Un acto poético e musical celebra as sete décadas da escultura portuense da poeta galega
No verán de 1954 o Porto incorporaba aos símbolos da cidade unha estatua en homenaxe a Rosalía de Castro. O daquela alcalde portuense, Machado Vaz, presidiu o acto de inauguración desta estatua, realizada polo escultor modernista Salvador Barata Feyo, e deitou unhas flores na base do monumento, na compaña da filla da escritora, Gala Murguía de Castro, e outras autoridades galegas.
Setenta anos despois a Câmara Municipal do Porto acolleu un novo acto de irmandamento galego-portugués a través da figura de Rosalía de Castro. Este luns, 14 de outubro, as flores volveron ao pé da estatua e houbo unha lectura de poemas a cargo das escritoras Chus Pato, recentemente recoñecida co Premio Nacional de Poesía do Ministerio de Cultura, e Sofia Bodas de Carvalho.
A cidade do Porto celebrou con varios actos os 70 anos da inauguración da estatua de Rosalía de Castro na Praça da Galiza. Trátase dunha iniciativa da Fundación Rosalía de Castro e que estivo organizada pola Câmara Municipal en colaboración coa Xunta, o Parlamento galego e a propia Fundación.
Unha filla da Figueira de Rosalía quedou platada nos xardíns do Palácio de Cristal nun evento ao que asistiron os presidentes da Xunta, do Parlamento e da Fundación Rosalía xunto ao alcalde do Porto
Tras o recital de poesía na propia Praça da Galiza (que pronto se converterá tamén nunha parada da nova liña de metro da cidade, como amosan as obras á vista durante o acto), as autoridades plantaron unha filla da Figueira de Rosalía, declarada como Árbore Senlleira, nos Xardíns do Palácio de Cristal.
A xornada clausurouse cun acto na Capela de Carlos Alberto, nos xardíns do Palácio de Cristal, no que interviron o alcalde do Porto, Rui Moreira; o presidente da Fundación Rosalía, Anxo Angueira; o presidente do Parlamento Galego, Miguel Santalices; e o presidente da Xunta, Alfonso Rueda. E finalizou cunha actuación de Amancio Prada e a súa interpretación dos versos da poeta galega universal.
