O 90% da poboación galega maior de 12 anos ten xa cando menos unha dose da vacina contra a COVID

A vacinación da mocidade entre 12 e 19 anos acada o 72% e achega o obxectivo de que a gran maioría do estudantado de secundaria inicie o curso coa pauta completa. © Xunta

Hemeroteca

O vindeiro 9 de setembro comeza o curso escolar en educación infantil, educación primaria e educación especial e o 15 de setembro farao na educación secundaria obrigatoria, bacharelato e formación profesional. Nesas datas a Xunta espera que a práctica totalidade do estudantado entre 12 e 19 anos conte coa pauta completa da vacina contra a COVID. 

Estamos a 20 días do inicio do curso no ensino secundario, o 15 de setembro. A maior parte dos mozos e mozas entre 12 e 19 anos recibirá a segunda semana da vacina na semana do 13 ao 19 de setembro

De momento o proceso avanza a un ritmo moi elevado e, por exemplo, este mércores (último día con datos dispoñibles) máis de 30.000 mozos e mozas menores de 19 anos recibiron a súa primeira dose. Nos últimos días a porcentaxe de rapaces e rapazas entre 12 e 19 anos que recibiron a primeira dose da vacina elevouse dende o 24% do pasado venres ata o actual 72%. Ao tempo, afianzouse a protección dos mozos e mozas entre 20 e 29 anos, que chega xa ao 75,6% (unha dose) e ao 28,5% (pauta completa). 

A asistencia dos mozos e mozas de 12 a 19 anos está a ser moi elevada, sobre todo se temos en conta que nos atopamos no mes de agosto, acudindo preto dun 80% das persoas citadas, unha porcentaxe que se sitúa preto (e mesmo por riba) da rexistrada entre as persoas de 30 a 49 anos.

Estamos a 20 días do inicio do curso no ensino secundario (ao que acode a maior parte do grupo entre 12 e 19 anos). Dado que estes mozos e mozas están a recibir a vacina de Pfizer, para a que se establece unha separación de 21 días entre as dúas doses, unha porcentaxe moi elevada deste colectivo si poderá contar coa pauta completa na semana do 13 ao 19 de setembro, coincidindo co inicio do curso. O obxectivo de protexer ao estudantado de secundaria antes do inicio do curso ficará, polo tanto, preto de conseguirse.

A incidencia máis elevada segue a darse entre os mozos e mozas de 12 a 19 anos, triplicando a media galega

Esta protección demostrou ser moi importante, dado o elevado número de contaxios que seguen a producirse entre os mozos entre 12 e 29 anos, que de forma maioritaria aínda non recibiron a protección completa da vacina. As cifras de incidencia por idade revela que os positivos detectados entre os mozos e mozas de 12 a 19 anos seguen a ser moi numerosos (942 por cada 100.000 persoas en 14 días), o mesmo que entre os mozos e mozas de 20 a 29 (751 casos por cada 100.000 persoas). Cifras que duplican e case triplican a media galega. O terceiro grupo con máis incidencia é o dos menores de 12 anos, tamén sen vacinar

O 90% da poboación maior de 12 anos (a única que pode recibir a vacina) ten cando menos unha dose e o 79,7,% desta poboación diana recibiu a pauta completa. Se temos en conta o conxunto da poboación a porcentaxe redúcese ata o 81,7% cunha dose e o 72,4% coa pauta completa

Cantas persoas quedan, pois, sen vacinar en Galicia? Cantas son necesarias para acadar a desexada inmunidade de grupo? Esta segunda pregunta é difícil de responder. Nun comezo, e tendo en conta a capacidade de contaxio das primeiras variantes do virus, estableceuse o 70% da poboación como o limiar que debía ser superado para acadar o obxectivo de protexer do contaxio comunitario ao conxunto da sociedade. Porén, a maior transmisibilidade das novas variantes (especialmente da Delta, predominante en Galicia) obrigou a elevar este cálculo ata o 80% ou o 85%.

Neste momento, en Galicia o 90% da poboación maior de 12 anos (a única que pode recibir a vacina) ten cando menos unha dose e o 79,7,% desta poboación diana recibiu a pauta completa. Se temos en conta o conxunto da poboación a porcentaxe redúcese ata o 81,7% cunha dose e o 72,4% coa pauta completa. Cómpre ter en conta, iso si, que a porcentaxe máxima de poboación vacinada que neste momento se pode acadar é do 90,9% (a cidadanía de 12 anos ou máis). No momento en que se autorice a vacinación dos e das menores de 12 anos esta porcentaxe incrementarase.

Este xoves o presidente da Xunta, Alfonso Rueda, afirmou que "xa se insistiu nas repescas e seguirase insistindo", engadindo que "é case imposible chegar ao 100% de vacinados, pero tentaremos chegar ata onde se poida"

A práctica totalidade da poboación de 80 anos e máis (100%) e de 70 a 79 anos (99,7%) conta coa pauta completa. A porcentaxe é tamén moi elevada nas persoas de 60 a 69 anos (97,5%) e comeza a descender nos grupos de 50 a 59 anos (94,1%) e 40 a 49 anos (87,9%), grupos aos que xa lles foi ofrecida a vacina de forma total. 

As persoas destes grupos etarios que aínda non contan coa pauta completa ou ben escolleron non vacinarse ou tiveron problemas de axenda ou desprazamentos (en boa medida por causa do verán), aínda que contan coa posibilidade de volver solicitar unha cita para inmunizarse. Este xoves o presidente da Xunta, Alfonso Rueda, afirmou que "xa se insistiu nas repescas e seguirase insistindo", engadindo que "é case imposible chegar ao 100% de vacinados, pero tentaremos chegar ata onde se poida".

Están aínda pendentes de seren inmunizadas ao redor de 750 mil persoas. Delas, unha terceira parte son menores de 12 anos e aínda non poden ser vacinadas

En Galicia conta coa pauta completa o 79,7% da poboación que pode recibir a vacina (o 72,4%, se a conta se realiza sobre a poboación total). Isto significa que están aínda pendentes ao redor de 750 mil persoas. Entre elas o grupo máis importante é o dos e das menores de 12 anos (247.322 persoas), pero tamén destaca o grupo de 12 a 19 anos (160 mil persoas pendentes) e o de 20 a 29 anos (165 mil persoas pendentes). No grupo de persoas de 30 a 39 anos hai aínda 95 mil persoas pendentes e nos colectivos de maior idade son 83 mil as persoas aínda sen a pauta completa.

Despece

  • A incidencia da COVID permanece estable en Galicia, pero os gromos de Ordes e Melide esténdense polas súas comarcas

    Cribado realizado en Vigo hai uns meses © Xunta

    A incidencia a sete días, que reflicte mellor os cambios de tendencia, mantense estancada dende o pasado venres, pasando nestes sete días de 150 a 146 casos por cada 100.000 habitantes

    A incidencia da COVID en Galicia, que iniciou un rápido descenso na última semana de xullos, leva días amosando sinais de ralentización e mesmo de estancamento. Aínda que a incidencia acumulada a 14 días continúa a reducirse, a incidencia a sete días, que reflicte mellor os cambios de tendencia, mantense estancada dende o pasado venres, pasando nestes sete días de 150 a 146 casos por cada 100.000 habitantes. 

    Este venres Sanidade notifica a detección de 559 novos casos de COVID en Galicia. Ademais, hai que lamentar un novo falecemento, o que eleva a 2.553 a cifra total dende o inicio da pandemia,

    Nos hospitais, este venres non varían moito os datos, pero a mellora na última semana é clara. Hai 57 persoas nas UCI, cinco menos que hai sete días, e un total de 274 camas ocupadas por pacientes COVID, 56 menos que o pasado venres.

    Aínda que a incidencia a 7 días está estabilizada, hai varias áreas sanitarias que levan días en ascenso, encabezadas por Lugo, a que presenta peores datos, e tamén Santiago. Só A Coruña, Vigo e Ferrol continúan a descender de forma clara.

    O aumento dos contaxios comezou a trasladarse a outras localidade próximas. É o caso de Cerceda, Trazo ou Frades, nos arredores de Ordes. E de Agolada, Arzúa, Palas de Rei ou Boimorto, nas proximidades de Melide

    En canto aos concellos con máis casos por habitante, Ordes, A Veiga, Baralla, A Pastoriza, Melide, Monforte de Lemos, Viana do Bolo e Muxía presentan as maiores incidencias a 14 días, todos por riba dos mil casos por cada 100.000 habitantes.

    Ordes, Monforte e Melide levan varios días sufrindo gromos de grande importancia. Ademais, este aumento dos contaxios comezou a trasladarse a outras localidade próximas. É o caso de Cerceda, Trazo ou Frades, nos arredores de Ordes. E de Agolada, Arzúa, Palas de Rei ou Boimorto, nas proximidades de Melide 

    En canto ás cidades, Lugo mantén unha leve tendencia de ascenso e achégase aos datos de Ferrol, a urbe con máis incidencia. A Coruña, Vigo, Pontevedra e Santiago seguen a reducir os seus contaxios, mentres que Ourense -aínda con incidencias moi reducidas- volveu medrar.

  • Marcos Pérez Pena

    Marcos Pérez Pena

    Marcos Pérez Pena (Montevideo, 1980). Tras ter traballado en Vieiros.com e outros medios, en 2012 formou parte do equipo que puxo en marcha Praza. Doutor en Xornalismo pola USC, analizou na súa investigación o papel da prensa en Galicia durante a Transición.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza