Pedro Sánchez abriu na tarde deste venres na Coruña a precampaña galega das próximas eleccións municipais. O presidente do Goberno de España acudiu ao acto de presentación da candidata socialista á reelección na alcaldía da cidade, Inés Rey, no que contou coa presenza de numerosas figuras do partido, con moitos alcaldes e candidatos á alcaldía de toda Galicia e cos rexedores e rexedoras das cidades en primeira fila.
Antes, Sánchez levou a cabo unha visita ao Centro de Coordinación de Salvamento Marítimo
da Coruña e ao remolcador SAR Gavia do porto coruñés, compañado polo novo delegado do Goberno de España en Galicia, José Ramón Gómez Besteiro, ovacionado logo durante o acto electoral.
"Haberá cambio en Galicia e será liderado polo Partido Socialista", augurou Sánchez respecto das eleccións autonómicas
Nel, nun ateigado recinto, o PSdeG sacou músculo, asegurou a vitoria socialista nas eleccións municipais, ao igual que fixo Pedro Sánchez, que augurou a vitoria tamén o 28M e, ademais, "en todas as cidades" e que mirou máis aló, xa de cara ás autonómicas e tras as xerais: "Haberá cambio en Galicia e será liderado polo Partido Socialista".
Sánchez presumiu dos datos económicos de España e asegurou que os socialistas "xestionan moito mellor a economía" porque pensan "no interese social e na maioría social". Así, defendeu a reforma laboral e "a maior política de vivenda da historia" do Estado. Tamén dedicou boa parte da súa intervención á "emerxencia climática" e á necesidade de actuar contra os problemas derivados como a seca, as inundacións ou "os incendios que sofre Galicia". "Tanto ou máis perigoso é isto como ter políticos negacionistas por acción ou omisión... E iso é o que temos na dereita e na extrema dereita", engadiu.
Sánchez defendeu a "cohesión territorial" e a "descentralización" de institucións do Estado e fixo especial fincapé na "emerxencia climática"
Ademais, defendeu a "cohesión territorial" e a "descentralización" de institucións estatais, celebrando que A Coruña fose elixida sede da Axencia Española de Supervisión da Intelixencia Artificial (Aesia). Tamén lembrou que a rebaixa da AP-9 permitiu aforrar aos galegos "3,5 millóns de euros ao mes" e advertiu dos avances sociais do seu Executivo malia ter que xestionar unha pandemia ou sufrir os efectos dunha guerra. "Imaxinádevos cando sopre o vento a favor", dixo.
Respecto a Núñez Feijóo, líder do PP estatal e ex-presidente da Xunta, censurou o seu "nivel". "Ou lle queda grande ou o colle moi lonxe; coa súa marcha a Madrid gañastes os galegos pero perdemos o resto", aclarou.
"Os alcaldes e alcaldesas socialistas sempre fostes un exemplo no partido", aclarou logo, para destacar o carácter claramente "municipalista" do PSdeG.
Pola súa banda, Inés Rey, asegurou que o Goberno de Sánchez está a "suplir" a ausencia de investimentos e proxectos en Galicia por parte de anteriores executivos populares e da Xunta do PP na Coruña.
"Cero vivendas e cero políticas de vivenda por parte da Xunta", lembrou a alcaldesa, que aventurou que volverá gañar os comicios nunha urbe que, dixo, "recuperou o orgullo e a ambición necesaria". "Demos unha volta completa á cidade, máis amable, máis humana, con mobilidade sostible e pensada para as persoas", engadiu. Pero sempre, advertiu, priorizando "a protección social para non deixar ninguén atrás".
Antes, o líder dos socialistas galegos, Valentín González Formoso, definiu a Pedro Sánchez como "galego, moi galego" polo seu compromiso co "país", que exemplificou nas rebaixas das peaxes da AP-9, nas "pensións dignas" para milleiros de cidadáns ou na chegada da alta velocidade. E contrapúxoo a presidentes galegos, en referencia a Rajoy, ao que censurou o escaso compromiso coa comunidade autónoma.
Formoso, ademais, prometeu que Galicia "volverá ser socialista nas próximas eleccións municipais" porque "o PSdeG volverá gañar as eleccións locais no país".
