A chuvia das últimas horas, nalgunha zona máis que nos tres últimos meses, dá unha tregua na loita contra o lume

Chuvia e ceos cubertos este mércores en Abadín CC-BY-SA Praza Pública

Medio Rural, que non informa de ningún incendio por primeira vez en varias semanas, dá por extinguido o de Lobios catro días despois de iniciarse e tras consumir 425 hectáreas e provocar a morte dun piloto

Despois de que o mes de xullo fose o máis seco nos últimos 34 anos, sen precipitación ningunha na maior parte do país, desde a tarde deste martes vén de rexistrarse nalgunha zona de Galicia tanta ou máis choiva que nos últimos tres meses. Unha auga que, acompañada do descenso das temperaturas, está a dar unha tregua na loita contra os incendios forestais.

Segundo a web 4gotas.com, na noite do martes ao mércores recolléronse na cidade da Coruña 64 litros por metro cadrado, máis que todo o acumulado ata agora desde o pasado 1 de maio, 53 litros. A cifra foi aínda superior noutros lugares da provincia como Bergondo ou Narón, con 94 litros por metro cadrado.

A chuvia chegou este mércores a toda Galicia tras un mes de xullo no que non houbo precipitacións na maior parte do país CC-BY-SA Praza Pública

A chegada da chuvia propiciou que por primeira vez en varias semanas a Consellería do Medio Rural non informe de ningún incendio en ningún punto de Galicia. O último, o de Lobios que se iniciara na mañá do pasado sábado e no que faleceu o piloto dun avión portugués, deuno por extinguido no mediodía deste mércores, catro días despois e tras consumir, segundo a última cifra oficial, 425 hectáreas de monte raso.

desde o 1 de xullo, data de comezo do período de alto risco de incendios, e coincidindo coa sucesión ininterrompida de días sen precipitacións, a Xunta leva informado de máis de 4.200 hectáreas ardidas en toda Galicia, a maioría, 3.800, en Ourense. Porén, a superficie queimada ata a chegada este martes das chuvias é máis xa que a Xunta non informa de todos os incendios.

As chuvias das últimas horas provocaron máis dun cento de incidencias, especialmente na metade norte do país

Pola contra, as precipitacións, que levaron a activar alertas amarelas e laranxas especialmente na metade norte do país, provocaron máis dun cento de incidencias, segundo a Axencia Galega de Emerxencias, especialmente na Coruña e Lugo, mesmo con inundacións e entrada de auga en baixos e garaxes en Barreiros, na Mariña lucense.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.