Pachi Vázquez non se presentará ás primarias do PSdeG

Pachi Vázquez, secretario xeral do PSdeG CC-BY-NC-SA PSdeG

O secretario xeral do PSdeG, Pachi Vázquez, vén de anunciar este venres que non se presentará ás primarias consultivas do partido previstas para o vindeiro 7 de setembro. A tan só uns días de que se abra o proceso para xuntar os avais, o aínda líder do socialismo galego asegura que non será un dos candidatos, logo de meses de incerteza.

Pachi Vázquez di que tomou a decisión de non presentarse "na mesma noite electoral"

A decisión adoptouna, segundo dixo, "na mesma noite electoral" das eleccións autonómicas de outubro do ano pasado e xa llela comunicou a todos os cargos a través dunha carta. Pachi Vázquez confirmou que seguirá traballando "como militante de base" e que esgotará a lexislatura como deputado, logo de presentar as primarias consultivas ás distintas agrupacións socialistas das catro provincias. Ademais, aclarou que manterá a neutralidade no proceso.

A negativa de Pachi Vázquez a concorrer ás primarias deixa o camiño libre a Gómez Besteiro, que recibiu xa o apoio de José Blanco, Francisco Caamaño e o colectivo Novo Socialismo Galego, algo que, segundo Pachi Vázquez, non influíu na súa decisión.  O ex ministro de Fomento reafirmouse este xoves -logo de ser arquivada a causa contra el polo caso Campeón- na súa decisión de retirarse da primeira liña política, de non presentarse ás primarias consultivas do PSdeG e de apoiar o presidente da Deputación de Lugo, ao que lle trasladou a súa intención de se converter no seu "primeiro avalista".

Blanco pretende ser "o primeiro avalista" de Besteiro e coincide con Caamaño na idea dunha candidatura de integración

Besteiro expresou a súa satisfacción logo de que José Blanco lle comunicase o seu apoio "para o proxecto de renovación do PSdeG", así como "o seu desexo de asinar o primeiro aval a favor da súa candidatura o vindeiro luns 22, no momento no que se abra o proceso".

O ex ministro e secretario provincial do PSdeG na Coruña, Francisco Caamaño, celebrou tamén o apoio de Blanco a Besteiro e dixo alegrarse de "coincidir" con el na "aposta pola integración" a través da unión arredor do líder da formación en Lugo para se converter no vindeiro secretario xeral do partido. "Blanco é un referente fundamental do socialismo galego; se neste momento entende que a aposta pola interación é o mellor camiño a seguir, como entendemos outros, alégrome de coincidir", dixo.

Novo Socialismo Galego ve no acordo arredor de Besteiro a posibilidade de "poñer fin ao sectarismo desta etapa no PSdeG"

A integración, xa que logo, semella feita. A plataforma Novo Socialismo Galego decidiu tamén sumarse aos apoios de Besteiro e confirma que non intentará presentar candidatura propia á consulta que se celebrará o vindeiro 7 de setembro. O ex alcalde de Fene e un dos principais integrantes desta corrente ve neste acordo co secretario provincial de Lugo o obxectivo de "poñer fin ao sectarismo desta etapa que conclúe e pacificar o PSdeG" cunha aposta polos "valores tradicionais do socialismo e do galeguismo".

Entre as máis de 250 sinaturas que apioaron o manifesto de Novo Socialismo Galego figuran outras importantes figuras do PSdeG como  Xaquín Fernández Leiceaga, Antón Louro, Mar Barcón, José Manuel Lage Tuñas ou Guillermo Meijón.

Ademais de Besteiro, o único dirixente socialista que parece disposto a presentarse ás primarias é o alcalde da Illa, Manel Vázquez, que intentará xuntar os máis de 1.000 avais exixidos e que di estar en contra dos pactos.

HABERÁ AMPLIACIÓN

Pachi Vázquez, nunha comparecencia ante a prensa CC-BY-NC-SA PSdeG

Despece

  • Besteiro valora que Pachi "asumise o liderado do PSdeG en tempos difíciles"

    José Ramón Gómez Besteiro, presidente da Deputación de Lugo e aspirante á secretaría xeral do PSdeG, destaca que Vázquez “asumiu a responsabilidade de ser o secretario xeral en tempos difíciles” polo que “é xusto recoñecelo”, e afirma que “agora o PSdeG inicia unha nova etapa como única alternativa crible de goberno para a maioría social deste país”

    O secretario xeral do PSdeG lucense reaccionou así ao anuncio realizado por Pachi Vázquez de non presentarse ao proceso de elección para a renovación do PSdeG e cualificouna como “unha decisión tomada desde a responsabilidade e a lealdade ao partido como secretario xeral”.

    “Pachi Vázquez comparte que agora mesmo é necesario un proceso de renovación que nos vai permitir volver conectar coa cidadanía e facer fronte mellor aos gobernos da dereita máis reaccionaria dos últimos anos, e que o seu lugar nese proceso de renovación debe ser outro diferente ao seu actual cargo”, afirma Gómez Besteiro.

    Besteiro insisten en que Pachi “asumiu a responsabilidade de ser o secretario xeral en tempos difíciles” polo que “é xusto recoñecelo”, e agora “tamén demostra ser responsable e consciente, ao querer achegar á recuperación do PSdeG desde outra posición distinta á de secretario xeral”, engade.

    “Como militante que son, agradézolle o seu labor ao fronte do partido durante estes anos. Agora o PSdeG inicia unha nova etapa na que a militancia é a dona do destino do partido para que, sexa quen sexa o novo secretario xeral e a nova Executiva, volvamos ser o que sempre fomos: a única alternativa crible de goberno para a maioría social deste país”, rematou Besteiro.

    Besteiro, durante unha entrevista con Praza Pública CC-BY-SA Praza Pública

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza