O Tribunal Superior de Galicia lembra que "a prestación do servizo audiovisual como as comunicacións co persoal deben realizarse neste idioma"
O Tribunal Superior de Xustiza de Galicia (TSXG) vén de divulgar unha sentenza que avala a esixencia de coñecementos de galego de nivel CELGA 2 para un posto de especialista de montaxe na CRTVG, actual CSAG. A sentenza rexeita o recurso interposto por un aspirante ao proceso de estabilización de emprego da antiga corporación que fora declarado non apto na proba de lingua galega.
O recorrente, segundo se recolle na sentenza, alegaba que o nivel de galego esixido era excesivo para as funcións dunha praza de especialista de montaxe. Porén, a Sala do Social do TSXG considera que "o coñecemento da lingua galega é esencial para o desenvolvemento do posto de traballo" e que a súa esixencia se establece "desde un nivel básico, de forma proporcional ao posto desempeñado".
A Sala fundamenta tamén a súa decisión no papel do galego dentro do ente público, que ten por obxecto social promover e difundir a cultura e a identidade de Galicia. A este respecto, a sentenza de primeira instancia, cuxos feitos probados recolle o TSXG, establecía que "a lingua da CRTVG é o galego" e que tanto "a prestación do servizo audiovisual como as comunicacións co persoal deben realizarse neste idioma".
Partindo desta consideración, os maxistrados conclúen que "impoñer como requisito o nivel de galego CELGA 2 non é desproporcionado para o posto que se pretende estabilizar".
A resolución non é firme, xa que é recorrible ante o Tribunal Supremo.