Meteogalicia confirma o conxunto do inverno como o máis húmido desde 2000, pero cunhas temperaturas máis elevadas que o habitual
O actual inverno xa viña sendo o máis húmido do último cuarto de século, desde o de 2000-01, alcumado como "o inverno sen sol", e así o vén de ratificar agora Meteogalicia. Pero agora os datos da Xunta engaden máis detalles para as últimas semanas, de xeito que febreiro foi o mes máis húmido desde 1979, cunha precipitación media acumulada de 304 litros por metro cadrado, un 160% máis que o valor climático habitual.
Os datos foron adiantados este xoves pola conselleira de Medio Ambiente, Ángeles Vázquez, que cifrou nuns 800 litros por metro cadrado a precipitación media en Galicia durante o inverno meteorolóxico, en decembro, xaneiro e febreiro. Un valor un 81% superior ao habitual nese período e que non se supera desde o inverno de 2000-01. Foi, ademais, "o cuarto inverno máis chuvioso da serie histórica", di a conselleira, sen que Meteogalicia fixese aínda público o seu informe oficial.
Os 304 litros por metro cadrado de media en febreiro foron un 160% máis que o habitual
Pero a anomalía de chuvia foise incrementando co paso das semanas, de xeito que en xaneiro foi un 98% superior ao habitual pero en febreiro, con 304 litros por metro cadrado, disparouse a un 160% por riba do habitual, tendo que remontar a conta a 1979 para atopar un febreiro similar.
No que respecta ás temperaturas, o inverno foi máis frío que os dous anteriores pero cálido en perspectiva de máis anos, con 9,1 graos de media, seis décimas máis que a media de referencia. Nesa media influíu especialmente a media da temperatura mínima, 2,8 graos máis alta do habitual, mentres que a media da temperatura máxima foi apenas tres décimas inferior á habitual. Tamén febreiro foi máis cálido do habitual, con 1,5 graos por riba da media. Unha situación que "se explica polo feito de que a presenza constante de borrascas deixa madrugadas de ceos nubrados con ambiente bastante suave".
