acreditación polo momento, logo de que a TSXG decretase o xoves que carece de vixencia por non ter solicitado a Administración a súa autorización xudicial. Con todo, o mesmo DOG establece un plan B no que aclara que se antes non houbese un pronunciamento xudicial a favor, o martes procederíase á redución da capacidade e mesmo ao peche de establecementos nos concellos cos niveis máis elevados de incidencia da COVID. 

Hostalería e lecer nocturno pasarán a ponte sen pedir o certificado COVID, pero a ausencia de aval xudicial aboca a Xunta a reducir capacidades e pechar locais

Xa que logo, durante a ponte --o luns é San Roque e é festivo en moitas localidades galegas-- e desde o pasado xoves, non será necesario amosar o certificado COVID de vacinación ou recuperación para entrar na hostalería. Tampouco o será a partir do martes, pero a Xunta anunciou que nese caso aumentará as restricións a non recibir o aval da xustiza. 

De non cambiar a súa intención, a Xunta procederá a reducir capacidades máximas e mesmo a pechar locais. Mentres, continuará coas actuais restricións pero sen necesidade de pedir o certificado COVID. 

Un home amosa o seu certificado COVID CC-BY-SA Praza Pública / Cedida

Así, a partir do martes --e tendo en conta o publicado no DOG este venres-- nas localidades con nivel máximo de incidencia (na actualidade só O Grove) pasarase de autorizar a apertura do 30% do interior dos locais a pechalos. No caso do nivel alto (no que permanecen todas as cidades agás Santiago e Ourense), a hostalaría pasaría do 50% con certificado a 30% sen certificado. No caso do lecer nocturno, a capacidade máxima dentro dos locais nos niveis medio e medio baixo (nos dous de máis incidencia do virus os interiores dos pubs están pechados) modificaríanse do 50% con certificado ao 30% sen certificado. 

Ao non haber aval xudicial ao certificado COVID, nos municipios con nivel máximo pecharán o interior da hostalería; en nivel alto, pasarase do 50% ao 30% de capacidade

A Xunta intenta aclarar esta última decisión no seu intento de "non causar un mal maior nin ao sector, nin sobre todo á poboación, que coñecía e manexaba unhas normas que agora van cambiar", polo que establece "un tempo razoable" para a súa correcta difusión e coñecemento, que leva a fixar a entrada en vigor das novas normas ás 00.00 horas do martes, no caso de que o TSXG non ratificase o luns as medidas remitidas este venres.

O Goberno galego presentou o pasado venres ante o TSXG a solicitude de autorización xudicial  --que a Fiscalía ve "precedente" que se dea-- para poder esixir o certificado COVID para entrar nos locais de hostalería nos concellos con niveis alto e máximo de incidencia do coronavirus e no lecer nocturno nos municipios en nivel medio e baixo. Fíxoo cando a medida xa entrara en vigor hai semanas malia que, en realidade, carecía de validez legal por non ter sido aprobada polo TSXG. 

Feijóo insistiu en que se o seu Executivo non presentara a solicitude de aval a esta medida antes porque entende que xa está avalada pola lei de saúde autonómica sen necesidade de recorrer previamente á xustiza. 

De feito, o presidente da Xunta asegurara xa na mañá deste venres que no escrito presentado ante o TSXG acreditábase que a reformada lei de saúde "lexitima" a comunidade para establecer a medida sen precisar do aval xudicial. "Fixémolo por varios razóns: primeiro porque a maioría de países europeos o están facendo; segundo porque máis do 70% da poboación galega ten a pauta completa de vacinación; e terceiro, porque nos parece a forma máis segura para axudar á hostalería a trabllar sen limitacións e tamén para consumir en locais de localidades con incidencias altas", aclarou

Unha traballadora dun local de hostalaría Dominio Público UGT Galicia

Con todo, xa advertiu de que no caso de que o Superior non avalase a medida, poderían volver os peches de bares e restaurantes, como así especifica o DOG agora. "Hai municipios con prevalencias moi altas onde, de non poder esixirse o certificado COVID, están ante o risco de ter que pechar o interior da hostalería", asegurou. "Non ten sentido que só esteamos vacinando para coller un avión; estamos ante unha lagoa leal, unha ausencia de lei estatal e por iso as autonomías damos botes dun lado para outro", rematou. 

Máis de 1,5 millóns de certificados COVID emitidos

Na mesma xornada, a Xunta tamén emitiu un comunicado no que se gababa de "afrontar a nova onda da covid con solucións innovadoras axustadas á situación epidemiolóxica actual", entre as que destaca "o uso do certificado COVID para o acceso a interiores". 

Así, o Goberno galego destacou que xa ten emitido máis de 1,5 millóns de certificados COVID: 1.505.038 de vacinación, 30.465 de resultado de proba diagnóstica e outros 20.616 acreditativos de ter superado a enfermidade.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.