Unha ducia de imaxes de Chichi Campos, protagonista do Día da Ilustración 2024

Pioneiro da banda deseñada galega

Xesús Campos naceu en La Laguna (Tenerife) en 1952 pero sendo aínda moi neno a familia trasladouse á Coruña. Xa dende moi novo se interesou polo debuxo e a banda deseñada. En 1972 fundou con Xosé Díaz e Luís Caparrós o grupo de banda deseñada do Castro e un ano despois expuxo con eles e con Xaquín Marín e Reimundo Patiño no Círculo Mercantil de Santiago, unha exposición colectiva que percorreu varias vilas de Galicia ademais de Madrid e Barcelona e que foi un dos puntos de partida da banda deseñada en Galicia.

A cova das choias

Ademais, Chichi Campos participou na publicación de A cova das choias (1974), a primeira revista do cómic galego, editada en Xenebra (Suíza). Impresa en Suíza, traíase a Galicia clandestinamente e distribuíase de man en man. O Consello da Cultura publicou este especial sobre a revista

Anciñas e Nico

En decembro de 1977 casa con Ángeles “Anciñas” Ripoll e a parella foi vivir a Lugo, onde Chichi seguía traballando na libraría Souto e autoeditaba "fanzines" como O Carallo 29. Pero nese momento Isaac Díaz Pardo chámao para poñer en marcha a Galería Sargadelos de Santiago, polo que se mudaron a Compostela. En decembro de 1979 teñen un fillo, Nico.

Militante comunista

Foi un destacado militante do PCG, encargándose da constitución das Xuventudes Comunistas de Galicia e presentándose como número 2 na lista do partido nas eleccións municipais en Compostela e quedando moi preto de ser elixido concelleiro. Ademais, colaborou en Mundo Obrero e A Voz do Pobo .

Can sen Dono

Nesa época participa en moitas actividades do sector, como o I Seminario Galego do Humor, celebrado no Castro, onde coñece a Pepe Carreiro. Ese é o punto de partida de Can Sen Dono, revista de humor gráfico en galego que botou a andar en 1983 e que estivo activa ata 1991. Campos colaborou en todos os números ata o seu falecemento.

Estampas do mundo elegante

Ademais de Can sen Dono, Chichi Campos colabora neses anos coas súas caricaturas, historias e debuxos en varios xornais e revistas, como El Correo Gallego, El Ideal Gallego, La Naval ou Valiundiez. Pero, sobre todo, en A Nosa Terra, onde entre decembro 1983 e febreiro de1991 publicou de forma regular.

Guionista na TVG

En 1985 Chichi Campos marcha vivir temporalmente a Canarias e alí coñece que é positivo en VIH, aínda que non ten SIDA. Regresa a Galicia e comeza a traballar na TVG como guionista nos programas Entre Nós, A ver que vai ser esto, S.O.S., Máis Ozono ou Adiviña quen vén esta noite. Moitos dos guions de Chichi Campos para a TVG estaban protagonizados por Manuel Manquiña e Antonio Durán "Morris".

Un mundo máis interesante

Na biografía publicada no Álbum de Galicia do CCG, o seu fillo Nico Campos escribe sobre o seu pai que "a súa foi unha vida que resume o espírito dos anos oitenta en Galicia, unha época que retratou como ninguén". E conclúe: "atrás quedaron a incrible colección de artigos, guións e debuxos espallados por diferentes libretas, manteis e panos de mesa que regalaba a toda persoa que os quixese. Porque Chichi si quería facer un mundo máis interesante".

Morte en 1991

En 1990 Chichi Campos desenvolve a SIDA e vai consumíndose pouco a pouco, falecendo finalmente en febreiro de 1991. 

Nos meses seguintes recibe varias homenaxes, coma a retrospectiva organizada polos seus compañeiros de Can Sen Dono ou a publicación en 1992 de Estampas do Mundo Elegante, que compila os seus artigos en A Nosa Terra.

Chichi Campos, de actualidade

O pasado ano reeditouse a compilación Estampas do Mundo Elegante, incluíndo ademais 37 colaboracións de autores e autoras actuais que homenaxean a Campos, nunha sorte de explicación para 'millennials' da figura do humorista. Todo o recadado coa venda do libro dedicarase a financiar un documental sobre Chichi dirixido polo seu fillo Nico, responsable tamén da 

Figura incómoda

"Chichi Campos non facía prisioneiros e, seguramente por iso, a súa figura incómoda e satírica segue a ser unha das máis esquecidas da cultura galega dos primeiros anos da democracia", destácase na presentación da reedición de Estampas dun mundo elegante. 

Día da Ilustración 2024

Dende o ano 2014 vén celebrándose cada 30 de xaneiro o Día da Ilustración en Galicia, unha iniciativa da Consellaría de Cultura e da Asociación Galega de Profesionais da Ilustración (AGPI) que conmemora o aniversario do nacemento de Castelao (o 29 de xaneiro) e que dende 2017 homenaxea cada ano un ou unha profesional da historia da ilustración galega "que merece ser redescuberto polas novas xeracións de lectores e creadores"

Nesta ocasión o homenaxeado é Chichi Campos, "figura pioneira da banda deseñada galega e mestre do humor gráfico" e "un autor fundamental na Galicia dos anos 70 e 80", destaca a entidade