O presidente non ve prioritario que Galicia estea na Unesco xunto con Catalunya e Euskadi e eloxia o traballo do Goberno de Sánchez na candidatura da Ribeira Sacra a Patrimonio da Humanidade
Tras o anuncio do presidente do Goberno de España, Pedro Sánchez, de que promoverá a incorporación de Catalunya e Euskadi como membros asociados da Unesco, o Consello da Cultura Galega (CCG) e a Real Academia Galega (RAG) amosaron o seu desexo de que Galicia entre na organización internacional ao mesmo nivel que as outras dúas nacionalidades históricas. Porén, este luns o presidente da Xunta arrefriou estas expectativas.
"Non o considero prioritario", di Alfonso Rueda. Asegura estar satisfeito coa representación de Galicia ante a Unesco que fai o Goberno de Pedro Sánchez.
Para o Consello da Cultura Galicia "merece unha representación equitativa á doutras comunidades históricas nas esferas internacionais", mentres que para a RAG participar na Unesco "sería unha boa noticia por canto contribuiría á visibilidade e recoñecemento" da cultura galega. Así o aseguraron as dúas institucións a preguntas de Praza.gal, que este luns preguntou á súa vez sobre esas valoracións ao presidente da Xunta.
Rueda está "moi satisfeito" do traballo do Goberno de Sánchez ante a Unesco: "sentímonos representados"
Rueda amósase crítico co anuncio de Sánchez da inclusión de Catalunya e Euskadi na Unesco, que interpreta como unha nova "concesión" aos partidos nacionalistas que apoian o seu Goberno. Pero ao tempo que critica a Sánchez por iso, o presidente da Xunta amósase satisfeito do traballo que fai ese mesmo Goberno na Unesco en representación de Galicia.
Segundo Rueda, "tendo en conta as peticións que ten encima da mesa a Xunta respecto de transferencias" que reclama ao Goberno de España, o ingreso na Unesco "non o considero máis prioritario". "Estamos moi satisfeitos do apoio que tivemos ata agora [do Goberno de España] para a declaración da Ribeira Sacra como Patrimonio da Humanidade, esta colaboración está funcionando, sentímonos representados polo noso país", di Rueda.
Pola contra, fronte á presenza directa de Galicia na Unesco e non a través do Estado, o presidente da Xunta asegura que "a Galicia interésanlle preferentemente outras cousas", entre as que citou "que non suban as tarifas da AP-9" ou que o Goberno de España ceda as competencias sobre os permisos de traballo para persoas estranxeiras. Rueda nada dixo de que unhas cuestións non sexan incompatibles con outras.
