As celebracións das Letras ao redor de Florencio Delgado Gurriarán botan a andar con Valdeorras e o exilio mexicano como centro

Presentación do proxecto 'Primavera das Letras' sobre Florencio Gurriarán, esta semana en Vilamartín de Valdeorras © RAG

As celebracións das Letras Galegas ao redor da figura de Florencio Delgado Gurriarán comezaron esta semana e fixérono, como non podía ser doutro xeito, en Vilamartín de Valdeorras, o lugar onde o poeta e intelectual naceu en 1903. O colexio de Vilamartín de Valdeorras acolleu este martes a presentación dunha nova edición do proxecto Primavera das Letras, que nos vindeiros meses achegará contidos didácticos e informativos sobre Florencio Delgado Gurriarán á comunidade educativa.

O colexio de Vilamartín de Valdeorras acolleu este martes a presentación dunha nova edición do proxecto Primavera das Letras, que nos vindeiros meses achegará contidos didácticos e informativos sobre Florencio Delgado Gurriarán á comunidade educativa

Ledicia Costas asina a biografía do poeta valdeorrés, xa dispoñible na web, que inclúe as ilustracións de Blanca Millán. Este ano, ademais, a Academia contará con escritoras e escritores de literatura infantil para lle dar a coñecer á xente miúda a vida e obra da persoa protagonista do Día das Letras Galegas, explicou a directora do proxecto, Fina Casalderrey.

A proposta, que conta co financiamento da Deputación da Coruña, seguirá ademais a ofrecer actividades interactivas e o concurso Contádenos o voso Día das Letras, e estreará proximamente unha nova sección para, alén da celebración das Letras, ofrecer outros contidos divulgativos da lingua e da literatura galegas e favorecer o diálogo cos centros escolares.

Os verdadeiros protagonistas desta primeira homenaxe da RAG a Delgado Gurriarán na súa terra foron os nenos e nenas da única escola deste concello, que conta con vinte e cinco menores matriculados

Achegar a Florencio Delgado Gurriarán aos nenos e nenas

Os verdadeiros protagonistas desta primeira homenaxe da RAG a Delgado Gurriarán na súa terra foron os nenos e nenas da única escola deste concello, que conta con vinte e cinco menores matriculados, varios deles veciños e veciñas de Córgomo, a parroquia onde naceu o homenaxeado. Parte do alumnado interpretou en directo a adaptación musical do poema “Vente, ventiño do norte” realizada polo mestre de música, Jaime Díaz Paradelo, e podemos ver un vídeo no que participa boa parte do alumnado do colexio dramatizando e recitando outras composicións do poeta de Valdeorras.

“Sentímonos moi orgullosos de que o noso Corgomófilo sexa a figura homenaxeada o vindeiro 17 de maio. A súa elección significa para nós o recoñecemento da cultura valdeorresa"

No acto destacouse a importancia de achegar ás crianzas a figura homenaxeada. “Ledicia, coa maxia do seu talento literario, conseguiu traer o Florencio neno do Máis Alá, non podía ser doutro xeito, para que el mesmo, en primeira persoa, nos relate a súa infancia en Córgomo e convídanos a subir canda el nese barco que cruzou o océano dende Bordeos ata Veracruz. Dos seus medos, das emocións, dos libros que escribiu, das revistas que puxo a andar... de todo iso nos fala”, subliñou Fina Casalderrey. 

O director do CEIP Xosé Manuel Folla Respino destacou así mesmo a oportunidade que significan as Letras Galegas de Florencio Delgado Gurriarán para o fomento da lingua galega entre as xeracións máis novas. “Sentímonos moi orgullosos de que o noso Corgomófilo sexa a figura homenaxeada o vindeiro 17 de maio. A súa elección significa para nós o recoñecemento da cultura valdeorresa, e desexamos que sexa un referente para as futuras xeracións desta comarca e que axude a fomentar o uso do galego entre elas”, dixo.

A biografía de Gurriarán relata a súa viaxa no Ipanema, que o levou a México © primaveradasletras.gal

A sesión plenaria extraordinaria do 17 de maio terá lugar en Córgomo, a aldea onde naceu no ano 1903 e da que tomou un dos seus alcumes, Corgomófilo

Celebración en Valdeorras

Nesta ocasión a comarca de Valdeorras será o centro dos actos da Academia ao redor das Letras Galegas. A sesión plenaria extraordinaria do 17 de maio terá lugar en Córgomo, a aldea onde naceu no ano 1903 e da que tomou un dos seus alcumes, Corgomófilo. Os discursos correrán a cargo da académica Rosario Álvarez e dos académicos Ramón Villares e Xesús Alonso Montero.

Ademais da Primavera das Letras, a RAG ten en marcha outros contidos relacionados do autor. Na web da Academia xa se pode ler a biografía do poeta asinada por Ricardo Gurriarán e tamén se comparten os primeiros episodios da serie de micropezas Polos vieiros de Florencio, da que se estreará cada semana un novo capítulo. A serie permitiralle ao público ir achegándose, da man de distintas voces, a aspectos relacionados coa vida e coa obra do autor

As celebracións porán o foco no labor da intelectualidade galega no exilio, especialmente en México

Así mesmo, o Portal das Palabras, a páxina web da RAG e a Fundación Barrié, presentou hai unhas semanas a súa sección das Letras Galegas 2022, onde xa están dispoñibles os primeiros contidos: tres xogos interactivos sobre o rico vocabulario da poesía de Florencio Delgado Gurriarán e un ‘Allos con bugallos’ sobre o léxico dos seus poemas mexicanos.

Florencio Delgado Gurriarán, á esquerda, paseando co seu irmán Edmundo no ano 1936 © RAG / Ricardo Gurriarán

"Arredor do Padroado da Cultura Galega de México houbo un momento de actividade extraordinaria na que Florencio Delgado Gurriarán tivo unha presenza activa moi importante, xunto a Luís Soto, Carlos Velo ou os irmáns Bilbatúa”

O labor do exilio galego en México

Ademais, as celebracións do Ano da Letras porán o foco no labor da intelectualidade galega no exilio, especialmente en México, moito menos coñecido que o do Río da Prata, por exemplo. En México Florencio Delgado Gurriarán colaborou na posta en marcha da revista Vieiros, con Luís Soto e Carlos Velo, o Padroado da Cultura Galega, a Irmandade Galeguista e o Ateneo de Galicia. 

"Arredor do Padroado da Cultura Galega de México, houbo un momento de actividade extraordinaria na que Florencio Delgado Gurriarán tivo unha presenza activa moi importante, xunto a outras figuras como o xornalista Luís Soto, o cineasta Carlos Velo ou os irmáns Bilbatúa”, destacou o presidente da RAG, Víctor Freixanes. "O exilio en México levou a cabo un labor fundamental en todas as áreas creativas, dende a literatura ao cinema e a defensa da cultura e da identidade galega", destacaba nesta entrevista Ricardo Gurriarán.

Esta semana, ademais, Galaxia presentou unha Antoloxía poética do autor, que pon o ramo final á súa publicación editorial arredor do homenaxeado

Antoloxía poética, da man de Galaxia

Esta semana, ademais, Galaxia presentou unha Antoloxía poética do autor, que pon o ramo final á súa publicación editorial arredor do homenaxeado. A obra, en edición de Débora Álvarez Moldes e Margarida Pizcueta Barreiro, "xorde pola necesidade de dar a coñecer un feixe de poemas, quizais os menos coñecidos, e non por iso menos importantes". O libro pretende ofrecer unha mostra do máis significativo da súa obra, ordenada cronoloxicamente, desde os cánticos iniciais do seu universo valdeorrés ata a poesía comprometida, satírica e de loita, fiel co seu pensar, que realizou desde o exilio.

Nos últimos meses Galaxia publicou os tres poemarios de Florencio Delgado Gurriarán: Bebedeira, Galicia infinda e O soño do Guieiro. E tamén as biografías Florencio Delgado Gurriarán. Poeta na terra, na guerra e no exilio. Antoloxía poética, de Xesús Alonso Montero e Vida e obra dun poeta valdeorrés, republicano e galeguista, de Ricardo Gurriarán, publicado orixinalmente en 1999 e agora recuperado.

Capa da 'Antoloxía Poética' de Florencio Gurriarán publicada por Galaxia © Galaxia

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.