Unha ducia de patrimonios da humanidade galegos (presentes ou futuros)
A Ribeira Sacra vén de ser elixida como a candidatura que presentará España ante o Comité do Patrimonio Mundial da Unesco na súa reunión de 2021. Repasamos unha ducia de bens galegos que xa teñen recoñecementos da Unesco ou que aspiran a telos.
-
01Cidade vella de Santiago de Compostela
O primeiro Patrimonio da Humanidade declarado en Galicia obtivo o recoñecemento en 1985.
-
02Camiño francés a Santiago
A principal ruta de peregrinación a Compostela foi declarada Patrimonio da Humanidade en 1993.
-
03Camiños do norte
O anterior ben xa considerado patrimonio do Camiño francés foi ampliado en 2015 para incluír tamén como protexidos os camiños do norte a Santiago.
-
04Muralla de Lugo
O mellor exemplo de fortificación romana en Europa occidental foi declarado Patrimonio da Humanidade en 2000.
-
05Torre de Hércules
O único faro da antigüidade que segue en funcionamento obtivo o recoñecemento en 2009.
-
06Construción con cachotaría
Ademais de bens concretos, as técnicas galegas de construción con cachotaría ou pedra en seco tamén están recoñecidas como patrimonio inmaterial da humanidade desde 2018.
-
07Xeoparque do Courel
En 2019 a Unesco declarou o Courel como primeiro Xeoparque Mundial en Galicia.
-
08Ribeira Sacra
Na lista de candidatas do Estado desde 1996, xunto con outra trintena de bens, o próximo ano será a elixida para probar sorte ante a Unesco.
-
09Ferrol da Ilustración
Na lista de aspirantes estatais desde 2007, Ferrol agarda o seu momento.
-
10Ancares-Somiedo
Tamén desde 2007 agarda na lista de aspirantes estatais esta candidatura conxunta de Galicia, Asturias e Castela e León.
-
11Illas Cíes-Parque Nacional das Illas Atlánticas de Galicia
Ese é o nome oficial da candidatura que desde 2018 forma parte da lista oficial de aspirantes do Estado, a iniciativa da Xunta, tras enlearse cos límites do ben a protexer co Concello de Vigo, que teima en defender unha candidatura propia.
-
12Capela mozárabe de San Miguel de Celanova
Desde 2019 forma parte da lista oficial de aspirantes estatais unha candidatura baixo o nome 'Grupo de construcións mozárabes da Península Ibérica', entre as que está a capela de San Miguel de Celanova.