A conselleira de Política Social, Fabiola García, anunciou esta semana a través da TVG que o Goberno galego comezará nas vindeiras semanas "a tramitación da Lei de impulso demográfico", destacando que “seremos a primeira Comunidade Autónoma que elevará a rango de lei as súas políticas neste ámbito” e subliñando que "a demografía é un dos principais retos" que ten por diante a Xunta, para o que pide "a implicación do conxunto da sociedade".

QuerENDO leva anos denunciando o esquecemento ao que se ven sometidas por parte do SERGAS

A asociación querENDO. Mulleres con Endometriose tardou apenas unhas horas en responder ás palabras da conselleira, lembrando que unha das doenzas que máis afectan á posibilidade de ter fillos e fillas é a endometriose, que en Galicia sofren ao redor de 60.000 mulleres, das que a metade teñen por este motivo problemas de fertilidade. QuerENDO leva anos denunciando o esquecemento ao que se ven sometidas por parte do SERGAS, criticando a invisibilidade desta doenza e reclamando unha serie de medidas para avanzar no seu estudo, no seu diagnóstico precoz e na mellora do seu tratamento.

O documento fai fincapé en que os actuais 8 anos de media no atraso diagnóstico da endometriose "empeoran as posibilidades de sermos nais de xeito natural"

Esta semana rexistraron un escrito, dirixido ao presidente da Xunta e á conselleira de Política Social no que lembran que algunhas desas 30.000 galegas con endometriose e problemas de fertilidade "non quererán ser nais pero outras moitas pelexan durante anos por selo e atopan na sanidade pública uns servizos de fertilidade que non dan resposta ás súas demandas ou dan unha resposta tan tardía que cando chega xa é inútil". 

O documento fai fincapé en que os actuais 8 anos de media no atraso diagnóstico da endometriose "empeoran as posibilidades de sermos nais de xeito natural". "Se a Xunta quere fomentar a natalidade debe mellorar a atención ás enfermas de endometriose. Elas son as nais que vostedes están buscando", engaden.

Entre as demandas que realiza querENDO está a de dar solución ás "longas lista de espera dos servizos de fertilidade", lembrando que "o acceso aos sistemas de reprodución asistida non nos contemplan ás mulleres con endometriose como persoas con prioridade de acceso, polo que a nosa fertilidade, xa diminuída de por si, vai empeorando durante os períodos de espera".

"As futuras nais están aí, nas súas casas aforrando para que unha clínica privada lles resolva o que a sanidade pública non fai"

Reclaman igualmente "que se contemple a preservación de tecido ovárico para as mulleres con endometriose antes dunha cirurxía ou dun tratamento do que posiblemente saian estériles de por vida". Piden tamén que se fomente a doazón de óvulos na sanidade pública, criticando que a axencia pública de doazóns se desentenda da captación de doadoras de óvulos, "entregando ese tipo de doazón á sanidade privada".

Demandan así mesmo que se contemple a ovodoazón para as mulleres con baixa reserva ovárica. "As futuras nais están aí, nas súas casas aforrando para que unha clínica privada lles resolva o que a sanidade pública non fai. As futuras nais somos nós, as mulleres con endometriose, as nais rexeitadas", din. "Nós non somos a solución ao problema demográfico de Galicia pero podemos ser parte da solución. Poden mirar por nós?", conclúen.