A antiga fábrica de Pontesa estaba a ser empregada como almacén polo Grupo Nogar, segundo o Concello de Pontevedra sen licenza
O incendio que a comezos de novembro e durante varios días consumiu unha nave da antiga fábrica de porcelana de Pontesa en Ponte Sampaio, Pontevedra, provocando a morte dun operario, está xa a ser investigado penalmente pola xustiza. O lugar do incendio estaba a ser empregado polo Grupo Nogar, de loxística e transporte, como almacén de cereais, segundo o Concello de Pontevedra sen licenza, cuestión que negou a empresa.
Este martes a Fiscalía de Pontevedra fixo público que, unha vez finalizado o atestado policial, decidiu “abrir dilixencias de investigación para determinar se houbo ilícito penal”. O asunto está xa xudicializado despois de que o atestado tamén fose trasladado xa ao xulgado de instrución número 3 de Pontevedra, que será o que investigue o caso.
O Concello de Pontevedra reclamou á Xunta e Costas que actuasen ante as irregularidades que detectou no uso das instalacións como almacén de cereais
No incendio, que tardou varios días en ser extinguido, morreu un operario, Benito González, concelleiro do PSdeG en Marín que traballaba para o Grupo Nogar. Desde o Concello de Pontevedra informouse tras o incendio de que á vista das irregularidades detectadas no uso das instalacións decidiuse reclamar á Axencia de Protección da Legalidade Urbanística (APLU) da Xunta e ao servizo provincial de Costas “a reposición da legalidade, a apertura do expediente sancionador ou o que sexa preceptivo”.