Toda a oposición denuncia no Parlamento a descoordinación das emerxencias

Os servizos de emerxencias en Angrois CC-BY contandoestrelas

O vicepresidente da Xunta e conselleiro de Presidencia, Alfonso Rueda, compareceu este xoves no Parlamento galego para dar conta do dispositivo posto en marcha pola Xunta de Galicia con motivo do accidente ferroviario. Unha comparecencia que os tres grupos da oposición consideraran "precipitada" previamente, por non dispoñer todos os datos necesarios para avaliar esta cuestión e na que en bloque pediron que sexa "a primeira de moitas comparecencias de membros do Goberno galego para ofrecer explicacións", en palabras de Beatriz Sestayo (PSdeG-PSOE). E, en efecto, semella que na sesión deste xoves na Comisión 1ª do Parlamento asistimos ao primeiro dos moitos debates que se han vivir nos vindeiros meses para afondar nas causas do accidente e na análise do operativo de emerxencias.

A intervención de Rueda estivo inzada de cifras: "35 policías nacionais, máis de 130 gardas civís, 75 axentes da Policía Autonómica, 120 policías locais, 80 bombeiros, 170 efectivos de 26 agrupacións de Protección Civil, 45 psicólogos..." e nela o vicepresidente da Xunta destacou a "eficiencia" do dispositivo.

Os tres grupos da oposición recibiron con criticas unánimes as palabras de Rueda, ao que acusaron de "triunfalismo", de non ofrecer información clave en varios asuntos, ou de non responder a moitas das preguntas concretas que lle formularon

Porén, os tres grupos da oposición recibiron con criticas unánimes as palabras de Rueda, ao que acusaron de "triunfalismo", de non ofrecer información clave en varios asuntos, ou de non responder a moitas das preguntas concretas que lle formularon. Dende as bancadas socialistas lembránronlle que "non vimos darlle as grazas senón a que nos informe, máis humildade, menos soberbia e máis respecto ás vítimas”. AGE acusou a Rueda de "utilizar a traxedia para facer autobombo". E dende o BNG acusárono de "poñer a camisola de hooligan. Fan o que fan sempre: non responder e desviar a responsabilidade a outras instancias". Tamén lle afearon a "falta de rigor" nos datos ofrecidos, en base á información que as tres forzas politicas foron recollendo na última semana, directamente dos propios traballadores ou de partes do 112. 

"Se teñen un minimo de sensibilidade polas vitimas, se non teñen un croio no lugar do corazón teñen que acceder a crear esa comisión de investigación"

PSdeG, AGE e BNG esixiron "chegar ao fondo das causas do accidente", e AGE e BNG lembraron a este respecto a súa petición de que se constitúa unha comisión parlamentaria de investigación ao efecto. As tres forzas apelaron ao "respecto ás vítimas" e Tareixa Paz (BNG) citou as palabras de María Esperanza Valle Pereira, dona dun dos falecidos, que este mércores reclamou na homenaxe civil celebrada en Bonaval: "Queremos saber a verdade, que nos digan por que pasou". "Se teñen un minimo de sensibilidade polas vítimas, se non teñen un croio no lugar do corazón teñen que acceder a crear esa comisión", engadiu Tareixa Paz, que concluíu que "necesitamos a verdade polas vítimas e para garantir a seguridade dos milleiros de usuarios do tren". 

 

"Falta de coordinación"

"O operativo funcionou grazas á vontade da sociedade civil que foi quen de contrarrestar as eivas que existiron no dispositivo da Xunta", engadiu Yolanda Díaz

"Dispoñemos de partes que demostran que non houbo coordinación (...) O posto de mando avanzado constituíuse ás 22.27 horas (...) Faltaron ambulancias medicalizadas (...) Non houbo hospital de campaña". Yolanda Díaz (AGE) enumerou varios erros detectados no dispositivo e que contradicían a análise oficial ofrecida por Rueda, ao que acusou de "mentir". "O operativo funcionou grazas á vontade da sociedade civil que foi quen de contrarrestar as eivas que existiron no dispositivo da Xunta", engadiu. Tamén Sestallo e Paz louvaron o traballo dos profesionais públicos e chamaron a tirar a conclusión de que "deben cesar os recortes nos servizos públicos". De igual xeito Díaz reclamou "a necesidade de recuperar a xestión dos parques comarcais de bombeiros", xa que “manter os sistemas de emerxencia do noso pais en mans privadas é un auténtico suicidio”. "Foi un éxito da sociedade civil e dos profesionais a pesar das agresións", concluiu.

Ao igual que Paz e Díaz, Sestayo puxo o énfase na falta de coordinación: "Os profesionais tiveron que autoxestionarse. O 112 non xestionou, foi só unha centralita de chamadas, non estivo para o que ten que estar segundo a Lei de Emerxencias. A coordinación fixose de abaixo a arriba". 

Os servizos de emerxencias en Angrois CC-BY contandoestrelas

Despece

  • AGE e BNG piden a creación dunha comisión de investigación

    AGE e BNG piden a creación dunha comisión de investigación, unha petición asinada conxuntamente polas dúas formacións, que na exposición de motivos sinalan que "os poderes públicos quedan especialmente obrigados a investigar as causas e depurar as responsabilidades de todo tipo ás que houbera lugar" e que "o acontecido, desgraciadamente, non ten volta atrás, pero é unha obriga legal, ética e de compromiso público que por parte das institucións se proceda a realizar todas cantas medidas, actividades e actuacións poidan contribuír a evitar que accidentes desta natureza se poidan reproducir no futuro".

    A petición da creación desta comisión de investigación foi asinada conxuntamente por AGE e BNG

    Argumentan que "os datos que se van coñecendo amosan claramente as deficiencias das medidas activas e pasivas de seguridade e control das mesmas, así como do propio deseño da rede e das súas condicións materiais e técnicas (plataforma, vehículos, medidas de seguridade, etc)" e apuntan que este "labor investigador é plenamente compatible coa que poidan e deban desenvolver tanto a administración ferroviaria (ADIF-Renfe) como a que sexa obxecto do procedemento penal en curso".

    AGE acusa o presidente da Xunta, Alberto Núñez Feijoo, de "estafar unha vez máis á cidadanía galega dando gato por lebre ao anunciar e publicitar que Galicia xa tiña AVE cando agora a realidade demostra que non é tal xa que nin o ancho da vía nin os trens nin as medidas de seguridade son os propios da alta velocidade". Os deputados de Alternativa Galega de Esquerda mantiveron un encontro esta mañá cos representantes dos sindicatos ferroviarios, no que se destacou "a urxente necesidade de instalar medidas de seguridade de xeito inmediato para evitar este tipo de accidentes". Os propios representantes sindicais coincidiron en sinalar a necesidade de esclarecer o acontecido e deixar as especulacións a un lado, xa que "cos datos que se teñen ata o momento todo o que se hai son especulacións".

    Ademais da comparecencia de Alberto Núñez Feijoo, o BNG tamén demanda as explicacións no Parlamento de Samuel Juárez

    O BNG quere que Alberto Núñez Feijoo compareza na Cámara para dar explicacións e tamén demanda a comparecencia no Parlamento de Samuel Juárez, delegado do Goberno en Galicia. O BNG tamén rexistrou unha interpelación ao Presidente da Xunta sobre as actuacións que levará a cabo o Goberno para garantir as condicións de seguridade nos trens que circulan por Galicia e impulsar a normalización da rede ferroviaria galega, sinalando que "son palmarias as deficiencias vinculadas cos sistemas de seguridade que están operativos nestes momentos no sistema ferroviario galego". Na interpelación, o BNG denuncia que o sistema ERTMS non estea instalado ou a "perigosidade" da curva na que tivo lugar o accidente.

  • CxG solicita a RENFE que abra unha oficina de atención aos afectados do accidente en Santiago

    O secretario xeral de Compromiso por Galicia, Xoán Bascuas, vén de manifestar a súa “incredulidade” ante o anuncio de RENFE de abrir unha oficina de atención personalizada a disposición de todos os afectados e afectadas do fatídico accidente de Angrois en Madrid. Segundo o líder galeguista, “mesmo nunha traxedia se aplica o centralismo”, cando o máis lóxico é que a oficina se abra “no lugar do accidente, onte están o maior número de afectados e afectadas, onte se realizan moitos trámites administrativos, xudiciais e de cobertura social”. Bascuas insiste en que, ademais desa que se abre en Madrid, “cómpre abrir outra en Santiago de Compostela, onde se poida obter información, atención e asesoramento, así como calquera outra consulta que sexa do seu interese”.

    “Cómpre abrir outra en Santiago de Compostela, onde se poida obter información, atención e asesoramento"

    Segundo Xoán Bascuas, o centralismo español non ten límites. “Non se conforman por facer pasar todos os avións por Madrid, a todos os tren, a concentrar todas as institucións dun Estado plurinacional, senón que tamén agora queren facer pasar a todos os afectados e afectadas do accidente de Angrois por Madrid”. Para o secretario xeral de Compromiso, “isto xa non só é falta de sentido práctico, senón que da mostra da escasa sensibilidade de RENFE, que o que ten que facer é facilitar as cousas ás vítimas e aos familiares, que están pasando por momentos difíciles e que teñen pouco tempo para realizar viaxes”.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza