Nas últimas horas de campaña das eleccións municipais deste domingo os líderes dos partidos apuraron os quilómetros para acompañar a candidatas e candidatos en actos ao longo de todo o día. A porcentaxe de votantes indecisos nestes comicios vai ser decisiva nalgúns concellos, polo que o tradicional chamamento a acudir ás urnas este 28M colle forza entre as formacións que aspiran a gobernar.
O primeiro en pedir o "voto útil" foi o presidente da Xunta, Alfonso Rueda, que acompañou na mañá deste vernes ao candidato do PP en Pontevedra Rafa Domínguez. "Pedimos un voto útil e non dispersado, que ao final vale para moi pouco. Fan falta maiorías potentes para poder facer gobernos potentes. Polo tanto, pido o respaldo para as candidaturas do Partido Popular, esas maiorías que permiten gobernos estables, con sentidiño e colaboradores coa Xunta de Galicia", asegurou en declaracións aos medios desde Ordes, xunto ao candidato José Luis Martínez Sanjurjo.
![](https://praza.gal/storage/uploads/20230526-arueda-pontevedra15-e65442e.jpeg)
Rueda pediu respaldo para as candidaturas do PP, "esas maiorías que permiten gobernos estables, con sentidiño e colaboradores coa Xunta"
Rueda acompañou tamén este venres a Telmo Martín en Sanxenxo, xantou coa candidatura liderada por Rafa Domínguez en Pontevedra, participou no mitin de Borja Verea en Santiago, no de José Manuel Rey en Ferrol e no de Marta Fernández-Tapias en Vigo, onde asegurou que a súa formación vai "comezar un camiño ascendente". O presidente do PPdeG explicou que nesta campaña "Vigo converteuse na cidade máis difícil para facer política para todos aqueles cargos socialistas que non sexan o alcalde" xa que "quen tivo aquí durante anos a ministros prometendo de todo e non facendo nada, agora resulta que non coñece a ninguén do PSOE".
Ana Pontón apelou á mocidade para sexa "protagonista" do "cambio real" escollendo a papeleta do BNG
Desde Santiago de Compostela, Ana Pontón instou a concentrar o voto de cambio na candidata nacionalista para que a capital galega teña a primeira alcaldesa: "A toda as persoas que queredes máis para Santiago, quero dicirvos que a vosa opción é Goretti Sanmartín, e por iso pídovos o voso voto para facer historia nesta cidade".
A portavoz nacional do BNG acompañou a Francisco Jorquera no seu mitin de peche de campaña. "É o momento de sumar no BNG todo o voto rebelde, inconformista, que quere un país máis xusto e con máis dereitos; todo o voto que defende cidades verdes, inclusivas, feministas", explicou no acto na dársena da Coruña, desde a que apelou á mocidade para sexa "protagonista" do "cambio real" escollendo a papeleta do Bloque "e construír a sociedade na que queren vivir, defendendo o seu dereito a ter un plan de vida con salarios dignos, con acceso a vivenda, nunha Galiza á vangarda da igualdade e pola defensa do medio".
A portavoz nacional do BNG acompañou a Francisco Jorquera no seu mitin de peche de campaña. "É o momento de sumar no BNG todo o voto rebelde, inconformista, que quere un país máis xusto e con máis dereitos; todo o voto que defende cidades verdes, inclusivas, feministas", explicou no acto na dársena da Coruña, desde a que apelou á mocidade para sexa "protagonista" do "cambio real" escollendo a papeleta do Bloque "e construír a sociedade na que queren vivir, defendendo o seu dereito a ter un plan de vida con salarios dignos, con acceso a vivenda, nunha Galiza á vangarda da igualdade e pola defensa do medio".
"Ninguén pode quedar na casa cando hai tanto en xogo", asegurou Valentín Formoso
Desde Ferrol, e acompañado da ministra de Defensa, Margarita Robles, o secretario xeral do PSdeG, Valentín González Formoso, fixo un último chamamento á mobilización dos votantes progresistas de Galicia: "Ninguén pode quedar na casa cando hai tanto en xogo". Así, solicitou "que este país se levante" o domingo porque "non podemos dar un paso atrás e paralizar os proxectos modernizadores" das vilas e cidades.
Formoso, que aspira á reelección no concello das Pontes, salientou que estivo "percorrendo Galicia" nunhas eleccións municipais que son "o enganche da política real, o enganche do PSdeG cos problemas, esperanzas e aspiracións dos veciños e veciñas", e nas que os socialistas teñen "un maior apoio", o que fai do partido "a columna vertebral política do país". O líder dos socialistas pechou a campaña en Betanzos, onde acudiu para respaldar á alcaldesa e candidata á reelección, María Barral.
"Santiago necesita recuperar a súa vitalidade, o seu optimismo, o seu orgullo; e iso non o pode facer nin co PP nin con Bugallo", dixo María Rozas
Pola súa banda, a candidata de Compostela Aberta, María Rozas, insistiu desde o seu peche de campaña na Praza 8 de marzo en que "CA é o voto útil para garantir o futuro de Santiago en clave progresista, para termos unha Compostela que avanza con políticas verdadeiramente transformadoras, e para recuperar o orgullo de sermos picheleiras".
Rozas manifestou que a veciñanza "non oculta a súa decepción con Bugallo" e reclama "unha forma diferente de gobernar baseada no diálogo". "Santiago precisa abrir unha nova etapa, necesita mirar cara o futuro con esperanza, necesita recuperar a súa vitalidade, o seu optimismo, o seu orgullo; e iso non o pode facer nin co PP nin con Bugallo", aseverou.
A Marea Atlántica pechou a campaña no Campo da Leña da Coruña coa presenza do ex-alcalde Xulio Ferreiro. "Nós non subimos aos barrios. Nós somos dos barrios. Vimos de percorrelos nas últimas once horas. E nos últimos meses. E nos últimos oito anos. Porque a campaña da Marea Atlántica é o noso traballo, O noso compromiso. As nosas políticas", afirmou o candidato á alcaldía Xan Xove.