O Centro de Documentación en Igualdade e Feminismos (CDIF) do Consello da Cultura Galega (CCG) vén de poñer en marcha un novo espazo en liña para a difusión dos materiais do Movemento Feminista Organizado en Galicia. Búscase facilitar o acceso público "a un patrimonio documental de grande valor histórico e social", que abrangue de momento preto de 700 documentos relativos a 12 entidades.
O espazo web amosa de momento uns 700 documentos relativos a 12 entidades. A colección integra materiais relacionados con máis de 200 organizacións, que se irán incorporando progresivamente á rede
A colección integra materiais relacionados con máis de 200 organizacións, que se irán incorporando progresivamente á rede. Entre os 678 documentos subidos ata agora figuran entidades destacadas da historia do movemento feminista galego, como a Asociación Galega da Muller, creada en 1976, a Asociación Galega da Muller de Ourense, a de Santiago, ou a de Vigo. A documentación inclúe tamén fondos da Coordinadora Feminista Galega (149 documentos) e da Coordinadora Feminista de Vigo (132 documentos), ambas creadas a finais de 1979.
Aparecen tamén os Grupos de Mulleres da Universidade (118 documentos), activos desde 1983 ata comezos dos anos 2000. Destaca tamén a presenza de Andaina (55 documentos), un proxecto colectivo definido arredor da revista homónima, fundada en 1983.
Búscase facilitar o acceso público "a un patrimonio documental de grande valor histórico e social"
Na presentación do espazo web, a presidenta do CCG, Rosario Álvarez, e a directora do CDIF, Carme Adán,trata dunha "xanela para coñecer a riqueza, a variedade e a intensidade dun movemento que ten un valor que vai máis alá do arquivístico e documental”, apuntou a presidenta na rolda de prensa.
“Foi e é un feminismo que puxo sobre a mesa preocupacións propias dun tempo, como a sexualidade, o dereito a decidir sobre o noso corpo, o traballo digno ou o divorcio, e que foi profundamente antimilitarista. Ademais, sempre estivo a loitar para que determinadas demandas non se perdan”, sinalou Carme Adán.
“Foi e é un feminismo que puxo sobre a mesa preocupacións propias dun tempo, como a sexualidade, o dereito a decidir sobre o noso corpo, o traballo digno ou o divorcio, e que foi profundamente antimilitarista. Ademais, sempre estivo a loitar para que determinadas demandas non se perdan”, sinalou Carme Adán
Este conxunto documental constitúe un "espazo pioneiro" no conxunto de España na visibilización, organización e acceso aberto aos materiais do movemento feminista, "situándose na vangarda das políticas de preservación da memoria social", destaca o CDIF. Son materiais que permiten achegarse a unha parte fundamental da historia do movemento feminista en Galicia a través das súas propias producións, discursos e prácticas organizativas.
A emerxencia dos feminismos organizados e as súas producións constitúen unha fonte fundamental para comprender as transformacións sociais e o papel das mulleres na historia galega e universal.
Numerosas organizacións desenvolveron ao longo das últimas décadas unha intensa actividade, xerando documentación diversa: estudos, correspondencia, revistas, boletíns, cadernos, libros ou propostas lexislativas. Moitos destes materiais atopábanse dispersos, en risco de desaparición ou en estado precario, o que fixo que o CCG, en 2005, considerase necesaria unha intervención para garantir a súa preservación.
