A causa iníciase tras a denuncia presentada por Podemos, á que se acumula a interposta conxuntamente pola Fundación Montescola, Ecoloxistas en Acción e a Plataforma pola Defensa do Mar da Comarca Muros-Noia
O xulgado de Primeira Instancia e Instrución número 2 de Noia acordou incoar dilixencias pola posible existencia dun delito contra os recursos naturais e o medio ambiente pola vertedura pellets na costa galega. A xuíza ordenou oficiar á Unidade do Servizo de Protección da Natureza (Seprona) da Garda Civil para que remita ao xulgado un informe no que se consignen “os datos solicitados en relación coa titularidade da embarcación Toconao, as circunstancias nas que se produciu a perda da carga, o contido da devandita carga, a composición e posible toxicidade dos pellets vertidos, así como o alcance da vertedura e a delimitación da área afectada”.
A titular do xulgado recibiu as actuacións tras a denuncia presentada por Podemos, á que se acumulou a interposta conxuntamente pola Fundación Montescola, Ecoloxistas en Acción e a Plataforma pola Defensa do Mar da Comarca Muros-Noia. Previamente, a Fiscalía de Medio Ambiente xa abrira tamén a súa propia investigación.
Nos autos divulgados este mércores polo poder xudicial, que non son firmes, pois contra eles cabe interpoñer recurso, a xuíza explica que non están determinadas “a natureza e circunstancias de tales feitos nin as persoas que neles interviñeron”, polo que entende que é procedente incoar dilixencias previas e practicar as esenciais, encamiñadas a efectuar tal determinación e, no seu caso, o órgano competente para o axuizamento.
Noutro auto, a xuíza admitiu a comparecencia, en calidade de acusación popular, de Podemos Partido Político, a Fundación Montescola, Ecoloxistas en Acción e a Plataforma pola Defensa do Mar da Comarca Muros-Noia. A xuíza asegura que os denunciantes “se atopan lexitimados para intervir no proceso como acusación popular dado que, a pesar dos intereses particulares que poidan resultar afectados, os feitos obxecto de investigación no presente procedemento poderían ser indiciariamente constitutivos dun delito contra o medio ambiente e os recursos naturais, no que entran en xogo intereses supra individuais ou institucionais que lexitiman a súa intervención”.
