En galego, aquí e agora. Ese será o lema que presidirá as manifestacións que o vindeiro 17 de maio se desenvolverán nas principais vilas e cidades galegas organizadas por Queremos Galego. Representantes da xestora da plataforma cidadá, da que forman parte máis de 500 entidades, presentaron este mércores unhas mobilizacións coas que pretenden, a poucos días das eleccións municipais, "reclamar o papel normalizador dos concellos fronte ao desleixo do resto de poderes públicos". "A situación de emerxencia lingüística non permite esperar outros 40 anos a que as institucións se dignen a cumprir as súas obrigas", din.
Así, Queremos Galego advirte da situación de "emerxencia lingüística" cando se fan 40 anos da aprobación da Lei de Normalización Lingüística, "unha lei da que destacou máis o desleixo, a pasividade ou o boicot directo das administracións públicas -nomeadamente da Xunta, do Goberno español e do poder xudicial- que a vontade das institucións por reparar, repor e normalizar a lingua que une galegas e galegos", segundo dixo o voceiro da plataforma, Marcos Maceira.
A plataforma lembra que son xa 40 anos reclamando a "oficialidade real", para "poder recibir atención en galego sen obstáculos, para poder ver audiovisual en galego en igualdade de condicións, para ter o ensino en galego, para que haxa xustiza en galego, para que calquera acto da vida cotiá que a cidadanía queira desenvolver en galego non sexa unha dificultade".
A plataforma denuncia e enumera "impedimentos de todo tipo": as e os docentes "denuncian que non poden impartir materias na nosa lingua, ben por impedimento legal ou por ausencia de materiais; a canle pública estatal non emite nin un só segundo de programación infantil ou xuvenil en galego; a administración dixital obriga, no mellor dos casos, a cidadanía a repetir constantemente que escolle a súa lingua; na xustiza e na saúde campa o analfabetismo en galego e á Xunta e ao goberno español nin lles importa que en reiteradas ocasión o Consello de Europa sinalase o mínimo que teñen que facer para garantir o dereito ao uso do galego".
Neste contexto, din, "é lóxico que o galego perda falantes mais tamén resulta incríbel e esperanzador que aínda así aumenten as persoas que insisten en vivir en galego e en transmitilo". "É esta conciencia reparadora a que está a garantir a existencia da nosa lingua", afirma o voceiro de Queremos Galego, Marcos Maceira. "Os poderes públicos só cumpren as súas obrigas respecto á lingua cando a sociedade llo reclama", sentencia Maceira.
Ante esta situación, Queremos Galego anuncia que sairá ás rúas das principais cidades e vilas de Galiza o 17 de maio ás 12 horas, para "reivindicar a vida en galego, aquí e agora". Toda a información sobre as concentracións, anuncia a plataforma, estará dispoñible na páxina web da entidade: queremosgalego.gal.
