Os traballadores transfronteirizos poderán seguir cruzando a raia pero a limitación de lugares habilitados obrigará a rodeos como durante a pasada primavera
Os gobernos centrais de Madrid e Lisboa veñen de decidir restablecer os controis nas fronteiras terrestres entre os dous estados a partir da 1 da madrugada deste domingo 31 de xaneiro e ata a 1 da madrugada do 10 de febreiro. Así o consignou no caso de España o BOE deste sábado. Durante este tempo só estará permitido cruzar a raia para unhas poucas excepcións, entre elas para os traballadores transfronteirizos ou para o regreso ao lugar de residencia. Aquí se poden consultar as excepcións establecidas por España e aquí as de Portugal.
Pero eses cruzamentos excepcionais da fronteira non se poderán realizar por calquera dos pasos existentes senón só por uns poucos. En toda a fronteira peninsular só haberá oito pasos abertos as 24 horas do día durante todos os días, dos que só dous están en Galicia: o de Tui-Valença e o de Verín-Chaves.
Outros catro pasos fronteirizos estarán abertos só de luns a venres e só de 8 a 10 horas da mañá e de 19 a 21 horas da tarde, pero deles só un está en Galicia, o de Salvaterra do Miño-Monçao. Na lista de pasos divulgada polo Ministerio do Interior non aparece o moi transitado paso de Tomiño-Viña Nova de Cerveira.
Os gobernos centrais volveron non atender as peticións lanzadas nos últimos días por administracións da eurorrexión e entidades transfronteirizas para que se mantivesen abertos máis pasos
Os estados non atenderon así as diversas peticións lanzadas nos últimos días por administracións da eurorrexión e entidades transfronteirizas que reclamaban que, con independencia das medidas de control que se establecesen, se mantivesen abertos todos os pasos fronteirizos para facilitar o desprazamento diario dos traballadores transfronteirizos. Agora estes terán que volver realizar longos rodeos para acceder aos seus postos laborais como xa tiveron que facer durante o confinamento da pasada primavera, cando malia as reiteradas reclamacións a fronteira entre Galicia e Norte de Portugal non se abriu por completo ata o 1 de xullo.
