'Longa noite' foi unha das películas triunfadoras no Festival de Cine de Locarno, que finalizou este sábado. O filme fíxose con prestixioso premio Boccalino D'Oro ao mellor director, que recolleu o realizador Eloy Enciso. A Asociación da Crítica de Cine Independente, que entrega o recoñecemento, destacou que se trata dun "filme indispensable, que afonda nos pregues da memoria e da historia co fin de sacar á luz, nunha longa viaxe a través da noite, os perpetuos mecanismos da opresión e a dominación".
A película narra con actores e actrices non profesionais a historia dun home que regresa a súa terra natal anos despois da Guerra Civil, descubrindo a través de conversas durante a súa viaxe como a propia guerra e a ditadura franquista transformaron as relación entre as persoas. O guión parte de fragmentos de obras de autores como Max Aub, Luís Seoane ou Ramón de Valenzuela e a partir deles busca “reconstruir o tempo da posguerra a través de narracións e memorias desa época". Trátase dun filme coral, onde un conxunto de personaxes e voces amosan "unha imaxe da Galicia daqueles anos, en especial os mecanismos do poder nas sociedades totalitarias”, destaca o director.
Trátase da terceira longametraxe de Enciso, despois de Pic-nic (2006) e Arraianos (2012), que xa fora seleccionada en Locarno e premiada no BACIFI de Bos Aires.
'Longa Noite' estrearase o vindeiro 5 de decembro nos cines, pero antes viaxará aos festivais de Toronto, dentro de la Sección Wavenlenghts, e Nova York, na sección Projections, no que suporá o seu primeiro pase nos Estados Unidos.
Misha Bies Golas, Nuria Lestegás, Celsa Arújo, Verónica Quintela, Manuel Pumares e Suso Mellán son algúns dos actores e actrices que protagonizan a película, producida por Filmika Galaika. A outra película desta produtora que participaba en Locarno, 'Those That, At a Distance, Resemble Another', de Jessica Sarah Rinland, obtivo unha Mención Especial do Xurado na sección 'Moving Ahead'.
