A Xunta pechou varias entidades pero creou outras, polo que aforro real foi inferior ao 1% dos fondos manexados, di o Consello de Contas, que alerta de "falta de coherencia" na información contable de sete destas entidades.
O ente fiscalizador constata unha "deficiente orzamentación" de gastos que deberan estar previstos polo Goberno e volve certificar o desprazamento de facturas para anos seguintes, aínda que cunha contía "significativamente" menor á de anos anteriores.
Contas critica que o Goberno galego lles fai encomendas de xestión por traballos que debería acometer a propia Administración, o que acabou implicando a conversión en funcionarios de 29 dos seus traballadores só en 2013. Ademais, a Xunta non supervisa as subcontratacións que fan nin xustifica que sexa máis barato encargarlles eses traballos que facelos ela mesma.
O Consello de Contas repróchalle ao Goberno nos seus informes de 2013 que conceda subvencións para a promoción do galego sen "avaliar" o seu impacto nin comprobar se teñen "incidencia efectiva na dinamización da lingua"