Unha ducia de deportistas de Galicia nos Xogos Olímpicos de París con opción de medalla

Ana Peleteiro

Unha das mellores opcións de medalla é a de Ana Peleteiro. A atleta de Ribeira, bronce en Toquio, vén de proclamarse campiona de Europa en Budapest e é unha das favoritas á vitoria, máis aínda tendo en conta a ausencia de Yulimar Rojas por lesión. A cubana Leyanis Pérez, a dominiquesa Thea LaFond, a estadounidense Keturah Orji e a xamaicana Shanieka Ricketts serán as súas principais rivais. O 2 de agosto (cualificación) e 3 de agosto (final) temos unha das grandes citas dos Xogos.

Adrián Ben

Máis difícil é a opción do viveirense Adrián Ben, pero hai que lembrar que hai tres anos foi quinto en Toquio e o pasado ano proclamouse campión de Europa en pista cuberta. Hai un mes foi sexto no Campionato de Europa ao aire libre. Ben nunca se rende e de seguro que pelexará por entrar na súa segunda final olímpica. O 7 de agosto corre as series, o 9 de agosto a posible semifinal e o 10 de agosto sería a final olímpica.

Antía Jácome

Chegamos á auga, onde mellor se desenvolven galegos e galegas. A pontevedresa Antía Jácome compite no C2 500 a partir do 6 de agosto e no C1 200 a partir do 8 de agosto. O 9 e o 10 de agosto serán as semifinais e finais, nas que espera estar. E aí a medalla pode estar moi preto.

Carlos Arévalo e Rodrigo Germade

O betanceiro Carlos Arévalo e o cangués Rodrigo Germade xa saben o que é gañar unha medalla e buscan un segundo metal. Ambos compiten no K2 500 dende o 6 de agosto e forman parte do potente K4 500 español que tamén debuta ese día. O 8 de agosto (o K4) e o 9 de agosto (K2), con grandes opcións de medalla.

Teresa Portela e Carolina García

Tamén está entre as favoritas ao triunfo o K4 500 feminino, do que forman parte a canguesa Teresa Portela e a pontevedresa Carolina García. Ademais, García compite no K2 500. A partir do 6 de agosto entrarán en competición e os días 8 e 9 será a loita polos metais.

Manu Ochoa

Tamén en piragüísmo, pero en augas bravas, o tomiñense Manu Ochoa participará na categoría de kayak cros, modalidade na que o pasado mes de xuño obtivo a vitoria en Praga na Copa do Mundo. Competirá entre o 2 e o 5 de agosto. Non é favorito a medalla e un diploma olímpico sería un grande éxito. Pero temos dereito a soñar.

Támara Echegoyen

Non saímos da auga, pero imos a mar aberto. Alí, Támara Echegoyen busca unha nova medalla olímpica, desta volta no 49erFX, no que compite con Paula Barceló. A parella foi cuarta en Toquio e aspira a acadar unha medalla. O 29 de xullo comezarán a competición e o 1 de agosto celebrarase a derradeira regata, nas que se definirán os metais.

María de Valdés

Tamén en augas abertas, pero en natación, aspira a unha medalla a malagueña María de Valdés, afincada na Coruña dende hai sete anos. A carreira de 10 quilómetros será o 8 de agosto e a nadadora pode estar preto dos metais. Este ano foi medalla de prata na mesma proba no Campionato do Mundo de Natación. 

Caetano Horta

En remo compite o noiense Caetano Horta na modalidade de dobre skul lixeiro. Horta foi sétimo en Toquio, polo que non hai que descatalo para nada. O mesmo sucede co moañés Rodrigo Conde, no dobre skul, despois de ter acadado unha medalla de prata no Campionato do Mundo de 2022. Conde compite dende o 27 de xullo e Horta dende o día 28. As finais polas medallas serán o 1 e 2 de agosto, respectivamente.

Enmanuel Reyes

Tamén hai opcións de medalla en boxeo, con Enmanuel Reyes, cubano de orixe que reside na Coruña dende hai anos. En Toquio foi quinto e o pasado ano foi bronce no Campionato de Europa. En París competirá na categoría de 92 quilos e figura entre os favoritos para acadar un metal. Comeza a boxear o 28 de xullo e o 9 de agosto celebraríase a hipotética final.

Teresa Abelleira

E rematamos cos deportes de equipo, onde hai galegas nos combinados de balonmán, baloncesto e fútbol feminino e un xogador na selección de balonmán masculino. Nas catro modalidades hai opcións de medalla, especialmente no fútbol e no baloncesto feminino e no balonmán masculino.

Se temos que escoller unha favorita ás medallas, quedamos coas xogadoras da selección de fútbol, campioas do mundo hai un ano, un equipo no que a pontevedresa Teresa Abelleira é a peza clave no centro do campo. A competición de fútbol feminino comezou xa este xoves co España-Xapón e a posible final será o 10 de agosto.

Rodrigo Corrales

No balonmán masculino, Rodrigo Corrales forma parte dunha selección española que foi bronce en Toquio e nos dous últimos mundiais e que aspira claramente aos metais. A competición para el comeza este sábado co España-Eslovenia, de camiño á loita polas medallas, o 9 e 10 de agosto.

Non hai que esquecer as opcións da viguesa María Araújo e a ourensá Paula Ginzo coa selección española de baloncesto, que comezan a competir este domingo co España-China.