Hai 32 aulas pechadas e as cifras amosan unha estabilidade da pandemia similar á do global da sociedade galega
A semana lectiva rematou este venres, segundo os datos divulgados este sábado pola Xunta, con 579 casos activos de COVID-19 nos centros de ensino non universitarios, unha cifra lixeiramente máis baixa que nas últimas semanas e en liña coa estabilidade xeral que veñen reflectindo os indicadores da pandemia no global da sociedade galega. Porén, a Xunta non facilita os novos positivos que se detectan, polo que as altas de contaxios anteriores poden deturpar a visión de conxunto.
En total son 32 as aulas pechadas en toda Galicia, e hai un único centro educativo pechado por completo, a Escola Infantil Santa Susana, situada na Alameda de Santiago, de titularidade da Xunta. Nese caso o Goberno galego só cuantifica como pechado o centro e rexistra un 0 no número de aulas pechadas, malia que o positivo dunha traballadora de apoio que estivo en contacto con todos os grupos de idade da escola obrigou a poñer en corentena á totalidade dos seus 70 nenos e nenas.
O centro máis afectado é o CEIP Plurilingüe Isidro Parga Pondal, de Oleiros, con 29 casos activos
Por centros, o máis afectado é o CEIP Plurilingüe Isidro Parga Pondal, de Oleiros, con 29 casos activos e tres aulas pechadas, seguidos por dous centros da Coruña e Vigo con nove casos activos cada un. Outros cinco centros de toda Galicia contan con dúas aulas pechadas cada un.
