Candidatos e candidatas e líderes de todas as formacións amósanse en público na xornada previa ás eleccións na que legalmente non poden pedir o voto... pero si evidenciar a súa existencia
Na xornada de reflexión os partidos políticos non poden pedir directamente o voto, pero os seus candidatos e líderes tentan que a cidadanía non se esqueza deles e siga a telos presentes para a xornada electoral amosándose en público e divulgando a realización de todo tipo de actividades.
Así o fixeron novamente este sábado tanto quen aspira a ser votado este domingo como quen indirectamente aspira a verse reforzado como líder de partido.
O presidente do PPdeG e da Xunta, Alfonso Rueda, dedicou a mañá deste sábado a participar nunha concentración de motos en Bueu.
No BNG a súa portavoz nacional, Ana Pontón, almorzou coa candidata nacionalista en Santiago, Goretti Sanmartín, e pasou o resto da xornada nunha excursión coas familias da escola infantil da súa filla.
Pola súa banda o secretario xeral do PSdeG, Valentín González Formoso, que é candidato a revalidar a alcaldía das Pontes, deu un paseo en bicicleta por ese concello e acudiu a un partido de fútbol.
Entre os candidatos e candidatas que como Formoso tamén aspiran a revalidar as súas alcaldías houbo de todo. O pontevedrés Miguel Anxo Fernández Lores, do BNG, exerceu como rexedor oficiando unha voda antes de comer coa súa familia.
Tamén coa familia, nun encontro atlético dunha filla, pasou a mañá do sábado a alcaldesa de Lugo, Lara Méndez, do PSdeG. Nese partido outro rexedor que non o pasou tan ben nesta xornada de reflexión foi o de Ferrol, Ángel Mato, que informou que tras esquivar a COVID durante tres anos espertou este sábado con síntomas “moi fortes”.
E lonxe de Galicia pasou a xornada de reflexión outro líder político galego, o do PP estatal, Alberto Núñez Feijóo, que visitou a Feira do Libro de Madrid.
