Unha ducia de imaxes do vello Samil que agora inicia a súa recuperación
Repasamos as fotografías históricas do proxecto para a primeira fase de restauración das dunas da praia viguesa que ten a exposición pública a Dirección Xeral da Costa, unha actuación que comezará polo norte do areal coa retirada de 450 metros do paseo e a construción dun novo a metade de curto e máis estreito 25 metros terra adentro. O obxectivo final será retranquear dous quilómetros de paseo, ata a desembocadura do río Lagares, pero mantendo a Avenida de Samil mentres non se desenvolva un vial paralelo interior previsto no PXOM da cidade.
-
01Anos 40
O proxecto agora a exposición pública contén numerosas imaxes antigas de autoría non identificada que comezan por esta de Samil nos anos 40 do século pasado, cando só se podía acceder por estrada ao seu extremo sur, a través da zona de Muíños, xunto ao Lagares.
-
02A estrada
En 1953 construíuse a estrada que comunica con Alcabre e a ponte sobre o Lagares sen afectar directamente á duna.
-
03O piñeiral
No extremo norte da praia a estrada respectou parte do piñeiral sobre as dunas.
-
04O Lagares
A comezos dos 60 a zona sur da praia aínda conservaba o seu estado natural.
-
05A ponte
Imaxe da desembocadura do Lagares a comezos dos 60, xa coa ponte sobre o río pero aínda sen recheos
-
06Os recheos
En 1967 execútanse os primeiros recheos no Lagares, que a mediados dos 70 serían ocupados por un picadeiro e instalacións deportivas.
-
07O paseo
Entre 1970 e 1972 construíuse o paseo de Samil sobre a duna en medio de protestas cidadás.
-
08A degradación
Tras a construción inicial da banda peonil do paseo, a duna que quedou na súa zona posterior degradouse aceleradamente como zona de aparcamento de coches e coa instalación de chiringuitos.
-
09A remodelación dos 80
Nos anos 80 do século pasado remodelouse toda a praia, con piscinas, merendeiros, parques infantís e reorganización de zonas de estacionamento, configuración que no básico mantense na actualidade.
-
10A actualidade
No norte da praia a area está a recuperar parte do terreo roubado polo paseo e xa o sobrepasou na zona do piñeiral.
-
11Primeira fase de recuperación
Será por esa parte norte por onde comezará a recuperación da duna. Demolerase o paseo que atravesa o piñeiral e retirarase terra adentro o resto para facilitar a recuperación da duna, aproveitando tamén a demolición de varios chiringuitos.
-
12O proxecto global
En fases posteriores a intención é retranquear todo o paseo ata o sur da praia ao nivel que hoxe ocupan os piñeiros e facilitar a recuperación da duna por diante del, así como retirar as instalacións deportivas da desembocadura do Lagares. Na imaxe, o estado actual, a primeira fase e o proxecto global.