O Consello de Contas analiza as políticas que reduciron o abandono escolar en Galicia ata 2021, xusto antes da repunta dos últimos anos, e reflicte que a Xunta deixou sen executar 42 millóns en cinco anos
O abandono escolar temperán foi reducíndose en Galicia nas últimas décadas desde o 29% que se rexistraba no comezo do século, no ano 2000, ata o 10,8% do pasado ano, segundo datos oficiais do Instituto Galego de Estatística. Porén, houbo unha lixeira repunta nos últimos anos desde a cifra máis baixa da serie histórica acadada en 2021, co 8,7%.
Ata xusto ese ano chega un informe sobre as políticas contra o abandono escolar feito público este venres polo Consello de Contas, o ente independente fiscalizador das administracións galegas. Un documento que non avalía a repunta dos últimos anos e que, ademais de constatar que entre 2015 e 2020 só se executaron 86,9 millóns dos 129,3 previstos, recomenda á Xunta manter as políticas previas que lograran a redución das cifras aplicando "novas boas prácticas".
O informe de Contas analiza os denominados Programas de Mellora da Aprendizaxe e Rendemento (PMAR) e lembra que o obxectivo de redución do abandono escolar para o período 2015-2020 era pasar do 17% do primeiro ano ao 13,5% do último. Esa última cifra acabou sendo mellorada, cun 12%, e mesmo baixou en 2021, como consecuencia en parte das excepcións contempladas pola pandemia da COVID-19, ao 8,7%. Pero volveu repuntar ao 10,8%. Os novos obxectivos da Xunta son dun 7,5% para este 2025 e o 6,5% para 2030, en liña coa apreciación de Contas de que canto máis se reduce o abandono escolar máis custa manter o ritmo de descenso.
Máis alá de constatar a redución das últimas décadas sen entrar na repunta dos últimos anos, o informe de Contas tamén reflicte o efecto real deses programas de mellora, sinalando que o curso onde mellores resultados teñen é en 2º da ESO. Por provincias, os seus efectos nótanse máis na Coruña e Ourense, e segundo o grao de urbanización son máis efectivos nas zonas pouco poboadas que nas cidades.
Contas di que 732 alumnos de 2º e 3º de ESO non conseguirían promocionar curso entre 2016 e 2018 sen a axuda dos programas de mellora da aprendizaxe
Contas mesmo pon cifras e di que dos 4.313 alumnos de 2º e 3º de ESO beneficiados por eses programas entre os cursos 2015/16 e 2017/18, "732 alumnos que promocionaron non o conseguirían" sen esa axuda. Tamén sinala que dos 12.724 alumnos que non promocionaron e non estaban incluídos en programas de mellora da aprendizaxe, 5.021 si o conseguirían estando neses programas.
O informe recomenda á Xunta manter as políticas incorporando novas "boas prácticas" e mellorar a "eficiencia financeira" do gasto ante as carencias na súa execución detectadas entre 2017 e 2020, o que para o ente fiscalizador "pode pór de manifesto certa inercia orzamentaria".
Noutros dous informes Contas insiste en reclamar ao Sergas unha mellor planificación da renovación de equipos de alta tecnoloxía e ao Concello de Santiago maior seguridade informática
Contas tamén fixo públicos -como adoita facer en venres e avanzado o día, o que lles resta visibilidade- outros dous informes sobre investimentos do Sergas en alta tecnoloxía e sobre a seguridade informática do Concello de Santiago. No primeiro, como xa fixo noutro informe similar hai dous anos, o ente fiscalizador insiste en reclamar a Sanidade unha mellor planificación da renovación de equipos. No de seguridade informática, Contas sinala a Santiago diversas melloras que debe seguir implantando similares ás que vén reclamando nos últimos anos a outros concellos e deputacións.
