Unha ducia de futbolistas de Galicia que xogaron a Eurocopa

Marcelino

Aínda que o pontevedrés Luís Otero foi o primeiro galego en xogar coa selección española de fútbol (en Amberes en 1920), e o coruñés Chacho o primeiro que xogou un Mundial (en 1934), houbo que agardar ata 1960 para ver a primeira Eurocopa, denominada inicialmente Copa de Nacións de Europa. En 1964 España gañou o campionato nunha fase final xogada en Madrid e Barcelona. Fíxoo nunha final ante a besta negra do Franquismo, a URSS, cun gol do aresán Marcelino Martínez Cao no minuto 84. Entre 1961 e 1967 Marcelino xogou 14 partido coa selección española e marcou catro goles.

Luís Suárez

Nesa selección española campiona de Europa había tres galegos titulares: Marcelino, Amancio Amaro e Luís Suarez. Case nada. Balón de Ouro en 1960, entre 1957 e 1972 Luís Suárez xogou 32 partidos coa camisola vermella e marcou 13 goles. Participou tamén nas Eurocopas de 1960 e 1972.

Adeus a Luís Suarez, mito galego do fútbol mundial

70 anos do debut de Luisito Suárez en Primeira División

Amancio Amaro

O tamén coruñés Amancio é, despois de Michel Salgado, o galego que máis partidos xogou coa selección española (42, con 11 goles) entre 1962 e 1974, participando tamén nas Eurocopas de 1968 e 1972. Neste tempo os futbolistas galegos eran habituais nas convocatorias, destacando por exemplo o lucense Severino Reija ou o pontevedrés José Armando Ufarte

Miguel Ángel

O ourensán Miguel Ángel "O Gato", defendeu a portería do Real Madrid entre 1968 e 1986 e xogou tamén na selección española, nun total de 18 partidos, entre eles a Eurocopa de 1976 e os mundiais de 1978 e 1982. Arconada apartouno da titularidade. Outro galego, o betanceiro Paco Buyo, ocupou posteriormente a portería do Real Madrid e tamén en sete ocasións a da selección española, participando nas Eurocopas de 1984 e 1988.

Tomás Reñones

O compostelán Tomás Reñones xogou tamén a Eurocopa de Alemaña en 1988. En total, participou en 19 partidos coa selección española.

Fran

Houbo que agardar uns anos para ver de novo a varios galegos convocados para unha Eurocopa. O deportivista Francisco González Pérez nunca acadou na selección española o protagonismo que tiña no seu club, pero xogou 16 partidos e destacou na Eurocopa do ano 2000.

Michel Salgado

Nesa Eurocopa do ano 2000 participou tamén o celeste Michel Salgado, que en total xogou 53 partidos coa selección española entre 1998 e 2006. O lateral das Neves estivo tamén no Mundial de 2006 pero perdeu a Eurocopa de 2004 e o Mundial de 2002 por senllas lesións.

Ricardo Cabanas

Ollo, tamén atopamos xogadores galegos (ou de orixe galega) noutras seleccións, especialmente na de Suíza, país na que diáspora galega mantén un peso importante. Ricardo Cabanas Rey -convocado tamén coa selección galega- participou en 54 partidos coa selección helvética e xogou as Eurocopas de 2004 e 2008.

Vero Boquete

Dende 1984 tamén as mulleres xogan Eurocopas de fútbol, de forma oficial a partir de 1991. A compostelá Vero Boquete abriu camiño e entre 2008 e 2016 marcou 23 goles coa selección española e participou na fase final da Eurocopa de 2013, marcando dous tantos.

Teresa Abelleira

España gañou o Mundial de fútbol de 2023. Nesa histórica selección destacou a pontevedresa Teresa Abelleira, auténtico metrónomo do equipo campión, co que tamén xogara a Eurocopa de 2022.

Joselu

E chegamos á Eurocopa de Alemaña 2024. Na convocatoria da selección española atopamos só un galego, o madridista Joselu, nacido en Alemaña, pero criado en Silleda. Únese a unha longa lista de galegos participantes nalgunha Eurocopa, na que están tamén (non collen todos nunha ducia) Lucas Vázquez, Jorge Otero ou Thiago Alcántara e moitos outros que aínda que non xogaron nunha fase final si o fixeron nas fases clasificatorias, como Aspas, Borja Oubiña, Quique Costas ou Marcos Vales. 

Ricardo Rodríguez

Pero ollo, novamente. Nesta Eurocopa de Alemaña non é España a única selección que inclúe máis xogadores galegos ou de orixe galega. En Suíza atopamos a Ricardo Rodríguez Araya, nacido en Zürich de pai galego e nai chilena. Suma 115 partidos coa selección helvética e esta é a súa terceira Eurocopa, despois das de 2016 e 2020. Nesa Eurocopa de 2020 tamén xogou con Suíza Loris Benito Souto, igualmende de orixe galega.