O que pola mañá se descartaba, pola noite acabou sendo unha certeza. O presidente da Generalitat defenderá este venres a declaración de independencia se antes non chega a oferta do Goberno central de retirar o 155. Puigdemont tentou conseguir este compromiso a cambio de convocar eleccións pero finalmente as negociacións fracasaron. Tras as comparecencias dos grupos no Parlament, a declaración de independencia dáse por feita.
Puigdemont este xoves pola mañá estaba disposto a pagar o custo de romper o xa moi fráxil bloque independentista e aparecer como un traidor a ollos dunha boa parte do electorado secesionista. A mediación do lehendakari Iñigo Urkullu, as presións empresariais e os esforzos de dirixentes do PSC deron resultado e, entre o mércores e o xoves, o president deu en acceder a unha convocatoria electoral.
Puña tres condicións, que comezaban pola liberación de Sànchez e Cuixart e a desmobilización dos corpos policiais en Catalunya, pero que poderían quedar na terceira: o compromiso de que o Goberno retiraba o 155. Segundo explican fontes gobernamentais, Mariano Rajoy mostrouse disposto a cumprir a terceira, que sería dabondo para que Puigdemont esquecese a declaración de independencia. "Vante entanar como sempre nos enganaron", advertiu Oriol Junqueras cando o president llo comunicou. A pesar do cal, este seguiu adiante.
Puigdemont chegou á conclusión de que as presións externas imposibilitaran o pacto e que Rajoy quería que o paquete de medidas do 155 chegase, polo menos, ao Senado
A aposta polas eleccións foi anunciada polo president aos seus consellers e aos deputados de JxSí ao fío do mediodía. O pacto con Moncloa dábase por feito e xerou un fondo enfado en diversos sectores independentistas, entre eles os seus socios de ERC. Pero en cuestión de media hora, Puigdemont chegou á conclusión de que as presións externas imposibilitaran o pacto e que o Goberno quería que o paquete de medidas do 155 chegase, polo menos, ao Senado.
En só unhas horas o president cambiou a estratexia: de estar disposto a disolver o Parlament e convocar uns comicios para o mes de decembro a deixar que a Cámara catalá aprobe a independencia en forma de proposta de resolución. A non ser que as reticencias dalgúns deputados do PDeCAT a votar unha DUI tornen nun novo xiro inesperado na convulsión permanente na que se instalou a política catalá. Como xa case todo neste escenario, non é tampouco descartable.
Propostas de resolución
Junts pel Si e a CUP negociarán o texto que finalmente se deberá someter a votación este mediodía. A negociación dura chegará pola mañá, pero ao finalizar a sesión do xoves xa chegaran a algúns acordos tácitos, como que houbese máis dunha proposta de resolución, entre as que se contempla unha que active a lei de transitoriedade. De todos os xeitos no Govern recoñecen que cunha Generalitat intervida e con todo o Gabinete cesado será altamente imposible activar calquera estrutura de Estado.
Uno dos debates é se a resolución debe conter unha declaración formal de independencia ou erguer a suspensión da anterior sesión
Un dos debates entre PDeCAT, ERC e a CUP no Parlament é sobre se a resolución coa que se declare a independencia debe conter unha declaración formal ou se debe limitarse a levantar a suposta suspensión imposta na anterior sesión. "É imposible levantar unha suspensión de algo que non está aprobado", aseguraba un deputado este xoves. Outros, en cambio, decántanse por manter o relato comezado por Puigdemont cando asegurou que anulaba os efectos dos resultados do 1-O.
Falta por ver se a oposición tentará frear unha votación deste tipo, e o como. Os deputados independentistas temen unha sesión longa e crispada como a que se viviu nos días 6 e 7 de setembro.
Puigdemont, preocupado
Puigdemont non ten intención de intervir no pleno, aínda que fontes próximas ao president aseguran que non hai que descartar que acabe tomando a palabra. Na súa comparecencia do xoves deixou en mans do Parlament a decisión, convencido de que as medidas do 155 serán tomadas de todos os xeitos. Que Puigdemont non interveña indica que, esta vez, si parece que o Parlament aprobará un documento oficial. Esta por ver canto se parecerá a unha declaración de independencia.
Ao president preocúpao a tensión que pode haber na rúa cando se aplique o 155 e a fractura que poida desencadear na sociedade catalá.
Ao president preocúpao a tensión que pode haber na rúa cando se aplique o 155 e a fractura que poida desencadear na sociedade catalá. Así o deixou entrever en reunións con membros do seu goberno e en conversacións coas entidades independentistas. Con todo, segundo fontes coñecedoras das reunións, Puigdemont xa optara o luns pola declaración de independencia ante a dicotomía de enfrontarse ás medidas do 155 co bloque independentista unido ou dividido e buscando culpables.
"Agora comeza a guerra civil do soberanismo", asegurou unha fonte do Palau este xoves, cando se daba por feito que habería unha convocatoria electoral. A declaración da independencia evitará a pelexa interna, polo menos nos días inmediatamente posteriores. Está por ver se esta paz aguantará ao progresivo embate que chegará en forma de 155.
