Unha ducia de carteis históricos do San Froilán (sen chisco de IA)

Os comezos: do texto ao art déco

Un repaso aos carteis máis antigos das festas de San Froilán que se conservan amosa a evolución dende uns inicios nos que as imaxes estaban ausentes (á esquerda, un cartel de 1879) a creacións nas que se deixaba ver a pegada do modernismo (á dereita, o de 1906) e do art déco. 

O cartel de 1906, foi encargado a Casa Ortega, de Valencia, e fora empregado un ano antes nas festas de Pamplona.

Costumismo e elementos do folclore

Unha ollada aos carteis empregados durante a ditadura franquista amosa o uso recorrente nos anos 50 do pasado século de elementos folclóricos, principalmente as gaitas e os traxes rexionais, xunto coa aparición tanto da Muralla coma da Catedral da cidade.

Chegan os anos 60

A chegada dos anos 60 trouxo maior variedade e creatividade aos carteis, con obras máis esquemáticas (arriba á dereita, o correspodente ao ano 1966) ou nas que se incorporaba a fotografía (1968 e 1970). En todo caso, mantíñase o uso de elementos que foron e son recorrentes na cartelaría do San Froilán, como as referencias ao gando (arriba á esquerda, 1963, obra de Antonio Moragón), ao polbo e as gaitas (1968) ou a presenza da Muralla.

San Froilán en democracia

Despois do cartel dedicado ao Bimilenario da cidade de Lugo, celebrado en 1976, a chegada da democracia levou á escolla de fermosos carteis no anos 1977 e 1978. O de 1977 foi unha encarga realizada a Isaac Díaz Pardo.

Anos 80: 'Premio Nacional de Deseño Gráfico San Froilán'

A partir do ano 1983 comeza a convocarse o 'Premio Nacional de Deseño Gráfico San Froilán', a través do que se escolle o cartel para cada edición das festas. 

Variedade de referentes: de Pelúdez ás atraccións da feira

Os carteis dos anos 90 traen unha variedade de estilos e de referentes, coa presenza neles do inevitable Pelúdez, as atraccións da feira, o polbo e unha énfase no carácter social e masivo das festas

E veña polbo!

Se hai un elemento case que inevitable nos carteis do San Froilán, especialmente nos escollidos nos primeiros anos deste século é o polbo, convertido nun dos grandes símbolos das festas e que o identifica dentro e fóra de Lugo.

...Pero tamén pandeiretas

Outro elemento que gañou peso nos últimos anos nas representacións do San Froilán foron as pandeiretas e as pandeireteiras, en ocasións en afortunada mestura coas táboas do polbo.

As festas da cidade

Outra cousa que case nunca falta nos carteis do San Froilán é a propia cidade de Lugo, representada a través dos seus monumentos máis recoñecibles.

Tamén carteis do San Froilán miúdo

Dende o ano 2023 tamén se escolle un cartel do San Froilán miúdo nun concurso no que poden participar nenos e nenas ata os 15 anos.

A efémera escolla dun profesional da ilustración

O pasado ano a escolla do cartel para a edición 2025 das festas de San Froilán marcou un (efémero) punto de inflexión. Seguindo as recomendacións das entidades profesionais coma a Asociación Galega de Profesionais da Ilustración, optouse por encargar directamente o cartel a un profesional lucense da ilustración e do deseño, buscando un maior recoñecemento para esta actividade. O escollido foi Iván Mouronte.

Carteis do San Froilán 2026

Este ano, en cambio, o goberno municipal saído da moción de censura do mes de maio desbotou a encarga profesional e recuperou o concurso amateur, no que foi escollida a proposta de Alfredo León Mañu. O concurso do San Froilán miúdo a gañadora -por segundo ano consecutivo- foi Irene Huéscar Villapún, de 11 anos de idade.