Tras o anuncio de Sánchez para que Calunya e Euskadi sexan membros asociados e a aceptación pola Xunta de que Galicia quede fóra, 17 fundacións e entidades literarias consideran "inaceptable" a "discriminación"
"A ausencia de Galicia como aspirante a membro asociado constitúe unha inaceptable discriminación". Así veñen de pronunciarse, nunha declaración pública conxunta, 17 das principais fundacións e entidades literarias galegas sobre a proposta do Goberno de España de que Euskadi e Catalunya, pero non Galicia, formen parte da Unesco como membros asociados. Unha ausencia de Galicia que o presidente da Xunta, Alfonso Rueda, avala persoalmente porque considera que o Goberno de Sánchez xa está a representar adecuadamente os intereses do país.
Tras o anuncio de Sánchez de que promoverá a incorporación de Catalunya e Euskadi como membros asociados da Unesco, Praza.gal preguntou pola postura do Consello da Cultura Galega (CCG) e da Real Academia Galega (RAG), que amosaron o seu desexo de que Galicia entre na organización internacional ao mesmo nivel que as outras dúas nacionalidades históricas. Sobre esa postura das dúas principais institucións culturais de Galicia, a primeira delas de carácter estatutario, preguntou á súa vez Praza.gal ao presidente da Xunta, que se distanciou delas asegurando que non é prioritario.
As entidades apelan "á cidadanía e as institucións galegas pertinentes a que demanden igualmente para Galicia a condición de membro asociado da Unesco"
Agora as principais fundacións literarias do país defenden que "Galicia, ao igual que Cataluña e Euskadi, é unha comunidade autónoma coa consideración constitucional de nacionalidade histórica e non existe causa ningunha para que non se beneficie desa probable incorporación". As entidades consideran que a ausencia de Galicia sería "unha inaceptable discriminación" e entenden que o país, "como comunidade cultural e lingüística singular e diferenciada, debe ter presenza específica na Unesco, exactamente igual e polos mesmos motivos que Cataluña e Euskadi", xa que "a Unesco constitúe un espazo privilexiado para o recoñecemento, a cooperación e a visibilidade das culturas no mundo".
A declaración pública emitida polas entidades, aberta a máis incorporacións, remata apelando "á cidadanía e as institucións galegas pertinentes a que demanden igualmente para Galicia a condición de membro asociado da Unesco".
Tras as declaracións de Rueda o 29 de decembro aceptando que Sánchez só aposte por Catalunya e Euskadi, unha semana máis tarde, o 8 de xaneiro, o Consello da Cultura celebrou o seu primeiro pleno do ano, ao que asistiu o presidente da Xunta. Segundo fontes coñecedoras do encontro, ningún dos asistentes ao pleno formulou a Rueda ningunha apreciación ao respecto.
As entidades asinantes da declaración son:
- Asociación Évame Oroza
- Casa-Museo Emilia Pardo Bazán
- Casa-Museo Xosé Manuel Pazos
- Casa Natal de Otero Pedrayo e Vicente Risco
- Fundación Antón Losada Diéguez
- Fundación Alexandre Bóveda
- Fundación Eduardo Blanco Amor
- Fundación Eduardo Pondal
- Fundación Insua dos Poetas
- Fundación Isla Couto
- Fundación Manuel María
- Fundación Margarita Ledo Andión. Casa da Galería
- Fundación Novoneyra
- Fundación Penzol
- Fundación Rosalía de Castro
- Fundación Xosé Neira Vilas
- Hotel Literario Bela Fisterra
