A presión da COVID nos hospitais galegos é a máis baixa dende agosto de 2020

Cribado da COVID en Moraña e mapa de incidencia acumulada a 14 días con datos do 24 de maio de 2021 CC-BY-NC-SA Foto: Concello de Moraña | Montaxe: Praza Pública

O Servizo Galego de Saúde notificou este 25 de maio un total de 90 novos casos da COVID-19. É a cifra máis baixa nun ciclo de vinte e catro horas (de seis a seis da tarde) dende o pasado 8 de marzo, cando foran notificados 88 novos casos. 

Os 90 casos notificados este martes polo Sergas son a cifra máis baixa en vinte e catro horas dende o 8 de marzo, cando foran 88

En termos de días naturais, no último dispoñible con datos completos (o domingo, 23) rexistráronse 86 novos casos. Para atopar unha cifra máis baixa hai que retrotraerse ao pasado 3 de abril (84) e, antes diso, ao 7 de marzo (80).

Este contexto de contención dos principais indicadores epidemiolóxicos segue traducíndose, máis evidentemente dende mediados de mes, na ocupación hospitalaria. As 140 persoas hospitalizadas con test positivo do coronavirus ás seis da tarde do luns (e, máis aínda, as 138 á mesma hora do domingo) supoñen a cifra máis baixa dende finais de agosto de 2020. O dato notificado este martes rebaixa, ademais, en 36 pacientes o do mesmo día da semana anterior.

Trinta e unha destas persoas hospitalizadas están ingresadas en unidades de coidados intensivos, seis menos que hai unha semana. No pico de hospitalización, reflexo da explosión de contaxios durante as semanas do Nadal e o Aninovo, chegou a haber máis de 250 persoas coa COVID nas unidades de coidados intensivos e máis de 1.400 hospitalizacións simultáneas por esta razón. 

A incidencia a sete días, contida na maioría de áreas

A incidencia acumulada a 7 días para toda Galicia, con 39 casos novos por cada cen mil habitantes, segue sendo menos da metade que o dato a 14 días, o que apunta a tendencia descendente

Mentres isto sucede, os indicadores de incidencia acumulada (casos novos por cada cen mil habitantes) tamén falan de acougo. Cos datos do último día completo dispoñible (ata o domingo 23), só unha das sete áreas sanitarias, a de Lugo, traza unha liña ascendente no dato a 7 días, con 44 casos por cada cen mil habitantes. A razón son gromos como o detectado en Vilalba que, segundo a área sanitaria, está xa controlado.

No resto de áreas sanitarias, a estabilidade é a tónica xeral e a que ten un dato máis elevado, a de Vigo, xa volve baixar dos 60 casos novos por cada cen mil habitantes a sete días. O dato do global de Galicia queda así un chisco por baixo dos 39 casos neste indicador.

Eses 39 casos por cada cen mil habitantes a sete días son menos da metade do dato da incidencia acumulada a 14 días, situado en algo menos de 80 casos. Esta correlación implica que a tendencia xeral segue sendo levemente descendente.

Sobre o mapa, estas incidencias acumuladas séguense repartindo de xeito desigual, con máis concellos por riba dos datos globais canto máis ao suroeste. Nos últimos días seguen destacando as incidencias acumuladas a 14 días en concellos do Barbanza como A Pobra do Caramiñal e, máis ao sur, tamén o concello de Mos (influído por un gromo nun centro escolar). Máis cara ao interior, tamén destacan os datos de Ordes ou Trazo e, nas provincias de Lugo e Ourense, fano municipios como Xermade e Vilalba, puntos da Mariña e varios concellos do sur da provincia e, xa en territorio ourensán, municipios como Lobios ou Vilariño de Conso.

No que atinxe ás sete principais cidades, a estabilidade epidemiolóxica segue sendo tamén a tónica dominante. A que segue tendo unha incidencia acumulada a 14 días máis elevada, Vigo, mantense dende comezos de maio na contorna dos 120 casos por cada cen mil habitantes. O dato máis baixo segue sendo de Ferrol (25) e Santiago, que empeorara durante a pasada semana, volve acougar os seus indicadores.

Despece

  • O Tribunal Superior avala a prórroga das restricións da Xunta pola COVID que atinxen a dereitos fundamentais

    Sinais para un cribado da COVID en Vimianzo e mapa de restricións vixente dende o 22 de maio CC-BY-SA Foto: Concello de Vimianzo | Montaxe: Praza Pública

    Malia aos agoiros de caos e descontrol que, dende diversas instancias políticas e partidarias (entre elas, o Goberno galego) foron lanzadas recorrentemente na fin do segundo Estado de Alarma pola pandemia, cando menos no caso galego as restricións decretadas pola Xunta para conter o virus que atinxen a dereitos fundamentais están pasando o filtro da Xustiza sen excesivos atrancos. Así sucedeu o pasado 12 de maio, cando o Tribunal Superior deu o seu visto e prace cunha única advertencia sobre a necesidade de xustificar as medidas con máis datos, e así vén de volver suceder.

    O alto tribunal galego considera "proporcionadas e necesarias" para frear a COVID restricións como os límites ás reunións entre non conviventes, ao estaren acoutadas no tempo

    Nun auto datado neste 25 de maio, o alto tribunal galego valida a prórroga ata o 29 de maio das restricións que precisan ratificación xudicial e faino, ademais, evidenciando que neste caso o Goberno galego si achegou máis datos (a través de tres informes de Epidemioloxía e Saúde Pública). Considera a Sala que, dado o "relevante risco" epidemiolóxico que aínda persiste e tendo en conta que estas restricións están acoutadas no tempo, resultan "proporcionadas e necesarias" medidas como a prohibición dos encontros entre persoas non conviventes entre a 1 e as 6 da mañá e a limitación das reunións entre persoas que non convivan a un máximo de 4 en interiores e 6, en exteriores, dado que están limitadas no tempo.

    Do mesmo xeito, o TSXG tamén dá o seu visto e prace ás medidas de nivel máximo no Concello de Lobios (con peche perimetral, clausura da hostalería e veto ás reunións entre non conviventes). "as circunstancias singulares de tránsito" neste concello "revelan a medida especialmente eficaz para conter a transmisión do virus", razoa

    Que o Goberno galego adopte estas medidas "constitúe o exercicio e a comprensión normal do Estado das Autonomías", subliña o auto

    O auto da sección terceira do contencioso-administrativo do TSXG, presidida por María Dolores Rivera, tivo como relator ao maxistrado Luís Villares (voceiro de En Marea no Parlamento na pasada lexislatura) e reflicte que "para a Sala resulta acreditado que a adopción combinada das medidas de restrición de mobilidade nocturna, a limitación á reunión a determinado número de persoas e mais a contención da poboación mediante o peche perimetral" se revelan como "sumamente eficaces" para "alcanzar o resultado proposto de preservación da saúde da poboación". 

    Ademais, tamén considera claro o panorama no eido competencial. Fronte ás dúbidas políticas expresadas pola Xunta, o auto resolve que "a adopción" polo Goberno galego "destas medidas constitúe o exercicio e a compresión normal do Estado das Autonomías consagrado" no artigo 2 da Constitución, que "atribúe título habilitante para tomar esas decisións extraordinarias a quen ostenta a titularidade ordinaria sobre unha determinada competencia, asumida no seu Estatuto de Autonomía".

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza