Malia as reclamacións de maior flexibilidade para o persoal transfronteirizo que chegan desde a raia, os gobernos centrais seguen a restrinxir os movementos pola COVID en cinco puntos a só seis horas ao día
Desde que o pasado 31 de xaneiro os gobernos centrais de España e Portugal decidiron volver a pechar a fronteira como medida de control da COVID, veñen sucedéndose as protestas nas localidades da raia que ven como os reducidos puntos de paso permitidos supoñen importantes rodeos para o persoal que traballa ao outro lado ou para o transporte. Ao tempo, Madrid e Lisboa veñen abrindo a man e habilitando outros puntos de cruce ou ampliando o horario no que se permite empregalos, agora co establecemento doutros dous en Lobios e A Mezquita en horario de 7 a 10 e de 18 a 21 horas.
Desde este martes 2 de marzo os pasos fronteirizos que quedan habilitados entre Galicia e o Norte de Portugal son os seguintes:
Abertos as 24 horas do día todos os días:
- Tui-Valença
- Verín-Chaves
Abertos de luns a venres de 7 a 10 e de 18 a 21 horas:
- Salvaterra do Miño-Monçao
- Arbo-Melgaço
- Baltar-Montalegre
- Lobios-Lindoso
- A Mezquita-Vinhais
As protestas seguen, especialmente entre Tomiño e Cerveira, cuxo peche desde xaneiro obriga a rodeos por Tui-Valença a todo o persoal que vive ou traballa río abaixo
As protestas reclamando unha maior flexibilidade nas fronteiras para o persoal transfronteirizo están a ser especialmente rechamantes -por parte da Agrupación Europea de Cooperación Territorial (AECT) do Río Miño, que agrupa administracións locais das dúas beiras- na ponte entre Tomiño e Vila Nova de Cerveira, pechada por completo desde o 31 de xaneiro, o que obriga a longos rodeos ata o paso de Tui-Valença para todo o persoal que reside ou traballa río abaixo dese punto.
