Unha ducia de lexislaturas galegas
O pasado venres 7 de agosto quedou constituído o Parlamento da XI Lexislatura da autonomía, que sumada aos traballos previos de elaboración do Estatuto permiten repasar unha ducia de asembleas parlamentarias galegas a través de imaxes divulgadas en diversas ocasións polo propio Parlamento de Galicia.
01Asemblea de Parlamentarios
Antes de que o Estatuto de 1981 crease o Parlamento de Galicia, deputados galegos no Congreso dos Deputados constituíron en 1979 a denominada asemblea de parlamentarios que negociou a autonomía en diversos eidos. Na imaxe, reunión de negociación do Estatuto o 13 de setembro de 1980 no Hostal dos Reis Católicos por parte de representantes de diversas formacións.
02I Lexislatura (1981)
O 19 de decembro de 1981 constituíuse o primeiro Parlamento de Galicia, daquela no espazo cedido polo Arcebispado no Pazo de Xelmírez.
03II Lexislatura (1985)
A segunda lexislatura da Cámara galega arrancou no Pazo de Fonseca, segunda cesión temporal para a súa sede, neste caso a cargo da USC.
04III Lexislatura (1989)
O 10 de outubro de 1989 inaugurouse a actual sede do Parlamento, xa en propiedade, no Pazo do Hórreo, e alí desenvolveuse xa a maioría da terceira lexislatura, a primeira con Manuel Fraga como presidente da Xunta, na imaxe nunha intervención en 1991.
05IV Lexislatura (1993)
A IV Lexislatura foi a primeira na que, como agora, só tres grupos políticos se repartiron o hemiciclo (PP, PSdeG e BNG), a composición máis habitual da historia da Cámara que se repetiu nas lexislaturas V, VI, VII e VIII ademais de na actual XI.
06V Lexislatura (1997)
A V Lexislatura aínda amosaba imaxes de taquígrafas tomando notas no centro do hemiciclo
07VI Lexislatura (2001)
O propio Fraga, como deputado de máis idade, foi o presidente da mesa de idade coa que se constituíu a Cámara da VI Lexislatura, secundado pola popular María Caldelas e a socialista Laura Seara, as dúas deputadas máis novas.
08VII Lexislatura (2005)
A VII Lexislatura foi a primeira que comezou cun presidente da Xunta non popular, Emilio Pérez Touriño, despois do antecedente do seu compañeiro Fernando González Laxe que chegara á presidencia a metade da II Lexislatura e tras unha moción de censura contra Fernández Albor.
09VIII Lexislatura (2009)
Tras a defensa do seu programa de goberno, na imaxe, Feijóo foi investido presidente da Xunta ao comezo da VIII Lexislatura.
10IX Lexislatura (2012)
Coa entrada de AGE, liderada por Beiras, na imaxe enfrontándose a Feijóo, a Cámara galega volveu contar na IX Lexislatura con máis de tres grupos políticos case dúas décadas despois.
11X Lexislatura (2016)
Coincidindo co 35 aniversario da Cámara, a súa modernización levou á creación dun portal web, lex.gal, con toda a súa produción lexislativa e as sucesivas modificacións legais vixentes en cada momento.
12XI Lexislatura (2020)
A constitución da XI Lexislatura foi a primeira sen invitados na tribuna e con máscaras no hemiciclo.